[WKD手記] - 首敗衝擊

012014511-ee45b6ad-f7d0-400f-a4a3-2de018c433c1.jpg

蘇斯克查同一眾職球員齊齊經歷兩個月嚟首場敗仗,雖然抽籤之際各界都唔睇好紅魔鬼能夠出線,但眼見曼聯愈打愈有、巴黎傷患連連,球迷自然覺得首回合應該有一定勝算。最終我地坐擁天時地利人和,但喺主場俾巴黎聖日耳門擊敗,當中差距究竟有幾大?

fulham-fc-v-manchester-united-premier-league-5c5ed208acb3526b12000001.jpg

作客富咸收起部份主力如楊格、連迪洛夫,正選球員亦因為優勢擴大提早被換走,最後贏波之餘又收到輪換之效,作為大賽前嘅準備已經安排同執行得不能再好。簡單總結呢場波就係曼聯發揮出正常水平,而前場個人能力實在比對手強太多所以三條線都無受到太大考驗,除咗入局有啲慢熱之外其餘時間都掌控住戰局。



wECXKI0_d.jpg

奧脫福大戰巴黎,曼聯開賽初段非常進取,無論三前鋒同兩閘都壓前緊迫,希望趁對手未入局就搶到佢地失魂犯錯;巴黎亦都有備而戰,喺站穩陣腳前只求盡量封鎖普巴。基於兩隊都執行得幾到位,頭十分鐘麥巴比同普巴兩個重心球員都幾乎無波到腳咁滯,戰情應該幾合乎兩位領隊預期。曼聯始終唔係迫搶型球隊,上半場中段慢慢調整返企位,球賽進入拉鋸狀態,雙方多次交換控球權,但麥巴比同迪馬利亞兩次嘗試突破越位其實預告咗曼聯嘅危機。曼聯拉後兩閘嚟增強掩護,代價係削弱咗兩邊進攻板斧,加上連加特同馬斯亞單打獨鬥完全佔唔到上風,進攻模式就變成兩邊Early Cross,試問高波能夠做成啲咩威脅呢?

878D5954-9FE2-4B3E-A6E9-5B584830E894.jpeg


無人會知道如果曼聯守得住果腳角球會點,但下半場形勢慢慢向巴黎傾斜︰紅魔進攻套路唔湊效但又無乜改動,於是攻勢愈嚟愈唔入肉,得返斬中同浪射;巴黎就更加敢於用波,反壓中場。以泰亞高施華同華拉堤為首嘅中後場控制節奏有一手,時快時慢,得閒搏下犯規等你更加亂,本來已經老鼠拉龜嘅曼聯就喺不知不覺間由主動變為被動,想急都急唔嚟。呢種微妙嘅形勢轉移喺英超少見,或者就係我地成日講嘅歐洲賽經驗。曼聯陣中唔少球員踢過歐聯,但拍埋去艾維斯、施華又有幾多個稱得上老練淡定?

7E4A2630-E330-4004-8E09-E0823A40246A.jpeg

巴黎鋒線缺少咗卡雲尼同尼馬本來鬆一口氣,點知只靠最年輕嘅麥巴比已經令曼聯條防線雞手鴨腳,不時要用超技術整跌佢。喺無任何藉口嘅情況下,呢場波令紅魔球員同球迷認清現實:我地可能係迅速進步當中,但同論實力、經驗同世界頂級仲有好一段距離。上年馬斯亞落選世界盃大軍或多或少同摩連奴有關,但麥巴比用表現證明自己擁有嘅質素比佢多元化同勁得多,速度、搶點、射術、拉邊Cut In樣樣有,簡直可以用恐怖嚟形容。我地拉舒福特同樣係金童,今場面對住甘佩比最多叫做五五波,但連正面挑戰泰亞高斯華嘅機會都無,咁就明白巴黎其實防守壓力唔太大,仲有位好多走盞。

fbl-eur-c1-man-utd-psg-5c6447ddc762b4b36f000008.jpg

同時不得不提普巴呢場被馬昆奴斯一個防中就封死咗全場,其實係一件好事,因為喺球隊圍住佢嚟建立戰術呢個咁容易自我膨脹嘅情況下,佢需要知道自己有排都未係球皇,仲有大把進步空間,而我相信佢已經夠成熟去從打擊中迅速成長。

7796532596_marco-verratti-au-duel-avec-nemanja-matic-le-12-fevrier-2019-a-manchester.jpg

之前加利佬講過曼聯比曼城落後咗幾年,放係呢場波去睇可以理解成︰曼聯某啲球員可能有世界級潛力,但近幾年球隊成績反覆,佢地無乜同頂級球會正面交鋒,成長同經驗累積自然比預期慢。分組賽首循環面對祖雲達斯已經感受到人地用波比起曼聯有層次、由後場到前場去演繹佢地對「控制節奏」嘅理解,今場亦然。曼聯近年比較鐘意擅於快速反擊,要重拾主攻之道就必須喺強強對決中採取主動,至少要加強控球時組織質素,著重Recycling possession,咁先能夠培養出高壓下嘅鎮定(Composure)。十年前我地可能笑緊PSG法甲山寨王,今日呢?

愛華士戰術板:挑戰者

剛剛過去的兩個月,或許是一眾曼聯球迷近幾年最開心的日子。流著真正紅魔血液的蘇斯克查,在費 sir 曾經的左右手費倫匡扶下,本身內憂外患的曼聯短短兩個月煥然一新,聯賽從落後第四位十四分追至只差三分,更不用再做「六師弟」;足總杯同樣連過兩關,作客實力相當的阿仙奴亦順利取勝。接連的佳績,讓「蘇經理」和拉舒福特分別成為一月最佳領隊及球員。

Mtgj1WfvHu.jpg



先唔好理個獎邪唔邪,一齊攞獎點都係開心事!(Source: Loop Cayman) 
當然,所有紅魔球迷會都因為球隊 V 型反彈高興。但高興過後,等著曼聯的就是一個極之嚴峻的二月和三月。經過作客富咸之後,就是這個魔鬼賽程的開始。
2 月 13 日:歐聯主場對巴黎聖日耳門
2 月 19 日:足總杯作客對車路士
2 月 24 日:聯賽主場對利物浦
2 月 28 日:聯賽作客水晶宮
3 月 2 日:聯賽主場對修咸頓
3 月 7 日:歐聯作客巴黎聖日耳門
3 月 11日:聯賽作客阿仙奴
3 月 16 日:聯賽主場對曼城
3 月 30 日:聯賽主場對屈福特
由於在足總杯八強之前,比賽若果賽和依然會有重賽,所以若果曼聯聯真的作客賽和車路士,曼聯有可能要在三條戰線打十場比賽。就算足總杯不用重賽,這九場比賽已經包括主場對兩支正在爭標的死敵、爭頭四名的直接對手阿仙奴,歐聯還要對實力強橫,聯賽早已放離對手的巴黎聖日耳門。在這個大挑戰之前,蘇斯克查應該怎樣應付這個極嚴苛的考驗?

sketch-1549635317327.png


蘇帥:嚟緊啲波好難打喎!費倫:放心,費sir 過左幾招比我。(Source: Opera)

歐聯對巴黎聖日門 – 最緊要開好個頭
當抽簽抽中巴黎聖日門的時候,大家或許都會覺得曼聯是九死一生,不過經過一個月之後,曼聯換掉摩連奴改由蘇斯克查領軍之後,事情就一百八十度倒轉。與此同時,巴黎聖日耳門在法甲遠遠領放之後卻氣勢稍歛,失去不敗之身之餘更接連失去主力,尼馬以及卡雲尼接連傳出未能對陣曼聯的新聞,令兩隊忽然由強弱懸殊變成勢均力敵。

Kylian-Mbappe-1.jpg



安巴比在世界杯早已證明絕對可以憑一己之力撕破任何防線(Source: The Independent)
不過,若果蘇斯克查認為對方缺少兩大攻擊主力,對巴黎聖日門就可以輕鬆過關的話,肯定會付出代價,因為巴黎聖日門早在法甲領放甚多,晨早已經不用擔心聯賽冠軍的問題,所以很多主力早已經不用常常出場,甚至讓不少隊中年青球員有機會在聯賽磨練成長。而即使以上二人真的不能出場,隊中還有安巴比這位炙手可熱的法國首席前鋒,一不小心他絕對可以自己一個人去懲罰對手。另外,聖日門陣中還有華拉提、以及一眾曼聯球迷眼中的「反骨仔」迪馬利亞作出傳送,另外一個可以帶來威脅的就是今季出場不多,但絕對有個人盤扭能力的戴斯拿。所以曼聯的防線依然需要小心,尤其安巴比、迪馬利亞及戴斯拿都有自己盤扭,撕破對手防線的能力,而曼聯的防守球員不論閘位或中堅,今季的未能在防守上給予球迷很大的信心,即使近幾場曼聯在聯賽作客都可以保持不失,但防線緊密程度以及企位包抄的能力都有需要提高。

paul-pogba.jpg


普巴多些插入禁區爭頂,或許比留在禁區外胡亂遠射更有作用(Source: The Independent)
先主後客的賽程,加上往後的賽事難度一直增加,令首回合的賽事成為曼聯不可不勝的比賽。巴黎聖日門的攻擊線無疑極度豪華,但他們的防線同樣經驗十足。先不論巴黎聖日門用上老將保方還是法國國家隊三號門將艾奧拿把關,但他們前面依然有巴西國家隊中堅泰亞高施華及馬昆奴斯,還有同樣是法國國家隊常客的基林比,右閘在比利時正選梅尼亞因傷可能缺陣的情況下還有世界杯冠軍及歐聯冠軍得主丹尼爾艾維斯可用,曼聯一眾攻擊球員如拉舒福特要攻破巴黎的防守,除了一眾快翼要利用自身的速度優勢挑戰年紀較大的泰亞高施華及丹尼爾艾維斯,中場如普巴必須要加強前插入禁區,因為巴黎聖日門陣容雖然豪華,但觀乎他們歐聯的比賽中場協防能力並不太高,並且比較個人主義,普巴及靴里拉若有能力多做前插的工作,或許比肯定成為眾矢之的拉舒福特有更多機會攻門。再者而且身高不輸蝕於一般中鋒的普巴在禁區內可以成為另一個影子中鋒,吸引兩名中堅的注意力讓其他攻擊球員有更多機會攻門。主場第一回合雖然要小心對手後防不要失掉作客入球,但蘇斯克查肯定想在首回合強攻對手,以邊有空間輪換應該往後越來越難打的賽程。

足總杯 – 受傷的獅子
論近況,蘇斯克查帶領的曼聯十一場十勝一和肯定比剛被曼城大炒的車路士好。但是一場過的杯賽,任何事都可能發生。更何況車路士的狀況比現時的曼聯更難預計,他們既可以在主場大炒對手和反勝前列分子的熱刺,但作客卻可以輸完一場又一場,甚至連不是攻力頂級的般尼茅夫都可以太勝四比零。現時未知車路士是否會留住沙利,而隊中球員是否依有戰意為保住領隊位置拚命亦屬未知之數。唯一可以肯定,對比起曼聯要應付歐聯和聯賽接連對的列強,車路士的後顧肯定未必如曼聯大。

jorginho-chelsea-2018-19_ksrspgb5gmao1cycezrvkvgos.jpg


暫時所見,車路士未見有任何士氣的問題(Source: Goal.com)
至於曼聯自己本身,足總杯五日之後就要對利物浦,雖然哥迪奧拿幾週前已經為曼聯吶喊助威,但以蘇斯克查和一眾教練團對曼聯的認知,再加上剛在上週攀上摩連奴口中要奇蹟才可以達到的聯賽第四位置,曼聯上下不用同市死敵加油都會對主場對利物浦會更重視。而對車路士足總杯的比賽,或許就是一眾未算是蘇斯克查首選的攻擊球員表現的機會。其中山齊士在未被蘇斯克查視為首選的情況下,每逢出場就算未有入球貢獻都算是盡忠職守;可是陣中暫時未受重視的球員當中,盧卡古、佩尼亞以及費特的情況比較令人擔心,這幾位球員肯定會被視為中前場重要的輪換棋子,但他們的表現暫時並未能給予蘇帥太多的信心,以致馬迪和拉舒福特偶爾還要在一些不太重要的比賽出場,馬迪的責任若果不快點令麥湯文尼、佩尼亞或費特其中一個人分擔,恐怕往後的比賽馬迪的擔子更重,表現更難維持水準。

andreas-pereira-and-fred.jpeg


這對巴西孖寶出場時,始於未能像馬迪一樣好好控制控球權。(Source: Goal.com)

聯賽 – 腹背受敵
好不容易才在幾個月內爬上看似奢望的第四位,曼聯上下當然想至少繼續保住這個位置到季尾。聯賽 2 月 24 日主場對利物浦、3 月 11 日作客阿仙奴及 3 月 16 日聯賽主場對曼城肯定是重頭戲。對曼聯來說最大的挑戰除了接連的大戰外,頻密的賽程亦是對曼聯陣容的一大挑戰,由2 月24日至 3 月16日,曼聯將要 21 日內打五場聯賽和作客巴黎聖日門的歐聯第二回合的賽事,而當中最長的休息期只有五日,這對球員的狀態回復可謂不少的挑戰。正如上文所說,中場輪換會是曼聯在各條戰線成敗的關鍵。雖然在蘇斯克查上任後,中場中馬迪、普巴及靴里拉的配搭似乎已經穩定下來,但三人能否有機會儲足休息時間,將會左右曼聯對強隊時爭取控制中場的能力。對強隊時輸掉中場,恐怕只會九死一生,蘇斯克查不可能不考慮這一點。

ander-herrera-paul-pogba-manchester-united_1jq2l0qltiua81mizd32tt28ds.jpg


靴里拉的存在,解放了普巴的進攻能力。(Source: Goal.com)
另一方面,在蘇斯克查執教至今的十一場當中,大部份時間都是沿用摩連奴的四三三,而當中只有作客對熱刺那一場有特別將連加特和拉舒福特調位,為對手作針對性部處。以往在摩連奴帶領的時代,摩連奴除了泊巴士之外,其實不時都會有針對性部署,靴里拉、麥湯文尼甚至達美安都曾經成為摩佬的奇兵,重點防守對方的攻擊主力。蘇斯克查上任後無疑給予了一眾攻擊球員一定自由度或信任,亦直接令曼聯的攻擊力提昇了不只一個檔次。但尤其面對利物浦、曼城和巴黎聖日門等擁有強大攻擊力的球隊,一些針對性的部署絕對是必要的。其中個人認為連加特最適合作為這夥特別的棋子,因為靴里拉若果已經被安排在中場狂跑堵塞漏洞,又要重點防守對方如大衛施華、迪布尼、沙拿或者華拉提等中前場核心,恐怕會顧此失彼。而可中間可邊路的連加特,亦比相對幼嫩及主要在中路活動的麥湯文尼在戰術上更為靈活。當然,本人亦十分期待蘇斯克查和他的教練團隊會有令人意想不到的安排,可以限制不同強手的比現。

Dty91GcX4AE5rag.jpg


「舞王」連加特可以成為凍結對手的棋子之餘,亦有能力成為埋門的奇兵。(Source: Scoopnest.com)

結論:喜出望外,但勿掉以輕心
蘇斯克查上任之後,曼聯的戰績直線上升,打法亦更為進取,短短兩個月內邊令曼聯在聯賽榜位置提升,更獲取了一眾曼聯球迷和球員上下的歡心。由一個熟悉曼聯傳統,得到費 sir 真傳的蘇斯克查,去將已經被幾任領隊帶至迷失方向的曼聯重回正軌,無疑值得高興,亦值得人們支持他繼續留任領隊,但球季瞬息萬變,幾個月前開季時,車路士由沙利帶領,人人都說他的傳控足球破舊立新,收購的寵臣佐真奴亦被讚譽為可靠的中場節拍器,但幾個月之後,個性固執的沙利缺少輪換,打法亦千篇一律,接連的失利令一眾車迷對他狠之入骨,佐真奴亦被取笑只會橫傳後傳,沒有助攻之餘更因為他到來令干提要肩負更多不擅長的進攻重任。這個幾月蘇斯克查受盡讚譽,但一不小少,經過這個凶險的賽程若果有任何差池恐怕又會像幾位前任領隊再萬箭穿心,或許要求這個二三月要像之前全勝,實在太強蘇帥所難,但只要他可以在這個艱難的環境下不用兩個杯賽出局又再被前列球隊拋離,蘇斯克查絕對勝任長時期成為曼聯領隊一職有餘。

ole-gunnar-solskjaer-manchester-united-2018-19_dg8o1r78sf7l1hhbxr77tpqlf.jpg


想我長教,過埋呢幾關先傾啦!(Source: Goal.com)

[K11出品] 曼聯K角度 - 穩中獲勝

開始2月的魔鬼賽程,周中歐聯對PSG,下周末足總盃作客車路士,之後便是雙紅會再迎來PSG的歐聯次回合。今場作客富咸已預期需要作出一定的輪換,而且亦憑普巴及馬斯亞兩位法國孖寶以3:0早早鎖定勝局,及後球隊踢得平平穩穩,得以讓部分主力包括普巴提早休息,聯賽亦進佔第四位。

51934328_2322751918011999_3003985064095645696_n.jpg

正選陣容包括門將的迪基亞,後防右至左包括達洛特,史摩寧,鍾斯及梳爾,三中場維持靴里拉,馬迪及普巴,進攻線上為馬達,盧卡古及馬斯亞。

51754589_2322646584689199_9085160977111973888_n.jpg

今仗擔任隊長的門將迪基亞比預期所受威脅還要細,富咸最有威脅球員米杜奴域亦因缺乏供應加上史摩寧及鍾斯緊纏下無甚發揮,令迪基亞多屬普通的撲救,反而完場前與米杜奴域爭吵而雙雙領黃成為今場迪基亞最多入鏡時間,最終輕鬆保住今場零封。

51571743_1725722800861754_5353059633562910720_n.jpg





後防方面,右閘因楊格得到休息所以達洛特以正選上陣,慢慢地此名葡萄牙閘位球員開始適應英超踢法而且目前較攻擊性的踢法亦適合此名助攻力強的球員發揮,多次助攻亦成功做到傳中效果。不過防守方面則進步空間不少,經驗上仍有待改進特別為標波的時間及位置,今仗曾被祖拜恩推落底線幸得史摩寧包位解圍。

52051090_1725722827528418_7073971244302860288_n.jpg

左閘方面,梳爾開波初段曾被舒爾尼輕鬆傳中造成危機,但其後越踢越有,成功令曼聯左路變得非常穩妥,即使面對不同攻擊球員亦未有鬆懈。

52407061_1725722507528450_8184699273661644800_n.jpg

中堅方面,由老拍檔鍾斯與史摩寧合作,前者剛與球會續新約而今仗亦表現落力,未有給予對手米杜奴域太多空間,而且更成功助攻馬斯亞攻入第二球。史摩寧方面,經歷一段時間養傷與缺陣,今仗復出表現出色,除咗令維亞圖零表現,亦於制空方面與米杜奴域抗衡,而且上半場更引致對方的祖拜恩及張伯斯雙雙領黃。

51616520_1725722744195093_7485536322233303040_n.jpg
52384671_2323149831305541_3348982950711525376_n.jpg

三中場方面,靴里拉今場特別地被安排退後一點,以便普巴更能壓前,結果效果完美,多次搶截成功,令富咸中場線開始便受壓,第二個入球雖然由鍾斯助攻馬斯亞但正正是因為靴里拉的攔截成功而達成,85分鐘由拜利入替。拜利入替主要讓靴里拉提早休息及加強防守之舉動,球隊亦能順利過度維持零封至完場。

51699058_1725722710861763_3499688306541592576_n.jpg



另一中場馬迪,繼續場場正選而表現仍然保持有不俗演出,主要因為其工作重點於中場控制節奏及為中堅有一道屏障作保護。雖然上半場尾段領下黃牌但無損馬迪今場穩定的發揮。

51513540_1725722634195104_7650691863602528256_n.jpg



普巴方面,今仗於球隊受壓了十多分鐘後便挺身而出,接應馬斯亞直線後左路窄位射成1:0,頓時令曼聯的氣勢改變,而且今場普巴踢得更聰明更成熟,絕無多餘動作,傳控停等等均屬正路選擇。當64分鐘球隊獲得12碼後再漂亮地主射成3:0,為球隊奠勝且為自己爭取不少分數成為今場MOTM,亦因此於74分鐘獲得休息機會,由麥湯米尼入替。麥湯米尼入替後曾經接應山齊士的傳中攻門,可惜稍為早出一點,其餘時間則於中場做了務實的工作。

51931645_2322851358002055_5951139821010288640_n.jpg

攻擊線方面,馬達正選並出現於右路及自由人的角色。相對上一場對般尼,今場馬達明顯表現穩定得多,不過雖然如此,卻看到馬達的速率與曼聯整體前線行軍速度有點分別,但馬達的出現總可以為曼聯中前場帶來更多小組入滲的組織出現。

51612595_1725722550861779_3909428714860969984_n.jpg


左路的馬斯亞,今仗表現優異,除了助攻普巴攻入第一球外,23分鐘接應鍾斯傳送後於中場開始一扭三後推入禁區並快過域高一步射入成2:0,此球盡顯馬斯亞看家本領的盤扭功力。而且於左路總能為球隊牽引對手兩至三名球員為隊友獲得更多空位,70分鐘由山齊士入替。山齊士入替後表現積極,而且亦曾有入球機會可惜被域高封出其單刀波,另外亦差點為盧卡古及麥湯米尼製造了入球。似乎山齊士的狀態也慢慢地提升著。

51672228_2322882171332307_4819536296382824448_n.jpg

前鋒的盧卡古今仗因拉舒福特休息而得到正選機會,雖然表現上未算突出亦未找到極具威脅攻門,但控停能力方面見到了進步。希望盧卡古可以繼續提升其狀態成為曼聯新的Plan B。

51730793_1725722580861776_6303722392237637632_n.jpg


戰術分析方面,今仗蘇斯克查作出了數個調動讓楊格及拉舒福特等等主力休息以備戰周中歐聯對PSG的大戰,不過可以看到對今場賽事的認真程度也不輕,中場仍舊派出鐵三角,直到領先3球後才敢讓普巴休息,但此舉亦無可厚非因為雖然歐聯16強重要但聯賽爭前四亦同樣重要。結果球隊亦完美執行了蘇斯克查的計劃,早早拿下領先3球以便穩陣地勝出賽事。

51840045_2322890961331428_4144602827429249024_n.jpg

另外,值得一提的是球隊慢慢能懂得如何控制著當領先後的節奏,既不是死守,也不是純粹的傳送,而是控制著節奏及球權,當找到機會便嘗試加快速度尋找拉開比數的機會。可以看到,下半場的入球機會絕不比上半場少,這樣才是一隊強隊應該擁有的特點。

51731881_1725723634195004_5889175318513582080_n.jpg


今仗的穩中獲勝為2月的魔鬼賽程做到準備,周中便要對PSG,也可能是蘇斯克查於曼聯的一次高級程度考試了,我們齊齊迎接並於球隊共同接受挑戰吧。

51403752_2323482274605630_4338848165114413056_n.jpg

鳴謝各位支持文字直播及即討區,下場見。

[WKD手記] - 蘇斯克查的433

GettyImages-1090931964-min.jpg

先係熱血迫和般尼,後有僅勝李城。當初重獲自由梗係有無窮無盡嘅活力大踢進攻足球,但球員難免會遇上狀態起伏,比賽嘅娛樂性亦唔會場場都咁高。蘇斯克查深明輪換嘅重要性,所以對般尼作出少量調動,等個別球員儲力戰李城非常合理,換轉係費格遜都會咁做。單純以表現計曼聯唔算趺得太勁,但觀感上就愈嚟愈吃力,唔通係對手已經開始搵到方法令曼聯套433行唔通?

5iexnIK_d.jpg

般尼守得咁好要歸功於紀律,相信領隊戴治賽前要求中場平排兼盡量推出去,防守時保持中場線高度,然後由兩雙前鋒向中堅施壓。此舉令中堅用波變得困難,要依靠中場中回後拎波,兩閘自然唔敢壓得太前,成功限制咗曼聯進攻控球嘅範圍喺三閘線而非禁區頂/邊線畸角位。佢地毫無死守嘅心態,反擊時中場照衝埋上禁區令防線大失位,造成第二個入波,八十分鐘超水準嘅發揮只係拎得一分算係有啲唔好彩。

0_GettyImages-1090931814.jpg


般尼發揮得好,但曼聯啲攻勢依然係咁凌厲,只係最後果腳硬係處理得唔夠好,再加上舊將希頓屨救險球,般尼先有機會射入第一球。佩利亞後場失誤導致球隊落後當然難辭其咎,但論全場表現其實算係稱職。其實佩利亞處境相當尷尬:此子青訓出身獲蘇斯克查力讚、實力不俗吸引到唔少中遊球隊注意,年齡開始脫離小將行列但出場時間欠奉,今次上陣又扣哂印象分。最重要係防中以至墮後中場都唔係佢嘅自然位置,意識、風格、身體質素又似西甲果種中場中多過工兵中場,呢一刻真係見唔到佢有能力同靴里拉、甚至費特爭長短。橫掂都係做後備,點解唔用佢嚟做普巴或者左右中場嘅替工呢?

1093367096.jpg


曼聯夫添出擊,李斯特城又點應付? 佩爾就用咗第二套方法牽制三中場。華迪故然擅於執行迫搶戰術,但今仗佢同麥迪遜以及換入嘅岡崎慎司主要對防中前後夾擊而非向中堅施壓。一對中堅有一定空間用波,但同防中條傳球線就長期被封阻住,到佢地交俾兩閘時,防中仍然處於被夾擊狀態,仲有文迪同尼迪迪兩個硬淨防中擋住中間,結果又要局住回返俾中堅。防中想拎波就要跑到去中堅範圍,中路進攻自然就少咗一個人,就連普巴都要回到中圈附近攞波,最後達到接近嘅結果:曼聯進攻控球嘅範圍保持喺三閘線,拉邊大轉向嘅次數都大大減少。

skysports-marcus-rashford-celeb_4566861.jpg

從呢兩場波見到唔同領隊已經針隊曼聯嘅陣式嚟部署踢法,目的就係要減弱我地三人中場嘅參與度,甚至係用盡方法唔俾佢地接近禁區頂。曼聯班前鋒入攝射波都叻,但俾波果腳嘅穩定性始終要靠中場球員去做。英超已經無乜邊隊波會下下死守,反而會嘗試從唔同角度瓦解進攻源頭,若然要突破前四甚至喺將來角逐聯賽冠軍,除咗反擊要高效之外,對住中下遊球隊都要有幾種進攻模式,如果唔係好快俾人睇通哂。

[K11出品] 曼聯K角度 - 疲態漸現的險勝

周中失了2分予般尼,今場作客李斯特城要有勝利嘅決心黎追貼前四,但李斯特城主場氣勢強勁,幸好開波初段即憑普巴一次靚傳送加上拉舒福特穩妥嘅處理先開紀錄。不過及後客隊嘅曼聯完全唔上力而且個別球員顯出疲態但主隊卻有幾次接近必入嘅埋門,幸好有拜利兩次瞓身解圍加上迪基亞兩次精彩嘅撲救,令曼聯得以在疲態漸現下一球險勝,賽後壓過阿仙奴升上第五位。

51119335_2318645688422622_1647945270341664768_n.jpg

陣容方面,門將為迪基亞,後防右至左為楊格,拜利,連迪洛夫及梳爾,三中場為靴里拉,馬迪及普巴,前場方面則由連加特及山齊士協助拉舒福特攻堅。

51445147_2318543405099517_8689106108419145728_n.jpg

迪基亞今場能保零封,除咗條防線越踢越集中,拜利及連迪洛夫封阻李斯特城不少攻門外,迪基亞自己亦分別救出基沙嘅死角罰球及華迪於9碼左右嘅半車身射門,亦因此迪基亞獲選今場MOTM。

51495589_1717513618349339_4136494251296948224_n.jpg

後防方面,楊格繼續無得休息而近仗已經不斷助攻嘅右閘,今仗也已有些疲態出現。幸好楊格作為隊長有無窮鬥志去填補體能上嘅問題,面對高速嘅格雷雖然勉強但仍然頂得住。左閘嘅梳爾則年輕力壯,狀態上仍然保持高水平而且攻守均有水準之內,而且助攻嘅時間及與左翼球員嘅配合亦見改善。

51548760_1717513581682676_8361929248000180224_n.jpg

中堅方面,拜利與連迪洛夫合組,不過前者初段嘅緊張表現令球迷有點擔心但及後拜利慢慢上力,先有瞓身擋出麥迪臣禁區內嘅射門,再有以身相許用頭頂走格雷於禁區邊嘅硬射,其餘時間亦未有失誤,只是高空波方面始終較弱。連迪洛夫方面,仍然保持今季嘅高水平演出,速度上並不輸蝕給李斯特城一眾高速球員,因此呢對中堅今仗算是為迪基亞零封上有唔少嘅功勞。

51420400_1118815884965767_8007442713475547136_n.jpg

中場方面,今仗鐵腳三寶繼續擔正,靴里拉休息一仗後重回正選,今仗於中堅前與馬迪為中堅做一對屏障做得好好,攔截成功達5次之多,亦有85%嘅傳球成功率,而且更曾經創造了2次機會。馬迪方面,今仗除咗有點疲態外,更有點速率跟不上嘅感覺,由於李斯特城中前場速度高,壓迫力強,令一向速度唔高嘅馬迪有點患得患失,更曾被麥迪臣偷走腳下球再入禁區射門,完半場亦領下黃牌。幸好賽事中段開始,慢慢適應節奏更找到今仗如何對自己最為有利嘅踢法,結果與靴里拉為普巴做好保護,讓後者得以更自由地發揮。

51409962_2320049498282241_6418925561283870720_n.jpg

普巴方面,今場開波初段即交出一球漂亮嘅傳球予拉舒福特建奇功。不過今仗體力消耗嘅速度比以往快,中段時間更難以好好做到控傳嘅中場核心作用。雖然如此,普巴今仗亦協防不少,幫助了梳爾的左後防不少。而賽事尾段,普巴儲咗一段體力後,仍有一段一扭三嘅過人突破而最終被侵犯才被停下。

51763956_2318949548392236_2427080431217147904_n.jpg

前場攻擊線方面,連加特回到了正選名單內而今仗連加特的表現一般,全場基本上沒有一次有威脅的攻門但其實連加特的工作主要於全場走動,帶動球隊行軍運作,防守時則不遺餘力地跑動務求減低馬迪及靴里拉等等中場的壓力,90分鐘由鍾斯入替。鍾斯入替的工作便是防守與倒塞,幾分鐘的時間算不錯了。

51044326_2319274585026399_6282510966101901312_n.jpg

左路的山齊士,今仗成為正選而表現只算合格,但其實山齊士助攻助守,防守上還算能幫助梳爾但進攻時亦與隊友的配合談不上默契,可以看到數次的走位但隊友未有察覺,結果於66分鐘由馬斯亞入替。馬斯亞入替後,於左路有過幾次不錯的突破與攻門,可惜均未能為球隊拉開紀錄。不過馬斯亞除進攻外亦有於球隊需要防守時回防更搏得基沙犯規領黃。

51211990_2319030675050790_320655502335803392_n.jpg

前鋒的拉舒福特,6分鐘其實已浪費了一次機會但相隔2分鐘後便接應普巴的傳送,一控一射為球隊開紀錄,這入球由走位,控球再射門均處理得宜,再次看到拉舒福特的進步與信心。不過其後面對麥佳亞的防守的確再難找到機會,結果拉舒福特要走到禁區外找機會去遠射可惜未有威脅,77分鐘由盧卡古入替。盧卡古入替後為球隊帶來了另一種模式而其實85分鐘曾經有機會,當時於進攻右路推入禁區後射門但被舒米高救出。

51359069_2319887274965130_5424916824426807296_n.jpg

戰術分析方面,曼聯今仗以強陣應戰,不過中堅由拜利取代鍾斯相信除了輪換外,亦因為知道拜利的速度比鍾斯更好地去應付李斯特城前場一班高速球員包括華迪及格雷等等,結果亦能為迪基亞做了一定的保護。

51389784_2313997108619097_6173327494368722944_n.jpg

不過曼聯防中線的靴里拉與馬迪方面,其實由摩連奴時代開始便有一大問題,便是不自覺的退入禁區內防守而令對手有遠射或於禁區頂射門的機會。李斯特城今仗有達17次攻門而當中多達5至6次為遠射或禁區頂的射門,要知道雖然遠射要射穿迪基亞並非易事但若出現改變方向或門前執雞等情況便會大失預算。

51132439_2319018991718625_5037102559160958976_n.jpg

另外,曼聯今仗明顯地顯出有心無力的感覺結果即使最終控球率比李斯特城較高但其實戰局上實是對手在控球著,若非迪基亞有神勇演出加上防線今仗集中應對,相信曼聯也要與其餘列強一樣被李斯特城搶得分數。左右二閘及防中位的輪換問題最令人擔心因為正選與替補的實力在著明顯的分別,但將迎接2月份魔鬼賽程的紅魔鬼,實在需要輪換來平衡。且看蘇斯克查的功力是否能做到平衡間亦保持到球隊的水準了。

51161422_2318881081732416_8303524173880229888_n.jpg

鳴謝各位支持文字直播及即討區,下場見。

[K11出品] 曼聯K角度 - 一子錯的輪換

蘇斯克查執教後曼聯勢如破竹,黎到今場對般尼前錄得各項賽事8連勝嘅氣勢。今仗主場出擊本以為紀錄可以再延長一步,誰不知卻踢得辛苦,更差點以2球淨負下慘遇滑鐵盧,幸好86分鐘開始黎個強勢追擊下,結果補時階段追平2:2,終於失分下,回到聯賽榜第六位。今場作出輪換可謂失分關鍵,而且源於一個重要調動,一子錯下推進了今場的困境。

51027219_10156313324302746_8677692597902245888_n.jpg

陣容方面,門將為迪基亞,後防右至左為楊格,連迪洛夫,鍾斯及梳爾,中場為馬迪,代替靴里拉嘅佩利亞及普巴,前場左至右為拉舒福特,盧卡古及馬達。

50740886_2315305745423283_5352234441496330240_n.jpg

迪基亞方面,上半場基本上只是一名觀眾般睇住自己球隊向前進攻,只有7分鐘一次接實基斯活特一球無力嘅禁區外地波射門。不過下半場50分鐘一次球隊嘅失誤令迪基亞面對後上嘅班尼斯被一抽入網。及後麥尼爾於57分鐘一次禁區外嘅硬射令迪基亞勉強擋出而已。可惜80分鐘再一次失守,當時球隊因壓前進攻而令後防空虛下,基斯活特接應傳中頂成2:0,由於太近下,迪基亞也只能目送皮球入網。

50990894_10156313569482746_7811493656753340416_n.jpg

後防方面,右閘嘅楊格未有得到輪換而今仗其實表現不俗,助攻次數頻頻而且傳中質素也甚為不俗。只可惜今仗般尼嘅區域防守做得不錯,65分鐘嘅傳中已經恰到好處但盧卡古嘅攻門又被希頓救出。防守上其實沒太多工作要做而2:0的一球已經盡力回防但為時已晚下未能力迫基斯活特。左閘嘅梳爾,防守上沒太多工作要做,但助攻方面今仗多達3次射門但要不是省中人便是射門斜出。表現算是合格有餘。

50969837_10156313569327746_2772766813975478272_n.jpg

中堅方面,鍾斯工作不多而且都算好好看管基斯活特及班尼斯,雖然所失第一球有部分認為傳波俾佩利亞嘅鍾斯亦有責任,但試想想如果接應嘅係靴馬普等中場,根本呢個傳球是百分百沒有問題的,所以要鍾斯同樣負責的話,所失第二球被引出禁區的責任反而更大吧。另一中堅連迪洛夫方面,今仗數據其實都幾漂亮,97%傳球成功率,9次解圍成功及2次爭頂高波成功已經非常不俗,而且更有2次長傳成功。最重要當然係補時嘅助攻於門前左腳一補追成2:2,為自己今季開齋,亦為曼聯拎翻一分。

51531027_2315385062082018_4845007784615346176_n.jpg

中場方面,馬迪未有得到輪休但今場對於馬迪黎講唔算太大嘅體力付出。43分鐘更可以黎一次個人突破後橫傳楊格,只係後者一射高出而已。另一中場佩利亞,今場終於獲得今季鮮有嘅正選機會,而上半場踢得算是合格,能穩定到控球但迫搶力明顯比靴里拉低一個級數,但下半場50分鐘一次腦筋上嘅錯誤於自己禁區頂接應鍾斯傳送後,竟然選擇嘗試轉身而被對手迫甩,直接造成第一個失球嘅出現。其實簡簡單單地回傳迪基亞便解決一切卻選擇較複雜嘅做法,而且呢個做法甚至普巴亦未必夠膽於該位置所做,結果自招麻煩了,學費要交但對於佩利亞及球隊黎講可能大了一點。其後便開始心神恍惚,或者仍受致命失誤所困擾,62分鐘由連加特入替。連加特入替後踢回自己於前場半自由人嘅角色,迎波俾波走位等等便令曼聯嘅行軍速度加快且流暢。86分鐘於禁區被軒迪歷拉跌為球隊獲得12碼,亦係球隊追平嘅間接功臣之一。

50853919_2315763925377465_6225485856384221184_n.jpg

另一中場普巴,上半場受制於對手嘅密集中場,只能於外圍做傳送,連射門都未能出現。但下半場開波即與球隊搶攻,49分鐘即來考驗希頓。60分鐘及79分鐘嘅傳送其實非常到位但隊友均未能好好接應。86分鐘當球隊獲得12碼後,一射入網先為球隊追成1:2,其實89分鐘普巴再來一記靚遠射但又被希頓救出。

51178874_2315484802072044_5346079207900315648_n.jpg

前場攻擊線方面,今場移往左路嘅拉舒福特今場表現有點不如意。9分鐘接應盧卡古嘅傳送後上面對希頓竟然射斜,而呢球亦可能改變今場兩隊命運嘅一刻,及後拉舒福特包括控球,推進等等都與最近嘅火熱狀態有好大落差。下半場雖然有所改善但所造成威脅仍然不大,而當盧卡古換出後轉入中鋒位置嘅拉舒福特更加隱形咗。賽後蘇斯克查亦講咗今日唔係屬於拉舒福特嘅。

51116989_2315586482061876_1823951711576784896_n.jpg

右路方面,馬達今場獲任正選,上半場有兩次漂亮嘅入攝但一次越位一次被守將趕及解圍成功。不過或者馬達有點餓波,今場越踢越急而且下半場有點搶波踢嘅情況出現,由於般尼亦喜歡對手不斷嘅45度傳中而馬達正正經常於右路用左腳45度傳中,結果被般尼不斷地解圍成功,71分鐘更投訴過激下領黃。連加特入替後轉往中場位置派牌雖然增加咗威脅力但馬達今場仍然講唔上有好嘅演出。

50780557_2315587898728401_5286166411280908288_n.jpg

前鋒嘅盧卡古今場再次正選上陣,而表現亦不斷地改善,9分鐘保護皮球後再後傳拉舒福特其實造得漂亮只是後者未能把握。下半場58分鐘亦終於尋找到今場個人第一次射門可惜被後衛封位解圍。60分鐘再來二傳馬達亦做得好好,而65分鐘接應楊格傳中嘅攻門差點已為球隊追近可惜又是希頓將皮球救出,66分鐘由山齊士入替。山齊士入替後活躍於左路不過其傳送唔算做得好好,69分鐘傳中予普巴但又稍微太高,91分鐘接應傳中攻門可惜又被希頓救出,幸好連迪洛夫執雞成功下,山齊士總算間接成為球隊追平下嘅功臣。

50910824_10156313569632746_2972919595708448768_n.jpg

戰術分析方面,由於即將面臨2月嘅大激戰恐怖賽程,蘇斯克查今場希望俾靴里拉及連加特休息而馬斯亞則有輕傷而要避戰。結果由馬達及佩利亞代替,前者今場表現雖然有點急但由於馬達的確可以改善球隊嘅組織力,加上馬達準確嘅入攝亦是殺著之一。

50839877_795386194141869_8603990362102431744_n.jpg

不過後者嘅佩利亞,代替靴里拉卻未能好好代替,先不說迫搶力,遮線力等等,最重要嘅係幫助球隊串連嘅走位或短傳亦缺乏。但今場對於佩利亞最大嘅過失來自一個不必要嘅犯錯,或者對於佩利亞黎講,於上季西甲華倫西亞踢開嘅佢唔會於此位置受到其他西甲球隊呢種迫搶又或者西甲球隊嘅迫搶力無英超咁大,可惜呢個就係英超嘅爭分奪秒,雖然球員有腦筋上嘅錯誤但其實蘇斯克查有更好嘅輪換選擇。賽前我K11於預計陣容中本認為今場面對般尼呢類硬淨且直接了當嘅球隊時,中場應繼續以最佳鐵三角嘅靴馬普出戰,而其後嘅賽程面對李斯特城及富咸可能更適合佩利亞做輪換。當然蘇斯克查或考慮到呢場係主場出擊且對手般尼只屬中下游位置所以掉以輕心了,可惜一子錯嘅輪換便差點足以致命,最終能保一分也靠球隊戰意維持到最後一刻。

50790802_2180602198662815_8688658134740238336_n.jpg

向好嘅方面諗,早一點迎來先落後嘅經驗總比2月恐怖賽程時才嘗試落後的經驗吧,加上車路士失分等埋曼聯,目前與前四只差2分,希望一直維持。鳴謝各位支持文字直播及即討區,下場見。

51398390_10156313569572746_2460218917109366784_n.jpg

[WKD手記] - 是殺手,不是傀儡領隊

image.jpg


曼聯同阿仙奴合演咗一場比惡鬥熱刺更高水準嘅比賽,如果蘇卡達斯同高斯尼無傷出,球賽尾段或者會出現更多變化。作為歐聯席位嘅競爭對手,兩位領隊唔單只要檢討今仗戰術成功與否,仲要諗下兩個月後場六分波點踢。兩隊戰術指令頗為明確,而且大部份球員都執行得幾精準,證明兩位今屆先接手嘅領隊都摸熟雙方實力同風格,絕對有真材實料。

VLz3Dp3.jpg

成功非僥倖。前幾仗拉舒福特同連加特經常互換位置我會理解為兩者風格類近,交叉走位容易引起混亂。今場早段只要無波在腳就見到非常有系統咁連加特踢中間、盧卡古踢右翼,當時我只觀察到連加特喺中間施壓的確好過任何球員,但就好似犧牲咗進攻效率,因為中場拎到控球權會搓住等佢地換返位先攻上去。直到盧卡古僅僅越位已經響起警號,當時我覺得“呢球阿仙奴都幾炆水喎”,再連入兩球先明白蘇帥就係要用呢個企位嚟發動反擊。盧卡古未必夠福仔快,但佢企喺邊線接應完有能力護波甚至撞開對手,亦因為逗得比平常深而有機會突破越位。

VLz3Dp3 (1).jpg


個人好欣賞蘇斯克查俾佢用波呢個做法,因為盧卡古制空權本身就唔算超班,淨係用頭根本唔會令佢構成太大威脅。腳下功夫一般,但考慮埋速度同身型其實單對單情況下佢一啲都唔易對付。喺某個種意義下,淨係掉高波俾佢或者費蘭尼其實係一種侮辱,因為佢地踢愛華頓嘅時候就係憑住幾瓣能力都唔錯先會被曼聯收購。至於山齊士仲係一拎到波就會因為心急而影響咗判斷同執行水平,但處理球單刀由推過門將到望埋龍門擺靚個身先射入,就知佢只係太餓波同未搵返狀態而擾亂咗冷靜嘅頭腦。呢一下入攝更加係擁有射手觸覺先會起動到,遲一剎已經唔會有突破越位嘅時機,所以我仍然相信佢係頂級球員,對曼聯爭四有益無害。

GSiLNBK.jpg



阿仙奴雖有拿卡錫迪同奧巴美羊兩位高質射手,但主要供應來只伊禾比同藍斯,後者更加係隊中發揮得最好嘅球員。伊禾比被換出前不停嘗試擊毀右路防守,雖然唔算處於上風但楊格都會有所忌諱。藍斯就非常聰明地遊走於防中、右閘、中堅之間,盡量擾亂越位線、後衛企位。曼聯呢幾仗防中由禁區頂殺出去嘅時機好準,後衛又高警覺性,限制咗艾馬利套Plan A嘅同時可以放心盧卡古同山齊士留守中圈線打反擊。上半場末段鬆懈咗少少就差啲俾阿仙奴全面收復失地,可見防守系統只要有一兩個球員隻中力下降就會令成套戰術崩潰。今次進步之處就係下半場都仲保持到防守活力,除咗將中場線推出去之外,普巴亦早咗回防,真正成為反擊第一點,策動快攻兼交出助攻。

RU6PZ3i.jpg

兩隊財政背景有別,但無可否認曼聯三線板凳實力同質素都比阿仙奴深,呢個因素無論喺今場波或者聯賽發展都有決定性影響。當我見到馬斯亞同拉舒福特喺場邊準備入替就由心底裡笑咗出嚟,幻想下一個後衛要守七十分鐘盧卡古同山齊士已經好難受,之後仲要換兩個又快又扭得嘅前鋒出嚟,簡直就係一個災難。相反,阿仙奴即使無人傷出都只得奧斯爾屬於真正攻擊手,而且用嚟換出唯一突破點伊禾比,呢個調動令人費解。論狀態我認為紅魔四鋒都仲有唔少向上空間,尤其係一啲反擊可以處理得更好,但最至少全部都因為良性競爭而在進步當中,喺嚟緊二三月連場激戰下就變得好重要。


[KUMA出品] - 葡萄成熟時 - 連加特

51097591_2314205562199968_1096537186829860864_n.jpg

曼聯中場連加特近日在接受訪問時,向記者透露了他在曼聯所經歷的最低潮,以及為何每次穿上紅色戰衣時都顯得那麼滿足,同時亦有談到和隊友保羅普巴的一隊初體驗。

24058936_2036341303319730_8009543544693330371_n.jpg

據連加特自己所言,他是球隊中最開心的球員之一。很少會看見他的臉上沒有他的招牌笑容,但他亦承認這特質有可能令某些人感到惱火。

儘管如此,這種態度的背後其實內有文章,全因為他曾感受到身處谷底的感覺。在近日的訪問中,他就有提到在卡靈頓訓練基地一層一層成長的經歷,揭露了他在紅魔鬼上演首秀後,隨之襲來的痛苦煎熬。

當講起和法國人一起首次被拉上一隊時,連加特說:「我永遠不會忘記那天在紐卡素,費Sir把我和普巴放上後備席的事。」 

1.jpg

「我們當時只有十八﹑九歲。我還記得在更衣室四處張望,看見那些傳奇們,史高斯﹑朗尼﹑里奧﹑傑斯在做準備,穿起球襪的一刻。」

「我和普巴在後備席坐在自己的位置,要知道,我們以往一直在二百人面前踢預備隊的賽事。現在這可是五萬人,我記得我在球場尾部看過去那巨大的玻璃看台,那就像在搖晃一樣。然後我看看普巴,像說著:『我的天,如果領隊真的換我上場,我很可能緊張到當場失禁。』。」

2.jpg

「很幸運,我們在那天只留在後備席。但那對我來說是一個很重要的時刻。被扔去接受這麼大的考驗,又有機會為費格遜穿起那球衣效力,這對我一直所相信的十分重要。」

可是,當首秀的機會來臨時,那並未照著理想的劇本走:「當我終於能在2014年面對史雲斯的比賽中,穿上曼聯球衣上演地標戰。那應該是對我所有的努力,所有的痛苦,離開家裡多年的一份褒賞。」

「我全家人都來到奧脫福的看台。我當時二十二歲,就像費Sir所預測的一樣。竟這就是今天了,我們終於做到了。」.

「然後當我踢了二十分鐘,聽到我的膝蓋『啪』了一聲後,我就知道我要面對甚麼。我記得在賽後看到我的兄弟,他的雙眼充滿了淚水。因為他知道這代表甚麼,這不只是一次受傷,而是在於受傷的時機,那是影響一切的。」

3.jpg

「我被放置了整整六個月,不能訓練,不能走路,一切都無能為力。只能躺在沙發沮喪地看著曼聯的比賽。這可能是我人生的最低谷,整個人十分消沉。那是跌到谷底的感覺,那真的是。」

但連加特認為這亦是一個轉捩點:「我真的絕望到在不停拔自己頭髮的程度,但那時亦是我有機會去回想一下我的人生,然後我發現擁有的一切其實都可能轉瞬即逝,你明白我的意思嗎?即使你很努力,你亦有著天賦,但沒有甚麼事是絕對的。」

「跌落谷底令我很珍惜穿上曼聯球衣的每次機會,因為隨時一個意外這就會離你而去。」

「我整整等待了14個月才再次有機會穿上曼聯球衣。從那時起我就沒有收起笑容,如果你不喜歡,很抱歉,我不打算改變。」

4.jpg

後記:連加特作為曼聯陣中一員,可以說是天賦較低的一個。去問問每個曼聯球迷,速度最快的數拉舒福特;最具靈氣可能是普巴﹐馬達;盤扭過人也許是馬斯亞。但如果要數陣中最開心,最能成為各人的黏合劑的,大家很可能會得出連加特這一個答案。在蘇帥手下的他受惠於高位壓迫的戰術,表現漸進佳境,近日對阿仙奴亦攻入一球,證明自己火熱的狀態。根正苗紅的青訓出身,又肯以勤力跑動補足天資的他,相信無論將來球隊帥位誰屬,他亦能在陣中繼續站穩陣腳。期望他能繼續保持樂觀的態度,用笑容帶動和感染每一個隊友。

853357.jpg

[WKD手記] - 補時階段的蜜月期

FB_IMG_1547926518724.jpg

七戰全勝,保得住三分但隱憂慢慢浮現,所以更加應該把握時間尋找改善空間。近兩仗尾段都陷入苦戰下得勝,但只靠士氣絕對唔足以跑完聯賽呢個馬拉松,最後都要考領隊功力。爭四份子各有問題,曼聯相對已經算齊整,中前場球員整體質素同狀態尚可彌補後防漏洞,不過臨場應變之差可能會被未來對手所針對。

lykeIoo_d.jpg

曼聯近乎夫添出擊並維持前幾場嘅進攻套路,呢一點係值得欣賞嘅。球員即使理解戰術體系,都要透過不停練習同實踐先可以以接近完美嘅姿態執行職責,尤其對拉舒福特同普巴呢啲幾個位都踢得嘅球員,位置熟練度更為重要。當曼聯主導球賽,控球通常集中喺左路,除咗因為普巴同馬斯亞有默契、多位右腳球員切入中路能力強之外,右路進攻模式需要大量空間亦係原因之一。十二碼當然係憑普巴個人技術搏返嚟,但馬迪俾嘅轉向長傳同樣咁精彩。

yhfr8AS_d.jpg


(達洛特、楊格觸球對比圖)

唔單只呢個攻勢,曼聯好多時左路用波迫使對方要密集佈防,然後右路楊格就可以喺無波情況下衝上右翼位助攻,右翼連加特就會乘勢移入中路。此舉令楊格同靴里拉响進攻時無需經常上腳同長期留守前場,仲真正利用到球場闊度,加上個個都有返咁上下突破能力,對一般中下遊球隊會好易就造成後防混亂。

VnGesoZ_d.jpg



(普巴全埸五次失去控球,其中四次都發生在60分鐘後)

自蘇斯克查執掌後,曼聯球員無論上腳用波同第一時間俾波Pass and move都多返,而要

踢得富娛樂性、節奏明快除咗默契之外,體力一樣咁重要。好氣好力梗係可以繼續大舉進攻,體力下降就會誘發近兩仗下半場嘅現象:當隊友遲咗半拍現位而少咗交波選擇或推進空間、中場喪失一定機動性,馬迪同普巴就會多咗過度上腳俾人偷波嘅情況。兩位中場大腦好清楚知道要嘗試保持住控球嚟拖慢節奏,而對方當然知道呢個策略而施以更大壓力,正如白禮頓落後兩球後一直都保持住防守紀律,一心等曼聯失誤或者最後二十分鐘先全力反撲。



TELEMMGLPICT000186041984_trans_NvBQzQNjv4Bqsy3ljDmKPYvHwR7gjpbrZK8LZI-hWjth4X2z9uH9PjA.jpeg

成功的話就會捱過迫搶階段,甚至再下一城提早結束球賽,但如果被人追返一粒局勢就會開始失控。為求加強防守,陣式會轉為451,偏偏中場問題最為嚴重:普巴防守效率較低經常處於波後,頂多從後追逼持球者而做唔到遮線封位嘅工作,但馬迪就成日向邊移位,痴心妄想佢會走返入嚟一齊守,導致佢同靴里拉中間穿咗個大窿兼少咗個人衝出嚟殺波。兩翼即使回防都唔覺得太有效率,有時係出現咗但一樣失位俾人走身後,前面果個單箭頭就更加被孤立。伊巴仲喺度嘅話可能Hold到一陣打埋反擊添,但現實係狂輸第一點同控唔到落嚟轉守為攻,感覺比泊大巴只係擴闊咗防守範圍同多啲主動性。麥湯美尼同受傷中嘅費蘭尼雖然同中場三子技術上有分別,但佢地絕對適合喺呢種情況下換入,搶奪三閘線嘅主權,否則就會任由對方進攻。要知道摩連奴都教唔識佢地點泊大巴,而家叫佢地齋守又點會次次都咁好彩丫?


[K11出品] 曼聯K角度 - 穩定地取得連勝

蘇斯克查執教曼聯開始未嘗一敗,而且更以各項賽事6連勝姿態來到今場主場迎戰白禮頓,本以為又可輕鬆過關,而且上半場已經由普巴嘅12碼及拉舒福特嘅妙射領先2球,誰不知下半場被白禮頓壓迫下追成1:2,結果最後15分鐘仍然受壓下以同樣比數全取3分。即便如此,曼聯已經追近第四位嘅車路士只餘3分之差,雖然今場贏得有驚無險,卻總算是穩定地勝利了。

50664964_2308754082745116_7217704218944077824_o.jpg

今場陣容方面,門將為迪基亞,後防右至左為楊格,連迪洛夫,鍾斯及達洛特,三中場為靴里拉,馬迪及普巴,進攻三子分別為連加特,馬斯亞及拉舒福特。

FB_IMG_1548157518473.jpg


白禮頓今場真正威脅迪基亞嘅攻門不多,中門框嘅攻門多屬省中人後無力彈向迪基亞或本身只是無力嘅攻門。可惜71分鐘哥斯伏兵門前近距離射網頂入令迪基亞再次失守。

FB_IMG_1548157578393.jpg

右閘嘅楊格繼續正選,現年已經33歲嘅楊格今場帶點疲態,上半場初段曾有幾次解圍極不清脆,不過經過一輪入局後又再次投入比賽中而且亦有不少助攻包括19分鐘跑落底線傳中予拉舒福特嘅攻門。

FB_IMG_1548157596388.jpg


左閘方面嘅達洛特,19歲嘅佢再次於英超上陣但今次係開波前一小時內代替因病最終未能上陣嘅梳爾。或者蘇斯克查有任務給予右閘的楊格所以達洛特的臨時拉夫繼續出現於左閘位置,否則達洛特於右路的表現相信會比在左閘時的他更好。今仗交失波或企錯位嘅情況出現不少,幸好年青有速度救回不少,當然即使是在波圖的時候,達洛特任左閘也只是替工而去到英超就更難適應,期待達洛特慢慢地上位。

FB_IMG_1548157649558.jpg


中堅方面,連迪洛夫與鍾斯繼續拍檔,連迪洛夫繼續其上佳演出令白禮頓嘅梅利無啖好食,今場錄得5次爭贏高波及5次解圍,而且長傳嘅助攻亦有不俗效果,包括傳交馬斯亞入禁區攻門嘅長傳亦非常到位。另一中堅鍾斯,今仗表現尚算穩定而且亦維持其一向嘅拚勁,所失一球由於正與對方另一守將爭頂而漏後也可算情有可原。


FB_IMG_1548157624770.jpg

三中場方面,靴里拉今仗表現繼續好,即使獲得蘇斯克查給予了自由但其戰局責任感關係,主要留在中場做搶截工作,也不時包回右路楊格助攻後嘅右閘位置,等到適當時候才上前助攻。

FB_IMG_1548157553661.jpg

馬迪方面,由摩連奴時代已經長期正選而來到蘇斯克查軍下仍是重要一員,其實著實有道理,控制中場節奏,作為中堅前嘅屏障的確做得不俗,雖然明顯有些疲態但暫時球隊內未有人能成功代替到佢嘅位置,希望足總盃得以休息備戰瘋狂二月嘅來臨啦。

FB_IMG_1548157527873.jpg

普巴方面,今仗其實腳風唔太順,多次做到攻門嘅攻勢但去到最後一步便高出或斜出或省中人出界,幸好24分鐘用其個人突破入禁區而搏得犯規下,親自操刀為球隊先開紀錄。賽事尾段明顯速率下降不少,相信足總盃也需要休息休息吧。

FB_IMG_1548157590713.jpg



進攻方面,連加特今仗雖為右翼身份出現但其實較為自由,因為連加特除咗進攻工作幫助球隊做串連外,還需要做防務工作幫助倒塞空間令對手攻勢不能輕鬆進行。可惜52分鐘接應拉舒福特傳中卻未能命中,否則連加特嘅無名英雄角色會更為明顯,74分鐘由馬達入替。馬達於對手攻入1:2後入替,相信是希望用馬達嘅組織力及入攝增加對手防守壓力,不過今場效果一般。

FB_IMG_1548157644541.jpg


左路嘅馬斯亞其實能用表現突出來形容,但卻又是一場無咩數據嘅賽事。腳風仍有點不順令馬斯亞即使能突破二人後也未能破門,幸好蘇斯克查仍給予耐性與信心,81分鐘才由盧卡古入替。盧卡古入替後因為對手加壓下,其觸球或能做進攻嘅時間不多,反而協防時則做出一次清脆嘅解圍。

FB_IMG_1548157638346.jpg


正前鋒嘅拉舒福特,今仗繼續表現出色,控停傳送也有不俗效果。多次傳中也能成功只是未有隊友成功搵到破門方法包括52分鐘急勁傳俾連加特嘅傳中。不過42分鐘於禁區左路窄位下,最近狀態極佳嘅拉舒福特於幾乎沒有角度嘅情況下射入網仔成2:0,此入球極重要因為完半場前將白禮頓由落後一球變成兩球,給予曉頓於半場帶俾白禮頓嘅teamtalk及信心也會有所影響,92分鐘踢到差不多用盡氣力後由達米安入替。只有3分鐘嘅時間或者會成為達米安效力曼聯嘅最後時間,有傳冬窗將外借到祖雲達斯直到季尾再轉會。

FB_IMG_1548157665202.jpg


戰術分析方面,經過一直連勝後,雖然蘇斯克查表示無壓力,但明顯今仗踢得較之前保守了一點,或者因為希望延續連勝又或者因為球員經過一連串力谷後開始有回調嘅情況,又或者認為白禮頓嘅韌力較強而戒心更大吧。下半場蘇斯克查嘅換人明顯較遲且來得穩陣,保留最近搏盡嘅拉舒福特及普巴便知道而兩者其實於賽事最後15分鐘明顯速率大減了。


received_367761933892972.jpeg
FB_IMG_1548157693597.jpg

當然亦要給予讚賞白禮頓不放棄嘅精神令曼聯今仗最後15分鐘極為受壓,幸好最終亦由普巴與拉舒福特兩個入球足以令曼聯繼續穩定地取得連勝。

FB_IMG_1547926518724.jpg

鳴謝各位支持文字直播及即討區,下場再見。
















[WKD手記] - 紅白大戰

920x920.jpg

99年卡爾遠射收死舒米高、01年曼聯落後三球下反勝到上年足總盃準決賽再次反勝,熱刺對曼聯從來不乏經典場面。近年兩隊有唔少定位、實力都類似嘅球員,每次遇上都係位對位嘅直接對決,甚至直接影響佢地喺國家隊嘅地位。今場波緊湊程度有如決賽一樣,除咗領隊,順便比較下兩隊球員表現。

50048218_2305038989783292_9121993740469141504_n.jpg

上半場雙方水平之高比得上今屆任何一場英超,撇除曼聯球迷身份都覺得“我最期待的畫面出現了”。球賽精彩唔一定因為入波多,廿二位球員都盡力執行戰術先係重點,作為球迷完全感受到兩隊風格、進攻理念同重心。喺短短四十五分鐘內佢地嘗試攻擊對方弱點,同時又要考慮攻守協調,加上雙方都積極搶波令球員要喺極短時間作決定,極富博奕味道,從中窺探到領隊賽前做足功課,識得取長補短。相反,下半場觀察到兩者都無明確Plan B,靠嘅係球員鬥智多過戰術,情況有啲似今季熱刺輸俾利物浦果場波。單睇今場好難斷定邊個更適合教曼聯。

0b34210dd7098ed4c949bc6d5617e927.jpg

熱刺要贏就必須靠兩閘壓前,同一對中堅自然會有距離,當中以右閘查比亞比左閘戴維斯更為進取,中堅拎波果陣斯素高就會移去右閘位置;當查比亞喺三閘線拎到波,斯素高更加會疊瓦開路,等前者可以隨時斬波俾簡尼,可見斯素高對呢個戰術嘅攻守流暢度相當重要。馬斯亞回防效率唔高,梳爾少助攻算係明智之舉,而另一邊楊格相對進取,攻返戴維斯令對方唔敢亂上,雖然唔係由中場疊瓦,但三個前鋒輪流响右邊跑直線已經夠頭痕。

premier-league---tottenham-hotspur-v-manchester-united-1.jpg

拉舒福特上季操到咁大隻就係為咗做中鋒,但好快就撞板:腳法無之前咁靈活、多咗格硬死扭獨食、踢中間又頂唔贏。佢一直都做唔到伊巴或者係盧卡古嘅嘢,但蘇斯克查用戰術嚟發揮佢獨有嘅過人能力同射門觸角。曼聯擺明打反擊,福仔不停喺四人防線之間嘅身後遊走,令熱刺兩閘每次壓前都係賭博,全場唯一入球就係來自查比亞失誤、戴維斯因戰術需要失位先誘發到福仔單對單用速度爆過維頓漢呢個局面。英格蘭有唔少翼鋒都有成為中鋒嘅情意結,只講近年都有韋碧克、禾確特呢啲例子。踢中間唔一定要做希斯基嘅,奧雲一樣得,唔知修夫基會唔會參考蘇斯克查,三月國際賽時將佢移入中路,代替韌帶受傷嘅簡尼踢中鋒呢?

GettyImages-613355588.jpg

另外兩對可比性高嘅球員就係連加特對阿里、普巴對艾歷臣。猶記得世界盃連加特同阿里踢法頗為重疊,而前者出色嘅表現令阿里喺國家隊中突然失去咗定位。返到球會,連加特雖然今場有份造成入球,走動都仲係咁高效,但新帥帶隊後觸球時間愈嚟愈少,對佢個人發展未必係好事;至於阿里作為影鋒嘅控傳能力的確值得成為熱刺進攻核心,佢同艾歷臣可以話係相輔相成,永遠都需要佢喺前面造成威脅,先能夠幫艾歷臣爭取空間做一個墜後型指揮官。相反,普巴愈踢愈前先搵返真正嘅自己,須知道佢唔單只視野好俾長傳叻,腳下功夫了得又射得,要守死一個全盛、有自由度上落嘅佢唔會係一個人做到嘅事,而佢仍然進步緊。

screen-shot-2019-01-14-at-14-29-19.png

最後一對當然係門神之爭喇。兩人係英超打滾咗咁耐都有唔少神救,但洛里斯始終唔夠穩定,偶爾派膠而且大賽表現平平,喺我心目中稱唔上世界級門將。迪基亞由世界盃失準到而家又變返世界最強之一,多年嚟為曼聯保住過幾多次三分,最近身體語言仲愈嚟愈有信心、又識得激勵防線,已經成為普巴之後最不可劃缺嘅紅魔鬼。有趣嘅係,前熱刺球員贊拿斯比較兩者,認為迪基亞憑較佳企位擋走簡尼球半單刀而洛里斯做唔到。事實上九成門將教練都唔會叫你學迪基亞咁企,因為只要反應無佢咁快、用腳封波無佢咁勁就會輸哂遠近柱,仲未計佢救波果陣隻腳夠快夠力將個波踢去安全位置以防有人執雞。迪神做到人做唔到嘅嘢,所以先叫迪神,屋企嘅小門將千析唔好亂學呀。

[K11出品] 曼聯K角度 - 真.魔神英雄傳

自蘇斯克查上任以黎,曼聯全隊上下好似有翻靈魂一樣,普巴入波助攻齊晒,拉舒福特等等攻擊球員亦輪住入波,而靴里拉同馬迪組成嘅中場線亦極具效率,紅魔鬼精神重新湧現。而迪基亞亦於作客熱刺嘅呢場聯賽大戰甦醒過來,迪神重新歸位,為曼聯取得蘇斯克查執教後各項賽事6連勝,令拉舒福特嘅入球足以1球作客擊敗熱刺全取3分,賽後迪基亞表示呢隊係真嘅紅魔。明顯地,真.魔神英雄傳正式上演。

50299848_2304822736471584_1499443967173853184_n.jpg

陣容方面,迪基亞繼續把守最後一關,後防右至左為楊格,連迪洛夫,鍾斯及梳爾,三中場為靴里拉,馬迪及普巴,進攻三子為拉舒福特,馬斯亞及今場以中路為主嘅連加特攻堅。

49783396_2304733163147208_5190776458947067904_n.jpg

迪基亞今場面對熱刺嘅進攻雖然忙碌,但忙得高興,上半場熱刺攻門多屬唔中框嘅外圍射門,不過下半場熱刺轉踢法後攻勢越黎越入肉,包括阿里嘅頭頂腳踢,哈利簡尼禁區內多次嘅射門及艾歷臣嘅罰球,可惜均被迪基亞救出,全場作出11次撲救而其中幾個撲救更是令人難以置信。今場零封相信令迪基亞續約幫助不少,希望快快動筆留下來吧。

50322101_2305644426389415_3859618295502077952_n.jpg

左閘方面,梳爾表現繼續穩定而且防守意識亦見增加,仍記得施素高受傷一刻正是梳爾回身跑動的一刻而梳爾回身嘅反應相當唔錯。不過賽事期間亦曾見普巴對梳爾嘅防守位置有點不滿,或者溝通上要更多。助攻方面,與馬斯亞越見合拍亦可喜可賀。

49342482_1689764374457597_8813144991560892416_n.jpg

右閘方面,楊格所面對嘅正是今季狀態巔峰嘅孫興姄不過今仗此名南韓球員連一D射門威脅都無,只能於邊路不斷嘗試卻未能越過楊格,下半場後段雖然有點體力不繼但有靴里拉與後備入替嘅達洛特相助下能力保右路。

50230610_1689764151124286_2808101166322286592_n.jpg

中堅方面,鍾斯與連迪洛夫再度合作而今仗雖然被熱刺攻門達廿次之多但其實此對中堅成功令英格蘭射手哈利簡尼及其隊友阿里嘅威脅減至最低,當哈利簡尼出外圍迎波時,鍾斯亦都緊隨而連迪洛夫則於禁區內殺波,為迪基亞盡了最大程度嘅保護。特別係連迪洛夫,今仗無論身體對抗,速度與位置都未有佔下風,絕對要一讚。

50050984_2305070106446847_1963572894982209536_n.jpg

三中場方面,靴里拉與馬迪回到正選陣容而且亦為後防提供咗好好嘅保護,不過受著熱刺嘅強攻,亦只能作最基本嘅防守而未能參與太多進攻,但由於馬迪能控制節奏而靴里拉則會不斷走位幫波,令球隊控球時中場嘅活力也有著適當嘅運行。另一中場普巴,由於對紐卡素時被舒爾維踩到而受輕傷,幸好經過休息後趕及此場大戰。今場普巴未能如之前數仗般大舉進攻,更能睇到普巴嘅投入感,控球時間不多,而且亦要參與防守下,普巴今場仍能保持超過8成傳球成功率,而且創造機會傳球亦有3次而其中一球便讓拉舒福特轉化成入球。下半場更曾有2次機會破門但均被法國隊友洛里斯救出而已,不過下半場中後段明顯睇到普巴體力不繼,最終於93分鐘由麥湯米尼入替,功成身退。麥湯米尼入場時間不多,主要幫手防務等工作。

49897553_2304995213121003_8469469890447671296_n.jpg

進攻三子方面,左路嘅馬斯亞今場回到正選而表現屬合格而已,始終對手派出兩名球員黎防守佢而要讚嘅係馬斯亞除咗未有過多硬闖外,亦勤力幫手防務工作,多次見到馬斯亞做到左閘位置幫手包位,更曾差點助攻普巴取得入球,73分鐘由盧卡古入替。盧卡古入替後於前鋒位置出現而表現屬普通,亦能搵到射門機會但主要受制於其比利時隊友艾列達維特下難有突破機會。

49778117_1689763997790968_9080441916155232256_n.jpg

今仗以正前鋒姿態現身嘅連加特,主要工作並非進攻而係限制熱刺防中榮斯嘅活動範圍,結果今場榮斯踢來患得患失,多次遠射亦偏離目標。除此之外,連加特勤奮嘅跑動亦為球隊於前場負責工兵嘅工作,搶到波後便傳波再走位,入球嘅出現正是連加特奪得皮球後回傳予普巴作出轉向嘅長傳而成。不過連加特於開波初段亦在禁區內浪費咗一次大好機會而射高咗,83分鐘由達洛特入替。約10分鐘嘅時間予達洛特而此名葡萄牙右路球員亦正在適應當中。

50272776_2305028929784298_8151090527505219584_n.jpg

負責右路嘅10號球員拉舒福特,今仗再成球隊英雄,接應普巴長傳控入禁區後一箭定江山,此射門其實頗難處理而且維頓漢亦已包回中路位置所以拉舒福特也只有一條路可做,結果不負所托並顯示出信心下射遠柱入網成1:0,球隊亦以呢個上半場嘅入球獲勝。近9仗為球隊貢獻咗5入球5助攻,相信拉舒福特亦已成為球隊主力下,進步亦會跟隨而來。

50612268_1689764411124260_8580331259874508800_n.jpg

戰術分析方面,今場蘇斯克查利用咗連加特於進攻中路做工兵嘅工作,令熱刺防中嘅榮斯同一對中堅不時要顧及位置嘅調整,而其實主力進攻在於左右兩邊嘅馬斯亞及拉舒福特,結果令熱刺右閘嘅查比亞及左閘嘅戴維斯未能放心助攻,若果有空間便由此切入中路挑戰艾列達維特及維頓漢,結果入球便正正出現在熱刺左閘空虛而拉舒福特向前切入中路面對維頓漢所致。

49344471_10156275744962746_1649161785468518400_n.jpg

其實普捷天奴半場未夠已發現熱刺核心艾歷臣觸球太少,故施素高因傷離場後派出林美拉此名技術型球員黎幫艾歷臣製造空間,下半場熱刺多次嘅攻勢均由艾歷臣發動便可知其用意。幸好有迪基亞神勇嘅演出加上一眾後防嘅高度集中方能保住致勝球。但要留意上半場熱刺嘅攻勢多屬外圍且未能命中但下半場卻被對方壓住踢而且攻勢越見入肉,要知道唔係場場都可以靠迪神保住大門。我K11則對下半場用達洛特而非搶截型嘅費特黎入替連加特表示有點不認同,雖然費特攻擊性較多但由於中路已被熱刺佔優,靴里拉及馬迪已被壓至禁區頂,應該用費特於中路黎進行搶截而非達洛特,最終也未見達洛特能幫助太多。

49834081_2305001823120342_8657482594931179520_n.jpg

不過最重要還是作客擊敗熱刺報回首輪主場被擊敗之仇,而且球隊亦見團結及士氣提升,最重要係眾多紅魔球員於賽後均表示開心包括咗今場返咗黎嘅迪神,更表達[真紅魔]嘅言論,期待真.魔神英雄傳繼續延續落去。唔好忘記,仲有一位山神未歸位,期待!

50014543_2304999309787260_488200943897149440_n.jpg
50104221_2304830166470841_1710179801727238144_n.jpg
49937740_10156276193867746_9059116046320926720_n.jpg

鳴謝各位支持文字直播及即討區,下場見!