[讀者投稿] - 談談白連特

daley-blind-1.jpg


日前,效力咗曼聯4個球季嘅後防球員戴利白連特證實回歸自己的母會阿積士,因此想寫一些文字談及對白連特的表現及感受。

BweJVYMIMAACber.jpg

 

2014年,,戴利白連特喺巴西世界盃嘅表現出色,因此走馬上任嘅曼聯領隊雲高爾亦將自己嘅愛將由阿積士帶到嚟曼聯,8月30日曼聯官方宣布以1380萬鎊的轉會費由阿積士簽入白連特,與雲高爾延續喺世界盃嘅合作之路。

4509348.jpg


14/15球季,亦即是白連特加盟曼聯的第一季,白連特主要以防中位置出現, 其閱讀球賽能力及長傳的質素, 令當時一眾曼迷都認為白連特有能力成為老將卡域克的接班人。 而該球季白連特亦為曼聯射入兩個入球,分別喺2014年10月20日英超作客西布朗同埋2015年2月8日英超作客韋斯咸均射入一球,雖然入球並不多,但這兩個入球含金量都非常大, 因為這兩個入球都係為曼聯追平嘅入球,為曼聯搶回一分。而去到季尾階段,白連特以左閘姿態上陣,與該季翻生嘅艾殊利楊格在左路合作頗佳,相信最令人深刻嘅係雙紅會中佢曾經令對手防中安利簡趴在地下上,而白連特出任左閘期間, 球隊亦獲得聯賽六連勝的佳績。

download.jpg


15/16球季, 雲高爾卻簽入2014年世界盃冠軍成員舒韋恩史迪加以及當時法國國家隊中場主力舒拉達連,令本身在曼聯出任防守中場的戴利白連特需要退位讓賢,於是雲高爾決定將白連特放在中堅位置, 與史摩寧夥拍中堅位置,雲高爾的原意是想讓一個用球能力較高的球員能夠在後場組織攻勢,以及能夠在後場位置有更多控球在腳時間,而該季白連特擔任中堅亦成功取得幾個助攻,不過雲高爾卻忽略白連特的身高以及體型在中堅的位置上較為輸蝕,所以讓一眾曼迷都覺得白連特在中堅位置非不穩健, 經常有甩漏要史摩寧協助他。 雖然如此, 但白連特亦不乏良好表現, 身為曼迷的一定記得他對死敵利物浦的入球, 2015年9月12日主場對利物浦的賽事當中, 下半場初段一個罰球攻勢,馬達巧妙地妙傳地波白連特成功射入為曼聯先開紀錄, 最後曼聯以3:1勝出。

manchester-united-daley-blind-liverpool_3350159 (1).jpg

 

 此後在足總盃第四圈作客打比郡的賽事中入球, 而該季曼聯成功取得足總盃冠軍,白連特當然是其中一位奪冠功臣。 2016年4月3日,曼聯主場迎戰愛華頓的賽事中,白連特全場嚴密看管對方前鋒盧卡古非常成功,受到一眾球迷的讚賞。可惜在2016年5月10日英超作客韋斯咸的賽事當中,白連特連番犯錯令曼聯反輸3:2全失三分, 失去爭前四的主導權,最終曼聯以第五完成聯賽, 喪失歐聯資格,雲高爾亦要下台。

Daley-Blind-Man-Utd.jpg

 

16/17球季,摩連奴正式上任成為曼聯領隊,摩連奴上場後並沒有如球迷所願即時將白連特從中堅位置剔除,反而選擇用白連特夥拍拜利作為正選中堅的組合,或許是因為史摩寧季初需要停賽的關係吧。當季第一場正式賽事就是社區盾對戰李斯特城,白連特以正選中堅姿態上場, 而曼聯亦以2:1勝出,協助摩連奴取得執教曼聯後第一個錦標。隨後曼聯頭4場英超賽事白連特均以正選上陣,可惜在第4場英超賽事主場對曼城犯下兩次嚴重錯誤,其中堅位置由史摩寧取替。雖然中堅位置被取代,不過白連特其後較多時間都以左閘位置出現,但是上陣時間已經比雲高爾執教年代為低。該季其中一個亮點應該是中堅的組合,皆因洛荷夥拍鍾斯的效果甚佳,直到歐霸盃八強階段主場對安德列治的賽事中洛荷受傷需要收咧, 白連特終於獲得上陣機會, 再一次以他夥拍拜利應戰餘下的歐霸賽事, 臨危受命的情況下,白連特總算不過不失, 去到四強階段主場對切爾達拜利領直紅出場, 去到歐霸決賽摩連奴選用雲高爾第二季的正選中堅組合, 以白連特夥拍史摩寧,卻得到甚佳的效果,曾幾何時這對讓球迷感到不穩的中堅組合, 摩連奴選擇在球季最重要的一場賽事中第一次選用這對中堅組合,或許是對手實力還差一班,最終曼聯奪得歐霸盃,取得歐聯入場券, 曼聯在季內奪得三項錦標,其中兩項賽事都以正選姿態上場,證明他在眾領隊心目中都是頗重要的球員。

manchester-united.jpg

 

17/18球季,白連特也是季初獲得不少正選機會,頭3場英超以正選左閘姿態出現,不過摩連奴這季選擇信任經驗老到的艾舒利楊格,而白連特則在盃賽賽事獲得較多機會,而歐聯分組賽當中白連特6場都是全場打足,並入選歐聯分組賽的最佳陣容,聯賽盃也是全部打足,可惜八強不敵布里斯托城出局。而白連特其後都不斷受到傷患困擾, 已經未能得到太多上陣機會。

總括而言,白連特在曼聯都頗受兩位領隊的重用,而且屢次在決賽賽事中上陣,這位曾經在曼聯擔任防中,中堅及左閘的球員為了在國家隊爭取更多上陣機會選擇離開曼聯重返阿積士, 都可以話是一個正確的決定, 寄望他在阿積士能夠繼續發光發亮。

隨文附送白連特對利物浦時的精彩入球:

 

Konan King

[WKD之曼迷周記]-總結(讀者投稿)

投稿至今啱啱好第二十篇文章, 寫完之後會好似班曼聯球員咁暫別一陣。 多謝Royce Sports一路俾好大自由度我寫野, 請大家繼續向身邊嘅紅魔鬼分享呢個咁有心機嘅專頁! 講返曼聯, 漫長嘅球季終於落幕, 有無諗過今年我地會經歷咁多高低起伏? 只講數字摩連奴同雲高爾係聯賽嘅成績無甚分別, 但球隊上下嘅表現出黎嘅信心同鬥志, 你又感唔感受到?

 

 

返翻去八月, 摩連奴接手, 米希達恩、普巴、伊巴強勢加盟, 單單係呢啲新閒已經令我地深信今年一定可以重返爭標份子嘅行列。 我份人一向都唔鐘意太樂觀, 而且我認為當時曼聯要解決嘅問題並非人手不足, 而係點樣將陣中一啲有質素嘅球員打返起。 另外我最擔心嘅就係摩帥究竟會點安置朗尼呢位逐漸走下玻嘅隊長。 經過左大半年, 我就非常滿意佢係呢兩個問題上嘅處理方式。 曾經以為走硬嘅馬達、 買返黎雪左幾個月嘅米希達恩、甚至加盟咁耐就俾人罵足咁耐嘅費蘭尼, 都一一搵返屬於自己嘅位置, 係戰術入面發揮到最擅長果瓣。 至於朗尼, 佢無再獲得優待場場踢足, 而要同其他球員一齊爭取正選, 呢個做法對任何人都有利無害, 朗尼嘅狀態亦都回復返些少。

 

 

季初中場有人滿之患, 加上普巴太全能嘅關係, 曼聯無辦法搵到一個攻守平衡, 分工清晰嘅陣式。 迪比、 小豬、舒拉達連證明唔到佢地係摩連奴需要嘅人,只能相繼離開。 以普巴為核心既中場出現過好多組合,但曼聯仍然唔知點先踢得出水準,係呢個過程我地失左好多分,爭標變為爭四。季尾終於見到佢地好清楚自己崗位,開始培養出執行戰術嘅紀律,起碼證明佢地方向正確,來季應該會更加進步。

 

 

依家嘅曼聯有一點仲未比得上摩連奴以前執教過嘅冠軍球隊,就係佢地領先時轉踢守勢波時會非常唔自然,彷彿適應唔切當下要點樣執行防守工作,中場線縮得過後但企位缺乏一致性,反而造成更多漏洞。相反,如果一落場就以守代攻,佢地絕對可以踢出高效率嘅穩守突擊,完勝車路士就係最佳例子。第二季再無藉口賴默契不足,可唔可以成為銅牆鐵壁就睇班球員造化。

 

 

攻力方面我地見證住曼聯由中路塞車到兩閘兩翼解放,由只靠伊巴柱躉到福仔連加特以速度致勝,慢慢踢出呢個進攻班底應有嘅多變性。令人在意嘅係幾位年輕鋒將同伊巴嘅實力、經驗同風格差距始終太大,即使後者留隊都應該簽多一位制空力強身位好,而非基沙文呢類突破型前鋒,咁先可有更加彈性嘅變陣,否則可能要繼續推費蘭尼上去做替工。

 

成績只能反映現況,而一個領隊係球會裡面仲有無將來就取決於佢得唔得到球員嘅信任。一旦無法認同領隊嘅管理手法或者足球哲學, 佢地就好難為球隊賣命, 甚至乎會搞更衣室政變, 球會再俾更多嘅時間都係徒然。 當年莫耶斯及雲高爾無一幸免, 車仔年代摩連奴都曾經深受其害。 今季迷茫嘅時間唔少, 但解決難題唔再只係領隊嘅責任, 全隊都非常拼博同積極。 摩連奴會犯錯, 試嘅戰術亦失敗過, 但再試下一個戰術時球員依然充滿信心, 甚至努力爭取正選希望成為變陣成功嘅一塊拼圖。 留係一隊入面嘅人, 每一個都被告知有機會上位, 淨係呢份令球員之間良性競爭嘅影響力, 已經肯定左摩連奴今季嘅貢獻。 來季要贏更多獎盃!

[WKD之曼迷周記]-衝線(讀者投稿)

隊長朗尼捧起歐霸盃,曼聯奪得近年首個歐洲錦標!六十四場比賽後,球隊終於走完滿途荊棘嘅球季。呢個獎盃唔單止肯定左球隊過去一年嘅努力,更可以藉此將正面力量帶翻去剛受恐怖襲擊嘅曼徹斯特市。關鍵時刻足球就會團結人心,The city is united!

 

李奧費迪南話呢場唔係果種賞心悅目嘅決賽,但曼聯跟足賽前部署去踢就獲得確確實實嘅勝利。阿積士球員可能心有不甘,認為自己積極進攻嘅風格應該值得更好成績。事實係曼聯太早取得優勢,以慢打快令阿積士愈踢愈漉,正中摩連奴下懷,球賽就跟住佢預想中嘅發展下結束。如果話曼聯消極應戰,不如話阿積士未能將曼聯迫到要傾巢而出嘅絕境之中。

 

過去幾場波我都將焦點放係防守方面,一係因為前場球員選擇唔多而且狀態飄忽,攻勢依靠個人突破多於組織; 二係因為踏入五月後,球隊有一個明顯改變:放棄控球。曼聯今季一直擁有極高控球率但往往未能全取三分,可能亦因為咁佢地嘅防守專注力完全未達摩連奴要求,失左好多可以守得更好嘅無謂波,更唔好講要泊出一架有效率既大巴。

 

「進攻唔得,就更加要做好防守先!」就係我對摩連奴嘅認知。

 

仲記得對熱刺時早段先失一球仍然保持極深嘅中場線,若無其事咁繼續防守反擊,今日回看(馬後炮)可能另有玄機。同一戰術輸埋俾阿仙奴,但返去主場閉幕戰依然以防守為重點課題。呢幾場波嘅娛樂性不大,但俾機會一眾甚少主守嘅中場熟習無波在腳時嘅工作,同時迫使前場習慣要係以寡敵眾嘅情況下做出正確決定。最顯然易見嘅改變就係中場無再因為心急而係危險位置犯規; 反擊唔再拖泥帶水,盡快分俾前鋒由佢地嘗試闖入禁區,直接威脅門將。

 

黎到決賽,兩個入波都帶幸運成份,但阿積士亦要負上唔少責任。先有加利臣嚴重甩位令普巴有機會起腳,第二球角球阿積士有七名防守球員但盯唔住四個曼聯球員。整體進攻方面如同成個五月一樣,唔華麗唔壓倒性,馬達, 米希達恩做足基本工作,但始終未夠弗。

 

邊路中場唔得, 咁Plan B呢? 失去伊巴之後,拉舒福特少左一座高塔為佢做二傳,挾制中堅。費蘭尼今場將呢項職責發揮得淋漓盡致,十五次高空搶點成功為全場之最。相對佢缺陣嘅時候,福仔可以專注突破之餘,每次由費蘭尼拎波之後,仲可以比平時多出三幾秒走位。慳十五次騰空嘅氣力換黎幾十秒嘅無球走動對一個前鋒黎已經非常緊要,何況後期阿積士都無再浪費力氣係空中戰博鬥,寧願等個波落返草地先進行迫搶,反令曼聯踢得更輕鬆。費蘭尼係我嘅MOTM,因為佢除左助攻之外亦有做好防守工作,無令普巴同靴里拉陷入苦況,更加無好似之前咁不斷無謂犯規等人有機可乘。奧雲話佢嘅技術層面同踢法都稱唔上一個典型嘅曼聯,但我覺得佢有鬥志有態度就已經夠哂資格做紅魔鬼,半年前又有邊個估到佢可以重拾愛華頓時期嘅威風?
 

 

後防方面,因為白蘭特信心同狀態不足,而且鐘斯係最後幾輪英超都夥拍史摩寧,賽前我一直認為佢唔會爭到正選中堅一席。但今仗佢同達米安係左路守得非常好,展現出佢對母會阿積士嘅踢法好熟悉之餘,整場賽事都踢得好淡定。當然亦要歸功於教練團隊嘅賽前分析,睇穿對面不擅高空攻勢先會有咁嘅安排。

 

今場波每一個球員都嚴格執行到教練指示,勝利比八強四強更加有說服力。用左一年時間,大部份球員搵到自己嘅定位係邊度,踢出黎就變成一個十一人嘅團隊,咁嘅結局我地點會唔收貨?


 

下季隊波變成點無人知,但肯定嘅係曼聯一定會有力挑戰皇馬/祖記,以贏歐洲超級杯為目標!

 

 

[WKD之曼迷周記]-連環失波啟示錄(讀者投稿)

入正題之前,想係度同受病魔折磨嘅Bradley Lowery打打氣。平時球迷會為左愛隊拗個你死我活,但關鍵時刻足球必定會透過影響力黎團結人心,令有需要嘅人得到力量。呢位小朋友病情反覆,大家唔好吝嗇對佢嘅支持,佢先可以更堅強咁繼續接受治療。另外希望普巴可以捱過喪親之痛,重返球隊。

 

 

主場迎戰切爾達,我地差啲空手而回。早段明明有拉舒福特妙傳費蘭尼輕鬆頂入,只要再下一城就幾乎可以鎖定勝局。今季當然唔會咁輕易就過關,球迷們一於坐足九十分鐘過山車。雙方再次互有危險進攻但未能轉化為入球,切爾達決定放手一搏全面進攻。八十五分鐘隆卡里亞頭鎚追和後,曼聯球員面臨極大心理壓力,只能泊出一架唔算穩陣嘅大巴。要不是曼城棄將加迪提最後一腳撻大Q,出局嘅就係我地。

 

 

切爾達兩翼威脅性高,曼聯算係踢出預想中嘅防守戰術, 對方想落底線出波有一定難度, 即使切入中路都只能遠射, 反而幫左羅美路練手感。 唔知切爾達係咪參考左阿仙奴果場波, 次回合反而更加直接放高波入禁區爭頂。 尤其係左路嘅白蘭特同達米安, 俾人壓住黎頂固然關體格事, 但更值得檢討嘅係佢地多次俾人搶點, 甚至走甩哂目標,眼白白睇住人頂波。 果球失波相對上已經係守得好,只係拜利來遲半步。

 

 

作為白鹿徑球場閉幕戰嘅球隊,曼聯都算幾唔俾面。出場陣容由後備,復出球員同新秀組成,最有睇頭已經係史摩寧同鐘斯。佢兩個復出無耐,但幾肯定會係歐霸決賽嘅正選中堅,以佢地對阿仙奴嘅表現黎計,相信羅美路都有排忙, 所以摩連奴要佢地連續上陣餘下比賽,務求盡快提升狀態。由阿仙奴到修咸頓佢地的確有進步到, 但始終有唔少甩漏, 好難俾到穩陣嘅感覺我地。 要佢地復出無耐就弗返哂係苛刻左少少, 但決賽已經殺到埋身, 迫出黎啦!

 

今期比較下兩個最近失嘅波。

 

阿仙奴入嘅第二球, 張伯倫出波之前兩秒, 其實史摩寧已經留意到鐘斯望波望到甩哂位。 但佢選擇做嘅唔係嗌鐘斯搵返要盯住嘅目標, 而係離開自己個目標一步, 就係呢一步令韋碧克再次倒戈有波入。 呢球就係果種完全可以透過溝通而改善啲嘅防守。

 

對熱刺輸嘅第一球高空波, 就可以話係個人防守力嘅不足。賓戴維斯球波出得好靚, 但朗尼判斷錯誤走前一步結果跳空亦係事實 (其他隊友都跟足哂對手)。 兩球都係Free Header, 但原因同治本方法可以好唔同。

 

自從伊巴同洛荷收咧後, 傳中同死球再次威脅到我地嘅後防, 唯有寄望費蘭尼同普巴可以早少少回防, 起碼多一兩個大隻佬爭頂執漏。

 

小將又有咩表現? 今仗杜安沙比出任防中,盯實艾歷臣嘅工作做得還好,無乜犯下大錯。此子防守紀律抵讚,無因為身形或波底好嘅關係而作出多餘動作; 其次佢嘅位置感不俗,係中場踢得幾自然。

季前熱身賽時佢比我嘅印象係一個識用波,動作靈活嘅後衛,佢等到機會踢英超嘅時候,仍然表現克制,無急於表現自己。黎緊佢應該會逐步嘗試執行更多更複雜嘅指令, 但呢一刻我已經感受到果種青訓紅魔嘅味道, 就係團隊精神十足, 一落場就好似同班老大哥夾左好耐, 知道球隊需要佢做好咩職責咁。

 

下週出文之時已經完季, 我地捧住個杯返黎再講!

[WKD之曼迷周記]-直路(讀者投稿)

作客切爾達前終於等到一連串嘅喜訊,就係一眾傷兵已經重返練習場上,當中包括史摩寧同鐘斯,而普巴亦可以正選上陣重組中路鐵三角。中路齊人之時,左邊又多返兩名十字軍,梳爾韌帶受損球季再度報銷,楊格拉傷大腿肌肉。睇黎下季要認真考慮買個即食又夠班嘅左閘,不過有乜野等我地完季出埋張成績表先再講!

 

 

 

呢場波雙方都有唔少入球機會,但無一球生波把握到。係呢度想讚下摩連奴對羅美路嘅器用。羅美路上季加盟後一直鮮有出場機會,尤其當曼聯擁有迪基亞呢位世界級門將嘅時候,好多人都認定羅美路會係另一個古斯鍚/連迪加特。雖然今季佢只係聯賽上陣過一次,但歐霸成為左佢嘅舞台。出場機會增加對門將嘅穩定度有重大嘅影響,除左無以前咁怯場同大意失誤之外,接波技巧同指揮防線方面都有唔少進步。一個球隊要有兩個狀態好嘅門將唔容易,佢既進步亦令到迪基亞明白後有來者,一唔集中就會被取代。若果能夠打入歐霸決賽,我都希望羅美路正選上陣。

 

 

 

當隊友頻頻失機之際,拉舒福特憑住妙絕嘅罰球幫曼聯拎住一個作客入球返去踢次回合。有人將佢呢腳直彎遠柱嘅射門同當年碧咸收死愛華頓果球比較,似得黎我相信佢都真係有參考過,畢竟佢每日加操苦練罰球又係百分百曼迷,點會無研究過大師兄嘅七旋斬呢?

 

 

 

如果唔係連加特同米希達恩連番失機,曼聯晉身決賽可能已經毫無懸念。連加特季尾不時轉踢前鋒,究竟佢係呢個位置上有無潛質?

 

論最後果腳嘅把握力,今季佢同拉舒福特都未夠好,但兩者最大嘅分別在於判斷力同閱讀球賽能力。拉舒福特多數係射得唔夠靚或者對面龍門上身,但連加特果種失機係心急導致誤差或做錯決定。今季唔少次見佢明明無人迫都急住起腳,踏唔順腳步就拉弓結果連龍門都唔中 ; 前面隊友仲有更好嘅機會,但無抬頭望過無考慮過就起腳遠射。同一情況下福仔可能都會照射,但就睇得出佢了解過衡量過其他選擇而作出決定。

其實連加特一樣有過人之處,就係無論球隊踢緊順境逆境波都好,只要控球在腳佢就會好有信心突破防線,一啲都唔猶疑亦唔會放軟手腳,係侵略性同自信方面同蘭尼非常相似。佢係邊路嘅時候會好自然地掌握到隊友嘅位置,周不時交到靚波又或者做One-two, 佢同福仔既默契亦會令後者踢得生好多。值唔值十萬鎊週薪就未知,但曼聯同英格蘭嘅正選翼鋒位佢係絕對有機會爭到架,最好就改善埋射術同埋玩少啲Twitter啦!

 

 

 

今期無乜篇幅講對阿仙奴嘅賽事,始終摩連奴嘅排陣已經說明左要休養主力去應付四強次回合嘅比賽。輸,唔係話無所謂,上陣嘅球員其實有實力亦有機會可以係酋長球場全取三分,但自己踢得唔好又怪得邊個呢? 經過呢場波我期望個別球員嘅比賽狀態會有所提升。雖則已經黎到季尾,但表現唔好嘅可能分分鐘會俾人掛牌,因為摩連奴都係鐵腕政策,對懶散嘅人絕不手軟! 兩位新兵踢得幾好,希望黎緊有更多機會上陣,等我地呢班球迷睇多幾場先分析都未遲。

 

 

過埋切爾達就可以係瑞典踢決賽,果度將會變成曼聯嘅主場,伊巴等緊我地。

 

[WKD之曼迷周記]-法寶盡失(讀者投稿)

呢個星期可以話係一個好嘅消息都無, 唔需要識波都睇得出最近曼聯踢得好差,但我唔會怪球員,因為我見到佢地攰得黎有盡力; 我更加唔會怪領隊,因為就算佢再諗到啲咩驚世戰術,呢十三四個球員都無咁嘅體力去執行。當一個球隊前中後嘅必然正選都傷哂嘅時候,你只可以調整期望,陪隊波捱到尾。摩連奴個百寶袋已經掏空,相信要放棄競逐聯賽。

 

打呲戰我就無睇到直播,但單憑精華片段同數據都可以估到成場賽事嘅發展。三成控球率一次中框埋門,除左靴里拉一次無人看管但門前頂斜之外,其餘時間都係死守求和。

唔單只阿古路比左好大威脅白蘭特,後備入替嘅新星捷西斯一樣搞到我地後防滿城風雨。九十分鐘任務完成,但就付出左好大同不必要嘅代價,令之後嘅路更難走,呢次真係蝴蝶效應。

 

Foto-Wasit-Martin-Atkinson-memberikan-kartu-merah-kepada-gelandang-Manchester-United-Marouane-Fellaini_-Paul-ELLIS-AFP_jpg-640x359.jpg

 

事件始於費蘭尼尾段拎左一個黃牌後再次犯規,阿古路挑釁之下大家頭撞頭,球證理所當然認為高嘅一方有錯,直接出示紅牌趕佢出場。為左要保持防守力而換入嘅科素文沙,亦係最後一次防守受傷提早收咧。對史雲斯嘅出場陣容,幾乎係唔洗估,因為無得揀咁滯。

 

對史雲斯嘅上半場簡直係慘不忍睹: 居然俾一隊要爭分護級嘅球隊猜住黎踢,仲要不乏驚嚇場面,加上梳爾幾分鐘就傷出,成班好似等半場入更衣室聽教練指示咁。連旁述都話好少可踢左廿幾分鐘先第一次嗌靴里拉個名,可想而知我地嘅控球質素。

上半場尾段,拉舒福特接應直線引到對面門將出迎,當時球證視線受阻,佢插水成功,呃到一個十二碼。可能球隊形勢太差令佢有此一計,但插水有失體育精神,尤其佢俾外界嘅感覺一直都係謙虛勤力誠實嘅年輕人,難怪唔少名宿都覺得好失望。福仔,唔好走上呢條不歸路啊...

 

 

 

領先優勢最後由施古臣嘅罰球抵消,各執一分。至於果個罰球,正好反映左曼聯球員之間嘅溝通問題。

靴里拉本來想企近柱以防罰球彎過人牆,史雲斯前鋒洛蘭特趁機走前,原本守佢嘅華倫西亞無跟上,迪基亞見狀就立即嗌走靴里拉,事情發展到呢度仲未出事。問題就發生係靴里拉返去嘅時候拍埋人牆度,果個位置原本無人做反人牆,迪基亞可以好清楚見到個施古臣同個波。我唔敢講如果迪基亞見到佢起腳動作就一定救到球世界波,但至少唔會連撲波嘅反應都無。

 

 

 

費蘭尼缺陣令到我地連制空權都喪失埋,洛蘭特成場波壓住我地一對中堅黎踢,黎緊呢幾場硬仗唯有以速度制勝,但我地仲有幾多人快得起呢? 切爾達雖然名氣不大,但唔好忘記我地曾經係歐霸俾當時坐擁靴里拉同洛蘭特嘅畢爾包踢出局。

 

 

唔奢望曼聯可以華麗地贏哂餘下嘅賽事,但只要集中精神一定可以穩穩陣陣殺入歐霸決賽!

 

[WKD之曼迷周記]-踩鋼線 (讀者投稿)

 

就係交左一篇嗌球員咬實牙關嘅稿之後果晚,洛荷同伊巴同場收咧。洛荷需要養傷五個月,而伊巴好可能已經踢左佢為曼聯最後上陣嘅比賽。我地梗係好傷心,但球隊無時間沉淪係呢種情緒之中。既然後無退路,就用盡手中嘅球員,行去鋼線嘅另一端,為兩位今屆咁出色嘅表現爭取佢地應得嘅成績。

 

最近兩場比賽娛樂性比之前大減,但總算有驚無險咁晉級。踏入後費格遜時代嘅曼聯,無論由邊位教練帶隊,係歐洲賽嘅成績退步左,進攻都無以往咁流暢咁華麗。有時面對歐洲二線球隊都只可以踢成五五波,甚至失分而回,都咪話唔失望,大大打擊左我地週中捱夜捧愛隊嘅決心。

歐霸八強返到奧脫福,以為可以食住個勢大炒安德烈治,點知繼續俾體能同傷兵呢兩隻惡魔纏繞住。早段憑米希達恩先開紀錄之後一直未能將比數擴大,而客隊一直靜待入球機會,兩回合都能夠將反擊有效轉化成威脅,甚至入波。

反觀曼聯被追和後,錯失左好幾個黃金機會,要去到加時階段先射入到致勝嘅一球,好彩福仔去到果個階段仲有想像力同夠冷靜"CUP"過後衛射返近柱,但都間接造成左伊巴嘅嚴重受傷。

至於失果球波,全隊都絕對值得吹風筒式訓話。成條中場回防慢不特止,俾對手起到腳後雖然由羅美路加條門柱救出,但竟然無人係六碼點幫手解圍,人地門前執雞一刻,鏡頭見到大部份防守球員企係禁區頂舉手搏旁證舉越位旗。

 

 

作為一個後衛,最洩氣嘅唔係俾人射入世界波,而係失啲因為欠缺防守紀律而造成嘅入波。今季已經唔係第一次見到呢種失波,黎緊一定要戒左輕敵,防守鬆散嘅惡習!

 

至於對般尼嘅客場賽事,又踢得出乎意料地穩陣。呢場彷彿見到以前嘅車路士咁,攻勢未必浪接浪,但入完一球之後就成隊縮後一格,直頭連控球權都唔搶,拖慢節奏保留體力。

馬素爾終於重返正選行列,出任正前鋒仲交出左一入波一助攻成為贏波功臣。睇得出佢仲未回復翻上年果種自信,但呢場波對佢一定有好大幫助,正如福仔前排一樣陷入低迷,最近都慢慢係球場上搵返自己,比之前敢於突破同多左嘗試唔同踢法。

 

 

久違嘅隊長朗尼都有斬獲,而且全場都有指揮住隊友,尤其係普巴,免得佢又令球隊愈踢愈急自亂陣腳。係而家傷兵滿營嘅時勢,可唔可以再次靠佢擔起頭家呢?

 

 

 

最新消息指普巴都無法上陣曼市打呲,難得磨合成功嘅中場鐵三角又遭強拆。歐霸已經殺入四強,聯賽又因為利物浦失分而再次有希望打入前四,就算而家幾缺人都無原因要放棄共中一邊,就當係俾呢班球員嘅一個大考驗。

 

 

 

有球迷覺得最近曼聯士氣受挫,計我話班球員而家係雄心壯志先啱,因為佢地要將獎盃交到伊巴同洛荷手上,Giving up is not an option!

 

 

 

[WKD之曼迷周記]-重要嘅勝仗(讀者投稿)

對車路士開賽前公佈出場陣容,竟然連伊巴都唔出,仲要久未上陣嘅楊格做隊長。朋友Whatsapp問我曼聯係咪已經放棄左聯賽前四專注歐霸,我只係答左句"睇下摩連奴呢鋪賭唔賭得中"。我都係普通球迷,見到咁嘅名單,仲要係排出之前發揮得麻麻嘅雙鋒陣,真係又驚又期待。驚,係因為呢場一輸,佢必然會受到口諸筆伐,要為排陣失誤而負上全責; 期待,係因為我肯定即使佢要放棄聯賽, 就憑佢同車仔嘅恩怨情仇,都一定唔會揀呢場黎認輸。

 

 

開賽無耐,球評家同旁述已經知道曼聯想複製足總杯僅負車路士嘅戰術。果場比賽係靴里拉領紅被逐之前其實一直守得好穩,亦都有高效反擊,今次決定照辦煮碗真係押上左佢嘅判斷。泊大巴係會令對方好難起腳,但今場曼聯直頭瓦解左進攻嘅源頭,一切由中場開始.

 

中場嘅部署非常明顯,中路採取人盯人戰術,利用普巴同費蘭尼嘅身體質素,分別令到干堤同馬迪無時間上腳,繼而減少佢地向前傳波嘅次數。而靴里拉就負責夏薩特,不過佢靠嘅係閱讀球賽能力,集中力同體力。用一次防守去解釋佢全日嘅任務: 夏薩特見勢色唔對打算走位甩開佢,曾經由本來嘅左翼位跑返去中圈,前插入禁區頂再上去右翼,全程二十幾秒,靴里拉形影不離,永遠係兩個身位以內。

 

 

 

千析唔好以為人盯人好容易,因為跟住對手走動嘅話,隊友嘅防守範圍一定會不斷改變。好似以上例子咁,靴里拉一離開邊線,左楊右華就要相應地回防填補空位,我諗摩連奴就係睇中左楊格協防嘅判斷力同埋速度所以先突然間用返佢。同樣地,曼聯嘅陣式係九十分鐘內不斷係雙中堅同三中堅之間轉變,講求嘅係全隊嘅集中力同合作性,心水清嘅球迷會發覺好耐未見過成條防線有咁多提場咁多溝通,呢個絕對係致勝關鍵!不得不提嘅當然有一樣緊盯右翼柏度嘅達米安,仲有成場夾擊哥斯達嘅中堅孖寶拜利同洛荷。佢地嘅努力令車路士繼零七年後第一次錄得全場零中框射門,夏薩特更加連一次過人嘅鏡頭都無。

 

 

 

進攻嘅套路嘅係左楊右華係兩邊放長波俾連加特同福仔,企位似兩翼用黎拉空車仔三個中堅之間嘅距離,踢落會見到一個係邊線等餵波另一個就移入中路做中鋒。兩個人踢三個位,體力消耗當然大啦,所以後段兩位處理快攻都顯得力有不遞。但拉舒福特今仗踢出信心,唔單止入左球教科書式嘅破越位半單刀,五五波同雷斯拍埋一啲都唔輸蝕,有幾球仲差啲搶到。黎到季尾伊巴都有嚴重嘅體力問題,拉舒福特如果可以搵返射門感覺,摩連奴一定敢用佢做plan b,甚至係plan a!

 

 

 

呢場勝仗同球迷證明佢地絕對夠料擊敗最強嘅球隊,亦幫自己打左一支強心針。更加重要嘅係,佢地一定要用呢場嘅表現去警惕自己,唔可以再好似踢歐霸咁懶散咁漫不經心。你地話啦,如果黎緊每場都有今晚嘅鬥志同決心,我地有咩可能會入唔到前四?

 

 

 

遲到好過無到,咬實牙關贏到季尾不是夢!

[WKD之曼迷周記]-繼續讚, 繼續彈(讀者投稿)

[WKD之曼迷周記]-繼續讚, 繼續彈(讀者投稿)

 

終於重回勝軌,三球輕取護級球隊新特蘭。今場當然有抵讚之處,但主要係因為黑貓真係踢得太差喇,再咁落去領隊莫耶斯準備四年內三度被炒魷。

 

 

新特蘭無效仿西布朗局部壓迫嘅踢法,反而指示球員向曼聯整個中後場施壓,我認為係幾不智。只講個人技術曼聯當然高一班波,新特蘭嘅中場幫忙堵住後面都吃力,仲點敢壓上去大範圍迫搶呢?結果得兩個前鋒去追六個曼聯球員嘅傳球空間,嘥力之餘又得唔到回報。

呢場波中場咁多空間上腳,調整節奏,仲有時間等埋隊友走位先甩個波,就知道莫耶斯捉錯棋。

 

曼聯排出倒三角嘅中場中,普巴同費蘭尼成為左靴里拉嘅高強度屏障,直接解放左佢嘅活動範圍。係缺乏馬達嘅致命直線下,靴里拉嘅活力都係一把唔錯嘅武器,何況米希達恩都需要搵人做短傳接應。

 

 

呢個戰術嘅另一特點係無論普巴同費蘭尼都會刻意地限制自己係前場嘅活動。

以往總會見到普巴盡量參與每一個攻勢,想為球隊交出致命傳送或者係直接埋門,但亦曾經多次因為心雄而失去控球權自亂陣腳。呢場見到佢非常清楚自己嘅崗位,無過份上腳令自己陷入危機之中,仲好留意住自己同靴里拉嘅距離,務求做到第一個支援佢幫佢解圍嘅隊友。

費蘭尼係三人之中已經企得最前,但亦有執行好自己嘅任務,除左偶爾走入十八碼點提供傳中嘅選擇外,大部份時間都留守係三十碼嘅區域。

靴里拉今場踢得咁生,其實係因為同隊友交換左無名英雄嘅角色。佢閱讀球賽嘅能力同卡域克不相伯仲,而且仲可以插入禁區助攻,要佢演活中場大腦嘅角色,佢合格有餘。只要有足夠嘅保護,或者下季買入到一個純防中,相信佢會愈黎愈多機會。

 

 

 

講到咁犀利,其實頭兩個入波都係單靠個人技術,呢個戰術可以走到幾遠就要受多啲考驗先再下定論。相反,對住新特蘭呢隊榜尾波都睇得出有好大改進空間。

 

獲外界高度評價嘅拜利,攔截準硬淨腳下功夫好,成個大隻版李奧費迪南咁,但我就認為佢同李奧仲有一段距離。今場佢又同門將羅美路有一下誤會,雖然無造成失波,但有今季有一路睇波嘅話都知道呢種情況出現過好幾次,當中包括識聽佢講西班牙文嘅迪基亞同靴里拉。

如果佢要成為後防領袖,必先要係溝通方面下苦功,否則單對單有幾叻都係徒然嘅.

 

另外一樣抵罵嘅係,當球隊領先二比零,去到六十分鐘嘅時候突然間失去集中力,無論攻守都踢得好求其,兩三次人多打人少嘅機會都把握得好差,差到連射門都構成唔到。一直坐係教練席嘅犘連奴終於忍唔住出黎嗌醒班球員,同時換入要爭取表現嘅馬素爾同拉舒福特,隊波先重新積極起黎。最後福仔都打破接近兩個月嘅入球荒,幫紅魔錦上天花。

 

 

四月最輕鬆嘅日子已經過去,曼聯究竟會雙線博盡定係作出取捨,就睇下今個星期主場贏唔贏到車路士。我地狀態固然未夠好,但係奧脫福咩事都有可能發生!

 

[WKD之曼迷周記]-困局(讀者投稿)

[WKD之曼迷周記]-困局(讀者投稿)

 

前兩週講過嘅攻守問題幾乎中哂,唔係筆者醒目,而係其他球隊已經識用針對性嘅踢法去守波。每個領隊都參考翻上一隊波係奧脫福拎分嘅戰術,再根據球員實力加以調整同強化,只要曼聯解決唔到信心問題,人地只會愈守愈輕鬆,此謂不進則退。

 

 

 

星期日晚對西布朗,我本來就比一般曼聯球迷悲觀。西布朗從來都唔係前列分子,陣中亦無咩大球星,就咁提起隊波可能無咩人會覺得有威脅,但其實佢地發揮非常穩定,仲啱啱贏埋阿仙奴。

佢地嘅最強武器唔係球員,而係領隊普利斯。佢能夠將手上嘅球員用盡之餘,亦可以以有限嘅資源踢出成績同風格。摩連奴離開車路士之前曾經講過,如果佢係一個英超球會嘅班主,一定會搵普利斯做領隊。

 

 

戰術上,其實上半場已經分出勝負。西布朗嘅部署非常簡單直接,只做好防守就足夠。點解佢地可以做到滴水不漏? 除左係曼聯狀態不佳之外,最主要係普利斯用左最少嘅氣力去有效阻擋紅魔嘅組織。曼聯係缺少左普巴,靴里拉同馬達嘅情況下,惟有起用卡域克同費蘭尼踢平排中場。

 

 

對面嘅中後場如常地防守,亦唔怕你單對單突破,唯一要額外執行嘅指令就係比壓力呢對中場,明顯見到呢兩位球員一拎波就會俾人迫搶。普利斯就係睇中拉舒福特,連加特等人嘅判斷力同視野較差嘅缺點,而將防守重點放係會交靚波俾佢地嘅球員身上。

費蘭尼努力嘗試為卡域克做掩護但唔太成功,馬素爾同米希達恩亦都做唔到咩組織,結果曼聯又再一次踢唔出節奏。

 

咁嘅上半場已經嚴重打擊成隊波嘅信心,之後嘅表現都係預計之內。呢場係近半年進攻最無板斧最悶嘅一場波,大部份嘅射門都係來自禁區外。

戰術有好多可以批評嘅地方,例如要福仔踢伊巴嘅角色根本係不切實際,前者既然唔夠對抗性踢柱躉做二傳同爭身位,就應該安排兩翼比平常接近中路,多做配合而唔係要佢單打獨鬥然後浪射。不過球隊嘅信心問題先係癥結所在。

 

 

 

呢個星期有好多細微位都顯得球員嘅唔集中,心急,而呢啲野係會堆疊埋一齊的。由迪基亞下半場一次失誤差少少將一個無威脅嘅射門撲入網,到對愛華頓時各人嘅甩漏愈黎愈多; 由米希達恩射失半單刀,到靴里拉嘅門前擦楣。早前辛辛苦苦建立嘅進攻體系,因為幾個重心球員嘅傷病而瓦解,即使佢地而家全部可以上陣,隊波都要重新上路。

但足球就係咁,何況無利用輪換黎增強後備球員嘅信心同狀態都係原因之一,今日嘅果唔係淨係用'唔好彩’就解釋到嘅。

 

 

 

當下我地無時間去回顧球場內外嘅每一個決定,因為四月真係好難踢,唯一可以做嘅係盡快做好下一場賽事嘅準備功夫。摩連奴公開批評好幾位球員嘅表現同心態,我希望佢係為左激勵呢班後生仔而咁講,佢地亦要知道而家球隊能夠贏波係佢地最重要嘅工作。

 

成日和波對我黎講都好失望,唔想面對, 唔想落筆去分析場賽事,何況有份踢嘅球員? 但而家無時間灰心架啦,唯有Show our support,信佢地可以季尾反彈!

 

[WKD之曼迷周記]-錯的是時間 - 舒韋恩史迪加(讀者投稿)

2015,舒韋恩史迪加以世界盃冠軍前隊長嘅身份加盟,心諗:條中場有救啦!

 

2017,曼聯真係進步左好多啊,不過佢就準備以失敗收購之名離開英超。

究竟係邊度出錯呢?

 

當年轉會消息一出,我地都以為佢會好快融入球隊,幫曼聯盡快過渡調整期。小豬踢法似邊個?小學生都識答卡域克啦。卡域克擅於轉守為攻,閱讀球賽能力係英人之中數一數二,英超少有嘅墮後造波中場,佢算係代表架喇。

 

 

 

係我嘅認知入面,小豬係卡域克嘅強化版。踢拜仁時佢擔當類似角色,但拜仁傳球速度更快,對自身嘅傳球能力,視野同走位嘅要求更加高。加上德甲實力懸殊,佢面對泊大巴嘅資深經驗應該可以幫到唔識踢陣地戰嘅曼聯掛。

 

 

無錯,佢穿起紅魔波衫嘅時候都踢得出以上強項,但咩原因令佢加盟半季就開始失去正選呢?

 

 

撇除傷患因素,同隊友無默契係致命傷。佢落場嘅時候果然係踢串連中後場嘅指揮官角色。相比卡域克,佢踢法更加瀟灑,多次面對夾擊都可以從容咁交俾隊友或者帶翻生個波,而且仲成日俾到一啲靚直線添。相對地,佢進取嘅踢法需要其他隊友配合,否則就會冒更大嘅險。中場除左馬達同靴里拉會知佢點交波之外,其他隊友好多時就唔知點走位而企係到睇小豬個人表演。就算佢能夠突圍而出都好,進攻嘅空間仍然好窄。

 

 

最常見嘅例子係左右閘唔敢走上前同搵定傳球路線,留係保守位置接應小豬傳送嘅時候,對手已經壓到埋黎,結果又要回後,重新組織過攻勢。對手洞悉呢個缺口後更加唔怕壓上去迫搶,久而久之,小豬需要更多隊友掩護同做Dirty Work先能夠上腳分波。靴里拉就係喺果陣開始轉型,做多左攔截去保護中後場嘅控球空間。某程度上,佢適應唔到英超嘅節奏。

 

 

 

其實佢嘅表現已經唔算太差,只可以話時辰八字唔夾。

係當時正值低迷嘅曼聯黎講,就算你放個施丹落去都未必幫到幾多,因為佢地缺乏嘅係信心,而唔係有質素嘅球員。你見到好多今日仲在陣中嘅球員,個個都好積極咁搵空位,快上快落充滿娛樂性。但你仲記得嘅話,低潮時佢地一場波都交唔到十個First Touch,空哂都唔敢轉身或者推多幾步,因為驚失波俾人打反擊,試問佢又點可以靠一己之力解決呢個問題呢?

而摩連奴接任至今,成個中場嘅踢法已經改變左好多,亦都睇得出佢想用年輕少少嘅球員做未來幾年嘅骨幹。小豬有幾專業幾勤力無需再多講,但狀態再好都無用,因為戰術上已經再無佢嘅位置。殘酷嘅事實係,加盟果陣佢無做到救世者,今日紅魔開始復甦啦,我地又要同佢道別。

 

"遲左十年嘅收購"本來係形容曼聯終於買到小豬嘅喜悅,黎到今日,變成了可惜。好多人同我一樣咁諗,如果佢早十年加盟,真係好可能成為另一個紅魔傳奇。

 

多謝你一直好正面咁影響球會上下同埋球迷,祝你係新球會繼續發熱發亮!

 

[WKD之曼迷周記]-向前看(讀者投稿)

[WKD之曼迷周記]-向前看(讀者投稿)

經過大半季嘅磨合,摩式踢法愈見清晰,球員對戰術了解度慢慢熟悉。新年過後嘅球賽,唔單止戰術劇情類近,連勝負關鍵都係取決於落場執行力同扭轉乾坤嘅能力,相信同一套踢法係黎緊嘅日子會遇到更多針對性部署。

 

人腳,足球哲學,教練都齊哂喇,曼聯爭啲咩先可以更上一層樓,重現冠軍球隊嘅風範呢?

 

首先要解決嘅係鋒線問題。一騎當千嘅伊巴今季免費加盟,完美演繹正宗九號中鋒嘅角色,佢以其世界級嘅射手本色帶領曼聯係四線比賽取得成績,但代價係馬素爾同拉舒福特。對年輕球員黎講,出場時間就係成長嘅絕對條件。過往不乏有潛力嘅新秀因為長期坐冷板凳而令實力停滯不前,近年就有戴菲同比拉希奴兩個典型例子。

摩連奴俾兩位超新星嘅訊息同對待遇一樣: 我就踢開單箭頭嘅,如果你地贏唔到伊巴嘅話就只可以同其他翼位球員爭邊路正選。於是佢地展開左競爭,輪流獲得上陣機會。話就話對佢地有正面影響,但兩者嘅狀態明顯比上季飄忽,原因係左/右中場嘅要求始終同前鋒有出入,而且因應對手而要執行嘅指令亦相對多元化同複雜。今年就有好幾場比賽會見到兩個球員好落力但硬係出現係錯嘅位置,或者做決定唔夠以前果斷。

馬素爾上半季陷入低迷,聖誕後開始重拾球感,掌握到由中場位置同禁區邊開始進行突破嘅不同之處,攻守嘅平衡亦見到有進展; 相比下拉舒福特就顯得好迷失,除左無以往咁有信心去單對單突破同做反越位之外,處理半單刀/單刀嘅時候都無左上季果種同年齡不符嘅冷靜。伊巴可以繼續統治英超嘅日子有限,與其浪費福仔嘅光陰去適應新位置,不如將呢位天生嘅射手琢磨成為英格蘭未來十年最強嘅前鋒,唔好辜負外星人朗拿度對佢嘅一番厚望。

 

中場球員大把選擇,但同樣有好多改善空間。未來幾年球隊肯定會圍繞住普巴去建立成個中場嘅踢法同鞏固陣容,但今日佢仲未展現到球王級嘅大賽表現同逆轉賽果嘅能力,穩定性更加係為人垢病。若果話施丹最恐怖嘅地方係能夠令隊友比平日踢高一班波,咁現階段嘅普巴只係群星拱照,有時更加會犧牲埋隊友嘅專長,俾佢係中場有絕對嘅自由度。我地知佢可以有幾好波,但我估佢要進步嘅話,必先會經歷一兩次大挫敗。低潮黎到嘅時候,我地做球迷最緊要就扶佢一把!

 

後防不穩問題雖然明顯(詳見舊文 - 黃色防線警告現正生效),但大部份比賽都踢得出戰術要求。除左經常換正選嘅左閘位,基本上所有後衛都好清楚自己要做啲咩,連我一直認為係失敗收購嘅洛荷都愈踢愈成熟,今季比史摩寧更加有大將之風。中堅人腳尚可,不過左右閘都有買人加強板凳深度嘅必要啦。須知道曼聯打陣地戰時入波嘅瓣數,同兩閘走動能唔能夠干擾對手定位防守有莫大嘅關係。

 

週記出街之時曼聯經已係足總盃八強俾車路士踢出局,但我地見到一隊有希望有鬥心嘅球隊,抬起頭準備好迎戰接今季餘下嘅挑戰。


We will come back stronger.