[K11出品] 曼聯K角度 - 全勝的聖誕快車
聖誕快車前換帥,由名宿蘇斯克查作為看守領隊去進行一連四場聯賽,頭三場已獲口碑而且亦獲得球迷與球員支持,黎到最後一場作客面對賓尼迪斯執教嘅紐卡素,硬朗嘅攔截加上嚴密嘅防守,半場只能0:0,當下半場仍然老鼠拉龜嘅情況下,蘇斯克查作出盧卡古與山齊士雙雙入替嘅換人調動,結果由盧卡古先開紀錄,再由山齊士助攻拉舒福特射入奠勝球,以2:0取得自1946年畢士比爵士創下執教即取得4連勝嘅紀錄,更係聖誕快車取得全勝姿態,目前與前四嘅車路士只有6分距離,後上不是夢。
陣容方面,門將為迪基亞,後防右至左為隊長華倫西亞,連迪洛夫,鍾斯及梳爾,三中場為靴里拉馬迪及普巴,前場三子為馬達,馬斯亞及拉舒福特。
門將嘅迪基亞今仗終於可以再零封對手,而對手嘅紐卡素雖有11次攻門但只有3次中框,全部均被迪基亞一一接實。
右閘方面,華倫西亞繼上次歐聯作客華倫西亞後再次正選上陣,但明顯華倫西亞未在狀態,完全跟不上曼聯目前嘅節奏,因此右路只有防守而缺少助攻,今場對手打密集防守下令曼聯缺少拉散對手後防嘅機會。左閘方面,梳爾繼續正選而表現也算不俗,而且與馬斯亞亦有不俗配合,可惜74分鐘拉跌堅尼地領黃。
中堅方面,鍾斯休息一場後再度上,今場於上半場出現一次危機,被對手迫搶下造成對手一次半單刀機會,幸得自己追回後防剷走皮球解圍成功,其餘時間表現還算合格。另一中堅連迪洛夫,今仗成功將衝撞型嘅前鋒朗當壓制住,全場朗當只有一次接應傳中頂高,即使其餘時間也被連迪洛夫緊緊追纏。除非之外,面對速度型嘅亞素亦能阻止,更有2次創造機會嘅傳球出現,更錄得全場100%攔截成功嘅數據,冰真正冰人嘅實力展現喇。
中場方面,馬迪今場繼續正選,但開波初段幾次直接交失波,而且今場對手硬朗程度且速率較之前幾場對手為高下,即時看到馬迪的問題,幸好慢慢地與靴里拉作出調整,馬迪再調深一點只做駁腳工作而讓靴里拉多作一點掃蕩與串連,情況得以改善。
正是靴里拉,今場另一位中場,靴里拉今場繼續踢得精彩,雖然只係做駁腳,掃蕩及串連,不過由於要協助馬迪,今場以防守比進攻嘅工作較多,因此較少上前助攻,而靴里拉今場攔截成功嘅數據足足有5次之多,比在場任何一位曼聯多兩次,可見靴里拉於中場起了舉足輕重嘅作用。
普巴方面,今場表現算是近四仗較平凡的一仗,不過亦可以理解,始終聖誕快車期間佢場場踢足而且應該算是近年最落力嘅幾場比賽,今場其實都落足力跑動。失咗球權都見到普巴回防但礙於對手硬朗嘅防守亦令普巴有所影響。下半場更被舒爾維從後踩大腿對尾段體力也有所影響,預計將獲得休息以便備戰對熱刺嘅大戰。
攻擊線方面,馬達再次獲得正選位置但今場因為對手嘅嚴密後防令馬達嘅發揮亦有所影響。不過馬達擅於俾波同入攝確能為對手後防製造不少麻煩。62分鐘由盧卡古入替,盧卡古入替後一分鐘便乘對手門將杜巴卡甩手補射先開紀錄,其後79分鐘再間接做出助攻,而其實盧卡古今場嘅場上表現亦再有提升,期待上一季入超過20球嘅渣古醒來。
左路嘅馬斯亞方面,只得24分鐘嘅門前射高較為顯眼外,便剩下被對手省中面嘅場景出現,始終紐卡素也著重看管馬斯亞,每次左路觸球便要應付兩個守將之多,62分鐘由山齊士入替。山齊士入替後睇得出極之勤力,但狀態似乎仍有待提升表現,不過視野便是級數,79分鐘一個致命嘅傳送造就拉舒福特射入奠勝球。
正前鋒嘅拉舒福特,經過多場不停奔跑,今仗明顯看到有一點疲態了。但拉舒福特射罰球嘅威力日漸成熟,急勁且命中率高成對手極大威脅,盧卡古嘅入球便因杜巴卡嘗試接拉舒福特嘅罰球甩手後出現。而今仗雖然面對硬淨嘅中堅令其無啖好食,最後要到78分鐘一次快速突擊接應山齊士嘅傳送後冷靜射入成2:0奠勝。此入球處理之冷靜屬蘇斯克查到來後慢慢出現,賽後拉舒福特亦有感謝蘇斯克查傳授嘅埋門秘訣。賽後成為MOTM但真的要休戰一下了,留待大戰熱刺時再次奔跑吧!87分鐘由連加特入替亦只是早點給予拉舒福特休息的時間。
戰術分析方面,蘇斯克查今仗最值得讚賞就係62分鐘嘅調動,當時將盧卡古與山齊士同時入替馬斯亞與馬達。雖然盧卡古換入後1分鐘便執雞建功應屬意料之外嘅部署但其後可以見到盧卡古與拉舒福特是接近雙箭頭嘅效果。這安排亦為後者找到更多空間來,而山齊士嘅入替亦可以增加效率以便幫助慢慢體力不繼嘅普巴。當然馬斯亞與馬達不是表現不佳但此調動是將整個form改變,換言之紐卡素嘅後防亦需要作出適應。改變便有機會帶來機會,機會出現便只看把握與否了。
聖誕快車期嘅四場聯賽,曼聯已多年未試過取得全勝,亦是今季唯一一隊英超球隊做到。雖然四場對手都屬於中下游,但亦需要球隊有此能力,耐力與鬥志才能達成,希望球隊能繼續連勝,助球隊取得佳績及令蘇斯克查因而取得一份長約吧!
鳴謝各位支持文字直播及即討區,下場見。
[WKD手記] -中場的微妙變化
蘇斯克查上任三戰入十二球,球迷終於大飽眼福,除咗迪基亞會有啲失望之外其他球員都踢得相當開心。相較頭五列強份子,曼聯嘅聖誕快車算係易踢,全部都係中下游隊伍。般尼矛夫本身實力不俗,但十二月先後有兩位球員傷出最少半年、再俾熱刺大炒完五粒,作客奧脫福都預咗會係入球嘉年華。因為時間有限,蘇帥穩陣地用死一個陣式,務求短期內重建球員默契同信心,當中又有邊啲球員值得我地注意呢?
想知道邊個啱踢,首先要解構下呢套451戰術嘅執行模式。眾所周知普巴再次成為球隊核心,攻擊中場之位必然交咗俾佢,協防變成額外、唔做足都唔會俾人罵嘅職責,雙防中就有返明確目標:先確保防守位置同人手,再向中前場提供適當入攝同傳球。此舉最大得益者當然係馬迪同靴里拉喇:前者防守時多一個拍擋,唔洗再保護中堅同時又要搶截咁mission impossible;後者可以充分發揮自己最強嘅足球智慧,喺適當嘅時候同位置出現。比起舊時,兩者持球時會更注意有無過份上腳同拖慢咗進攻節奏,一察覺到就會盡快甩波轉變等隊友再鑽空間,而另一人就會逗住嚟踢,所以甚少見到兩者同時冚上去,要做到攻守平衡其實對閱讀球賽能力非常講究。
兩個就夾得唔錯喇,問題係輪換時邊個可以頂上呢?對哈迪斯菲爾德果陣費特就踢過防中,不過表現就非常麻麻。呢位巴西中場本身就進攻慾過強,只要拎到波就想自己做上去,
傳球選擇又往往捨易取難,結果多次帶甩、傳失,下半場就被本來可以休息多陣嘅靴里拉入替。
佢意識上近普巴多過靴里拉,而且都幾有巴西人果種防守意識、集中力薄弱嘅特性,與其將佢推落半格不如推前半格?小將佩利亞都有類似問題,喺呢個陣式下佢都好難爭取到中路嘅席位,唯有寄望嚟緊有多啲比賽早早就擴大領先優勢,俾佢兩個適應英超節奏同增強位置感。
另一個正面臨衝擊嘅球員就係連加特。摩連奴時代其中一個困局在於中前場缺乏機動性,當時最能夠簡單直接咁將個波運向前場,甚至做影子前鋒嘅就係佢(同馬達)。而家曼聯慢慢習慣返主導球賽,中前場各球員都擁有極高走動自由,傳球支援唔再係問題,連加特喺電視螢幕上嘅作用似乎只剩下跑動。其實佢喺普巴、馬斯亞同拉舒福特之間嘅空間仍然係咁重要,不過有更多時間處於無球狀態,更難獲得球感,所以佢要適應職責上嘅改變,同埋都睇得出體力消耗都幾影響到佢近仗表現。
改變緊嘅又點止中場丫?嚟緊會再同大家分享下唔同位置上嘅觀察,你地又睇到啲咩呢?
[K11出品] 曼聯K角度 - 信心.喜悅.享受
蘇斯克查執教後取得二連勝且大勝而回,雖然所面對只是一眾下游球隊但最重要還是表現令人滿意而且睇得出眾將開始展現了信心。而今仗除了繼續展現出信心,更睇到一眾球員有相當嘅喜悅表現出來,相信主場壓力繼放仗後亦已順利克服,最後更睇到一眾攻擊球員於今仗踢得甚為享受,順利以4:1主場大勝般利茅夫而回,目前已經追至距離第五位嘅阿仙奴只有3分之差。
陣容方面,門將繼續為迪基亞,後防右至左分別為楊格,拜利,連迪洛夫及梳爾,三中場有靴里拉,馬迪及普巴,前場三子為連加特,拉舒福特及馬斯亞。
門將嘅迪基亞今仗繼續所受壓力不多,對手只有5次攻門而中門框只得3次,均出現於上半場,而京治嘅窄位射門被迪基亞擋出,其餘兩個攻門均來自艾基嘅頭鎚,第一次被迪基亞擋出後再由靴里拉及馬迪解圍但第二次則被艾基搶贏馬迪一頂入網,再一次不能零封而非迪基亞之責任。
後防方面,右路嘅楊格今仗表現亦算稱職但上半場卻嫌過勇下魯莽於底線領黃。不過楊格嘅在陣代表會有極多急勁嘅傳中球出現。左閘方面,梳爾繼續穩佔正選而今仗再睇到與馬斯亞有更多嘅配合,防守方面面對速度已經算高嘅佐敦艾比亦應付有餘,不過賽事尾段疑似受傷令人有點擔心。
中堅方面,連迪洛夫於適應英超踢法後已成為摩連奴及蘇斯克查中堅之選,因為其用波能力不俗,能由後防開始策動攻勢,而且即使擔任左中堅或右中堅亦看似影響不大,只是過頭波方面亦是其弱點。另一中堅拜利,難得獲得正選表現自己,本以為可用穩定表現搶走中堅一位,78分鐘前亦算穩陣且表現冷靜可惜一次落腳太狠便被球証用紅牌趕離場,將要面對三場停賽嘅懲罰,亦將會錯過作客熱刺嘅大戰。
三中場方面,先講講馬迪,上仗近門攻入開齋波而今仗亦繼續正選上陣,始終蘇斯克查不能睇小中場能力不俗嘅客軍,不過馬迪表現亦交到貨更於14分鐘一次靚交造就攻勢嘅出現。下仗面對紐卡素或者係馬迪休息嘅時候了。
靴里拉方面,蘇斯克查上任後已算係企穩常規正選嘅陣容內,而今仗亦起咗舉足輕重嘅作用,24分鐘一次重要嘅回防補位於前柱化險為夷,呢個意識算係傳奇堅尼所講聞到危險嘅氣味而作出相應嘅動作吧,而靴里拉依家除咗防守可以幫到球隊外,助攻亦有一手,32分鐘傳中交出漂亮嘅一球予普巴頂入成2:0。不過50分鐘因一次跣腳而要職業犯規下拉衫領黃,75分鐘由佩利亞入替。佩利亞入替後表現與費特有點相似,節奏上仍與曼聯有點不配,希望多一點機會可以讓佩利亞與球隊配合吧。
普巴方面,自從摩連奴下台後,普巴連續3場交出極佳表現,入球助攻停不了。今場再交出兩個入球一個助攻,除此之外更有一球中柱波可以連中三元。場上表現亦越黎越好,爽快之餘亦無再於中後場賣弄腳法,而且兩個入球均屬後上入攝完成足証只要普巴能踢出具侵略性嘅足球便極具殺傷力,賽後獲選為MOTM,連續兩場,期待第三場吧!
前場方面,右路嘅連加特繼續受蘇斯克查重用但今場表現顯得有點遲緩,不過仍有不停跑動帶出空位亦因此成為蘇斯克查重用嘅原因,應該話係受曼聯多位領隊重用嘅原因而且上季開始表現大躍進,控球及推進均越黎越成熟,場上決定亦越黎越好。
左路嘅馬斯亞方面,今仗復出後狀態似乎未完全回到十足,不過已足以交出一球漂亮嘅腳面助攻予拉舒福特埋門破網。81分鐘由於拜利嘅紅牌要換入鍾斯而提早離場休息。鍾斯入替後當然踢回中堅位置但由於當時大局已定下,未有受任何考驗至完場。
前鋒嘅拉舒福特,今場光芒四射,5分鐘嘅個人突破令艾基得個追字再傳中助攻普巴入球。而個人方面亦於45分鐘接應馬斯亞嘅傳中剷射入網成3:0鎖定勝局。重要嘅係近幾仗拉舒福特於場上決定越見進步而且本身有速度與技術,只差埋門需要多加練習便能再進化,70分鐘由盧卡古入替。盧卡古經過缺陣兩場後回來,而72分鐘便接應普巴用右腳射入一球,雖然此入球於越位位置下入球但總算為盧卡古取回不少信心。賽後蘇斯克查亦對如何將盧卡古解放有著一套心中有數嘅方案,即管等待成效吧!
戰術分析方面,明顯蘇斯克查有著費Sir嘅影子,期望以最佳陣容出擊盡快鎖定勝局便開始作出換輪,因此下半場盧卡古能於70分鐘入替拉舒福特,以便前者取回狀態而後者得以休息,76分鐘亦有佩利亞入替靴里拉嘅決定。只可惜拜利嘅紅牌打亂了最後嘅換人幸好不致影響賽果。
另外,因為蘇斯克查亦係球員出身,自然更能有效地理解球員嘅感受,經歷及所想。此方面有助蘇斯克查幫忙球員渡過樽頸位置,近日訪問已見蘇斯克查對於拉舒福特有著針對性嘅訓練而今仗亦見成效。而且亦因其後備次數眾多更能明白後備席上嘅球員心中所想,如何去安撫球員心理令佢地保持信心與士氣亦事關重要。目前黎講仍是成功的。
蘇斯克查曾提到自己希望讓進攻球員能盡情享受足球,此話亦由普巴近三仗嘅表現反映出黎,入球,助攻,傳球成功率及創造機會次數等等都得到震撼性嘅反彈。當然一名球員最重要有信心,才能將自己心中所想嘅能力展現,而且睇到除普巴外,其他球員包括拉舒福特及連迪洛夫等等亦越出信心來。有信心變繼而能有喜悅之情,呢一點亦從普巴所帶領嘅球員展現出黎,睇到普巴或連加特入球後嘅喜悅,慢慢再進一步地睇到,一眾進攻球員正在享受著足球。當然,曼聯已經連續多場失球,而且對手亦只是榜下游球隊足証後防亦有改善嘅空間。否則去到強強對碰下便極有危機。
鳴謝各位支持文字直播即討區,下場見。
[K11出品] 曼聯K角度 - 進攻粉底下的防守
粉底大家都知道係一眾女士用黎掩蓋臉上瑕疵嘅化妝品了,而曼聯由蘇斯克查執教後第一場主場賽事,雖然順利以3:1擊敗作客到來嘅榜下游球隊哈特斯菲,但實情蘇斯克查是把球隊壓前,利用了進攻來遮蓋著防守的漏洞,就好似粉底一樣,將防守危險與機會盡量減低。幸好能全取3分,繼續將與前列距離進一步縮窄,迎接下周繼續嘅緊密賽程。
陣容方面,門將繼續由迪基亞把守最後一關,後防右至左分別為達洛特,連迪洛夫,鍾斯及梳爾,三中場為費特,馬迪及普巴,前場右至左為馬達,拉舒福特及連加特。
迪基亞雖然再一次,係再一次保唔住零封,不過責任不在他身上,所失一球為後防頂唔住對手嘅攻勢被近門射入。而迪基亞今場60分鐘嘅撲救再次展示其迪神之功架,將迪保治接應角球嘅妙射如同攞籃板一板將皮球擒下來,賽後蘇斯克查亦盛讚此為佢見過其中一個最美妙嘅撲救。
後防方面,右閘嘅年青19歲新人達洛特獲機會上場,雖然佢屬於摩連奴嘅遺產但此子的確擁有極大潛力。不過今仗似乎面對充滿英超味道嘅哈特斯菲顯得未能適應,攻守也未算稱職,39分鐘浪費了拉舒福特恰到好處嘅傳中球射斜出界,防守更曾差點被梅賓沙爆過,54分鐘由楊格入替。楊格入替後,明顯用經驗彌補此位置的漏洞,多次由右路入中路包位,而且楊格亦為曼聯提供了較高質嘅自由球處理。
左閘嘅梳爾,今仗繼續成為正選而左路拍擋變成了連加特,拉舒福特,甚至普巴,感覺有點塞車結果今仗梳爾助攻不多但仍有乘空檔時上前達至射門嘅威脅。
中堅方面繼續為上仗拍檔鍾斯配連迪洛夫,位置相同且踢法亦一樣,第一個入球正是連迪洛夫角球助攻衝前柱下造成馬迪門前執雞成功。不過連迪洛夫今仗要為所失一球負點責任,雖然普巴爭頂失敗但皮球於其頭頂越過再忽視了後上嘅辛卡被近門射入,始終制空力弱屬這對中堅組合最大弱點。
防中方面,先說馬迪,馬迪今仗繼續正選而表現繼續可人,要知道馬迪的工作簡單而重要,控制節奏,轉邊或將皮球傳俾重心球員,雖然最近多了一項後防拍揮者的工作但勝任有餘,而今仗更於角球助攻下近門射入今季第一球,更是今仗為曼聯打破悶局重要的一球。
另一防中費特,鮮有上陣機會但今仗仍然顯得有點節奏不合,太快及太急了一點,29分鐘更領下黃牌。不過如果費特適應了英超而且捉摸到節奏,的確係一位重要嘅B2B,54分鐘由靴里拉入替。靴里拉入替後明顯將經驗與穩定帶到場上,由後場嘅搶截工作至前場助攻也參與在內,63分鐘便瞓身將皮球傳俾普巴射入2:0的一球,為曼聯打下強心針。
左中場嘅普巴,今仗獲選MOTM,因為其表現真的越來越好,後場減少咗無謂嘅盤扭而於中前場增加咗參與度且節奏明快,射入2:0嘅入球雖然難度不高但卻重要,需要冷靜嘅處理。而第三個入球於禁區外嘅快射,有角度且力度十足,屬於祖雲達斯時期嘅遠射。雖然3:1嘅失球為普巴與穆尼爾爭頂失敗,但近兩仗交出兩入球兩助攻,似乎普巴於蘇斯克查帶領下既開心又交到表現。
攻擊組合方面,連加特,馬達及拉舒福特於前場沒有被安排特定位置但卻有目標路線,馬達中前場自由走動,連加特於左邊走至中路入滲,拉舒福特由正中位置不時走到左路突破。不過上半場左路卻有點塞車,因為此三位球員加上普巴曾有一段時間集中在左路進攻,加上對手球員便變得密密麻麻,而在此情況不改的話,最大可能的換人會是犧牲馬達。幸好球隊下半場開始重新定位,馬達亦增加在右路嘅活動,結果63分鐘便由馬達於右路突破落底線再傳中下造成入球,79分鐘由高美斯入替馬達。高美斯嘅入替証明了曼聯重視青訓而且青訓有質素嘅肯定,當下一刻同場嘅曼聯青訓便有普巴,連加特,拉舒福特及高美斯。而高美斯亦非刷數據之輩,雖然矮小但靈活且有腳法,90分鐘於禁區嘅射門雖然不入但整套動作流暢,期待今季有更多一隊嘅上陣機會吧。
連加特方面,有佢在陣嘅話,能令球隊行軍速度變得流暢因為連加特喜歡跑動及向前引球推進而且亦有一定嘅遠射能力,今仗於77分鐘亦助攻予普巴射成3:0。
拉舒福特方面,的確仍有不少地方可以進步但見此名曼聯新10號近仗亦有不少進步,當中包括一些場上嘅決定,而39分鐘左路突破後傳中亦做得非常不俗。而上半場亦有兩次左路起腳射門勁度十足只是欠缺角度而已。
戰術分析方面,明顯地蘇斯克查於進攻上花了不少心思去佈陣,今仗上半場期望以拉舒福特拉左邊後多用連加特後上入滲中路搵空間。而下半場則由於楊格出場後,球隊進攻上左右比例取回一定平衡令對方後防空間增加,只要球員維持跑動及皮球運送便會有空間再次出現,2:0嘅入球亦因此出現。
不過,進攻雖然係蘇斯克查目前帶到俾曼聯嘅元素,但防守仍然係目前曼聯最大嘅問題,上半場初段曾出現險象幸好干高奴小禁區炒高,下半場迪保治嘅門前接應妙射亦因為完全走漏下出現,結果3:1也在防守不夠穩陣下被近門射入。其實目前蘇斯克查只是將球隊整條線路推前,令後防受壓減低但要知道其實其防守力仍然不足。只是在著重進攻希望以己隊進攻去減少對方進攻嘅機會從而彌補防守薄弱嘅問題,純粹是用進攻此粉底去遮蓋防守的瑕疵,到底曼聯一月是否仍要購入中堅還是蘇斯克查可以令史摩寧及拜利等等去成為領袖級後防大將? 仍有未來三仗(兩場聯賽加一場足總盃)可以俾蘇斯克查去尋找此答案,及後便要迎來與熱刺搏擊嘅賽事。
鳴謝各位支持文字直播及即討區,下場見。
[WKD手記] - 見面禮
以為自己追咗曼聯咁多年有咩未見過,但原來踢得精彩嘅時候都難掩興趣嘅心情,好耐未試過睇完一場波會想走去踢波。相信蘇斯克查喺幾日內帶唔到咩精密戰術俾球員,從呢場嚟觀察除咗有部署到鋒線三人組嘅配合之外,球員走動更加似出於自由發揮。球員相對地能夠憑個人判斷去參與攻防當然加把勁喇,其實球迷見到佢地都踢得咁有個性仲開心,呢場波彷彿喺俾球員用表現向新帥自我介紹。
蘇斯克查首個訪問就講到自己教波風格受費格遜影響,所以會帶返落曼聯到,即刻令我諗到踢442嘅可能性,因為幾年以嚟進攻比防守表現得更差,最直觀睇到嘅問題就係邊個都踢掂唔柱躉單前鋒(伊巴除外)。呢場433陣式、人腳都同摩佬時期相似,但踢落完全係第二隊波。
拉舒福特作為單前鋒嘅弱點當然係背龍、制空力低,要求佢喺危險地帶控定個波等中場支援係強人所難,所以戰術上安排咗連加特、普巴同馬斯亞輪流跑向福仔用傳跑方式突破防線。連加特名義上踢右翼,進攻果時幾乎係一個攻中,務求福仔喺任何時刻拎波都可以彈返俾佢,當中場線壓到上嚟佢就會同福仔平排做雙前鋒。
呢個鋒線組合最後包辦咗四個入波,進攻成效不容置疑,但針無兩頭利,代就係跑動距離大增同埋右路缺乏攻勢。連加特體力消耗固然大,其實楊格一樣吃力,後者不下一次拉到上右翼位等波,靴里拉同及後換入嘅費得間唔中就會去包右閘位,但唔代表佢地能夠完美補位。卡迪夫城後期針對性地喺左路做波,靴里拉出腳失敗,爭啲就俾對手複製上場文尼嘅助攻方式。對強隊嘅話無乜可能咁冒險地踢,長遠嚟講都係需要解決右路組織同埋前鋒供應問題。
防守方面今場就顯得非常輕鬆,要不是有少少爭議性地輸咗個十二碼,迪基亞應該可以保持不失。後衛唔多機會去展示防守實力,但從組織中都見到各人擅長之處。連迪洛夫愈嚟愈有大丈之風同佢成日帶波助攻嘅踢法無關,而係因為佢開始擔起指揮防線嘅責任,中堅當中以佢最有閱讀球賽能力,將來能成大器;梳爾防守力唔算一線,不過同馬斯亞、普巴建立出嘅默契就值得繼續重用;右閘人選眾多,楊格、達洛特、華倫西亞甚至達米安踢得,前者咁後生或者可以踢哂成條邊線添。
卡迪夫城屬於護級球隊,但曼聯打到對方落花流水都反映到今場表現高於合格水平。卡迪夫城僅餘嘅攻勢都來至手榴彈戰術,運動戰中真係創造唔到咩攻勢,紅魔鬼從中應該搵得返主動用波嘅信心喇掛。老實講,摩連奴喺曼聯複製唔到大巴戰術嘅其中一個原因就係班球員一無控球權就會好慌,到難得有波到嘅時候心急亂做,啲反擊質素比佢教過嘅隊都要差,比人炒可以話係天時地利人和都輸哂嘅結果。
[K11出品] 曼聯K角度 - 歡樂今宵
首先預祝各位聖誕快樂,摩式曼聯成為過去,蘇斯克查走馬上任成為今季餘下賽季嘅代領隊,除咗帶來了一眾紅魔久違了的大勝,全場以5:1作客大破卡迪夫城,為蘇斯克查打嚮成為曼聯領隊之頭炮,最重要還是重現了一眾紅魔久違了的歡笑,歡樂今宵再會,各位觀眾晚安,好好地甜睡了一晚。
陣容方面,門將繼續為迪基亞,後防由右至左為楊格,連迪洛夫,鍾斯及梳爾,防中由馬迪配靴里拉加上普巴,前場由右至左為連加特,拉舒福特及馬斯亞。
門將嘅迪基亞今仗又再一次保唔住零封,所失一球卻是來自12碼,而除此之外,其實迪基亞曾經以一次水準撲救將梅菲禁區內嘅燙射撲出界。
後防方面,楊格由摩連奴軍下轉至蘇斯克查仍然獲得信任,今仗繼續成為隊長加右閘正選,不斷嘅助攻加上落力指揮球隊,事實上比華倫西亞更有隊長風範,而其實最重要嘅係本身翼鋒出身嘅楊格,配合蘇斯克查勇於向前嘅戰術,感覺越黎越年輕一樣。而球隊較遠嘅罰球及角球都主要由楊格負責,可見楊格將會繼續受蘇斯克查之重用。
左閘方面,梳爾傷癒復出,而其表現仍然維持今季高水準,亦曾有助攻至對方禁區嘅情況出現。不過值得高興嘅係,梳爾今仗開始與左翼嘅馬斯亞產生多一點默契。
中堅方面,連迪洛夫配上鍾斯,前者今仗有別摩佬時代以左中堅出現而是以右中堅現身,而且經常用波,更有兩次殺上對手三閘線甚至禁區去助攻,比摩佬時代更具侵略性。不過公道一點講,防守上經過摩連奴旗下嘅訓練,亦已見能應付英超節奏了。但要留意一點,連迪洛夫應付對手從後長傳過頭波回防呢一點明顯較弱,著實要針對性解決呢個問題。鍾斯方面,今仗負責左中堅一職,而主要負責防守工作且相當稱職。更曾有一次角球助攻下起腳射門嘅機會。
防中方面,馬迪配上靴里拉,先講講馬迪,其實馬迪嘅工作無變,一樣主要做控制節奏及作為一對中堅嘅屏障。其實以馬迪嘅角色,如果球隊攻守平衡得宜,馬迪於比賽中在精神方面嘅消耗比體力方面大,87分鐘由費蘭尼入替。費蘭尼入替後基本上觸球次數不多。靴里拉方面,其實以鬥志方面及使球隊攻守平衡,靴里拉理應早早獲得正選。今仗靴里拉亦表現出作為球隊攻守串連嘅重要角色,B2B嘅功能其實比普巴更明顯,防守上經常於自己禁區邊做搶截,中場亦會與隊友做短傳嘅串連工作,更會後上到對手禁區邊助攻,29分鐘便正正於離門三十多碼接應普巴橫傳後遠射入網成2:0,雖然皮球因省中人改變方向入網,但敢於起腳射門亦係靴里拉嘅優點,加上佢由後場至中場再到前場也有參與球隊工作,咪就係B2B囉,我K11已經講咗好多次!不過亦要提醒一點,靴里拉做綠葉比做球隊主角嘅表現更優異。
重回正選而位置處於偏左中場嘅普巴,今仗表現其實來個先苦後甜,或者太耐無比賽,開波初段幾腳轉方向嘅力度與位置都好差,但慢慢地重掌節奏而且表現成熟穩重,簡單而且絕不花巧,69分鐘嘅遠射亦有一定水準只可惜被門將撲出。今仗更交出兩球助攻包括橫傳轉方向予靴里拉遠射入波及完場前直線傳俾轉為前鋒嘅連加特單刀入球。明顯地,今場普巴為咗踢爭氣波及希望重新取悅曼聯球迷,好多波都以大局為重,而且連加特搏得12碼後亦睇到普巴讓出機會予連加特入波,賽後亦講咗佢與摩連奴嘅關係與結論,希望佢可以乖乖集中精力繼續踢好波啦。
前場三子方面,先說說左路嘅馬斯亞,其實今季已明顯看到馬斯亞於攻守上都再有進步,而今場波於上半場被追成2:1後,見到馬斯亞勇於成為球隊進攻策劃者,走到中路迎波及做波,結果只需3分鐘便為曼聯再次拉開比數,而且與普巴及連加特更來一次漂亮組織入滲後射地波遠柱成3:1。而且最值得高興嘅係與梳爾開始多一點配合,如果日漸成熟的話將會令曼聯左路威脅倍增,86分鐘由佩利亞入替。佩利亞入替後過於集中中路組織,反而令進攻變得緩慢,睇到佩利亞好希望表現自己但似乎有點心急了,放心吧!相信蘇斯克查會繼續俾機會你証明自己於曼聯嘅將來。
正前鋒嘅拉舒福特,今仗3分鐘便用漂亮罰球來為曼聯先開紀錄,而其後踢法跟以往擔任正前鋒時相若,可惜一次由連迪洛夫後場開始策動嘅進攻卻有點操之過急,結果半單刀下失機了而其實還可選擇回傳後上跟進嘅連迪洛夫。而且一次不小心嘅手球曾經令曼聯被卡迪夫城以12碼追近至2:1,亦令迪基亞失去了今場零封,下半場79分鐘由費特入替。費特入替後於防中位置出現不過睇到仍然與隊友欠缺一點默契,但其勇於由中場開始推進嘅特點或會於將來成為蘇斯克查重要嘅武器,繼續適應吧。
右路嘅連加特,上半場其實表現只是平平,不過勤力嘅走動加上勇於推進已經影響卡迪夫城後防佈陣,而41分鐘接應普巴直傳再回傳予馬斯亞射入3:1一球為佢拎回一定分數,不過當時蘇斯克查若要選擇半場換人則會是熱門人選。下半場再來個爆發,先有56分鐘於左路禁區頂開始盤球直闖引來對手犯規獲得12碼,更親自操刀射入成4:1,其後當福馬齊齊換走後,連加特轉為正前鋒,正是等待著獲得直線奔跑嘅機會而普巴正好於完場前一個靚直線予連加特推過門將後梅開二度,賽後更成為MOTM。
戰術分析方面,明顯地,蘇斯克查雖然仍舊以接近摩連奴嘅排陣出擊但細節方面已加入自己嘅元素,亦係師承費Sir嘅元素。節奏明快,將後防與中場推前,要求個別球員盡量以一兩腳波來使行軍速度加快,特別係令普巴於中場踢得更爽朗直接。
另外,連迪洛夫於摩連奴時代會以左中堅出現但今仗則重回右中堅,而且亦勇於上前助攻至對方禁區頂。摩連奴曾解釋連迪洛夫是目前最能勝任左中堅一職嘅曼聯球員但蘇斯克查則將連迪洛夫嘅自由度增加而由或者不擅長此位置但只需專注防守便足夠嘅鍾斯擔任左中堅,此舉可令連迪洛夫嘅優點放大,而當連迪洛夫上前助攻時便由馬迪負責留後助守,而摩連奴則較注重平衡與穩陣嘅排位,明顯看到蘇斯克查較摩連奴大膽佈陣。
再者,明顯地目前曼聯後防未有領袖級球員而蘇斯克查看似委任馬迪作為後防拍揮者,包括龍門球是否開長或短,需要壓前還是後退,當然用防中馬迪來做後防指揮只屬緩衝之計,一旦面對組織力更強嘅球隊仍然會有大危機出現,所以也要重點解決此問題。
還有蘇斯克查今仗於賽事末段安排連加特任正前鋒便再次運用到球員優點,因為連加特踢法直接簡單,有速度,只要有機會便向前走位及接應,造就了5:1嘅入球出現。當然也得有普巴嘅美妙傳送才可成事。
雖然作客大破卡迪夫城不算甚麼,但總算係蘇斯克查作為代領隊上任後第一場就打開勝利之門,為其信心做好根基。而且曼聯於英超攻入對手5球呢個數字亦係自費Sir於12/13球季退休後等了6年再次出現。加上球員臉上嘅笑容重現,球迷亦終於可於曼聯比賽日晚上來個歡樂今宵了。
鳴謝各位支持文字直播及即討區,Boxing Day再會。
愛華士戰術板:走的終需走......
36-6,對很多球迷來說都是刺眼的數字,看到觀眾席的上的費 sir、前主席大衛基爾對球隊羸弱不堪的表現搖頭嘆息,而行政總裁活華特憤怒得對著卜比查爾頓罵過不停,或許早已預兆與高層矛盾日深的摩連奴,都不會在奧脫福有第四季日子,但估不到一場強弱懸殊的雙紅會,最後竟成了摩連奴的催命符。
看到這個情景,你想狠揍沙基利一頓,還是想把電視掟爛?(Source: Evening Standard)
或許對很多曼聯上下,或者一眾忍受不了曼聯成績低落,打法亦不賞心悅目的球迷來說,看到摩佬離去都會覺得如釋重負,甚至有曼聯重生的感覺,但是否趕走了摩佬,暫時借來曼聯所有球迷的寵兒蘇斯克查,一切就萬事大吉?對不起,我並不太樂觀。
管理層:朝秦暮楚
摩佬的記者會,總是花生滿地.......難為了奧脫福的掃地阿姐(Source: YouTube)
摩連奴最後敗走奧脫福,和他第三季慣性與高層及球員鬧不和有莫大關係。習慣高壓統治、性格充滿稜角、動不動就劍拔弩張的摩連奴,鬧不和這回事其實不算是甚麼難以預計的事。弄至將帥不和,甚至動輒就在矛盾放在記者會的鎂光燈下,摩連奴絕對應該被怪責,我亦對他這種處事手法十分厭惡,可是一隻手掌拍不響,球隊管理層,以致球員本身,也應該有被批評的地方。
若沒有董事局的支持,2013 年就沒有雲師兄一個單天保至尊的表現 (Source: The Independent)
曼聯在費格遜爵士執教二十六年,並不是每季都一帆風順,開始執教初期試過季尾排在十一位,而到爵爺執教最後的日子,亦曾經被爵爺衊視為「嘈吵的鄰居」的曼城,先搶走曾經的愛將迪維斯,再被曼城在自己奧脫福主場以 1-6 羞辱,最後更親眼看著聯賽冠軍在自己賽事結束後被阿古路一腳踢走,令曼城首次取得英超錦標並開始他們的黃金時代至今。以現今急功近利的管理層,恐怕當時費 sir 根本沒可能光榮退休,而是被狼狽地趕走。或許費爵爺就是在球會有獨特地位,他依然有董事局及管理層的配合,之後更作出收購雲佩斯這個驚人之舉,結果雲佩斯該季卓越的表現,成為費 sir 最後一季奪冠的基石。即使季尾朗尼扭計遞上轉會申請,費 sir 亦在管理層或明或暗地首肯配合下使用心計,記者會上哽咽承認事件,令朗尼陷入尷尬的情況,最後在費 sir 退休後乖乖續約。過程中朗尼這位當時曼聯的頭號巨星其實一度被貶後備,但並沒有太大影響到曼聯該季的爭標之路。
收購山齊士沒有達到理想效果,摩連奴難辭其咎(Source: Lebanon news)
同樣撬走阿仙奴當家主力球員,同樣地雪藏陣中當家巨星,摩連奴換來的卻是失敗告終。摩連奴其中的決定和處理固然是差,但管理層若明知摩連奴早有這個劣跡斑斑的第三季傳統,在聯賽落後離哥迪奧拿的曼城一段距離,在歐聯強敵環飼不可能有十足把握下,是否太早跟摩連奴在第二季季中就續約,並且放任地配合他以超高薪搶走一個已經二十九歲,實力見頂的山齊士?當高層選擇繼續相信摩連奴與他續約,得到山齊士加盟之後,曼聯並沒有因此一帆風順,歐聯亦十六強就被西維爾淘汰出局,聯賽雖然得到費 sir 退休後的第二位,但最可笑的是高層並沒有堅持自己的選擇,對摩連奴的信任經短時間就已經轉淡。個性率直而張揚的摩連奴沒有感受到球會高層支持後,一直在大大小小場合釋放負能量,抱怨沒法收購心儀中堅、陣容距離心中水準甚遠等說話老是常出現,高層既沒有給予支持,亦沒法令他收歛半點。這樣短時間就變臉的管理,摩連奴感到氣餒、心灰甚至後期有點放棄的態度其實不難理解。
球員:禮樂崩壞
摩連奴任內經常被人批評戰術保守,沒有發揮到陣中球員的潛能,只有抱怨沒有好球員而沒有用好手中球員。無疑摩連奴任內的確沒有少花金錢收購球員,但能夠真正可以稱得上發揮作用的,只有已經離開的伊巴謙莫域,其他不是只曇花一現地打了幾場好波,就是水準長期沒有達度預期。可是一味怪責摩連奴用人不濟之餘,一眾球員是否克盡己任?
伊巴謙莫域的能力與成功者氣質,在現今曼聯陣中並無二致(Source: TheWorldNews)
這樣對比像不像地鐵站內的修身廣告?(Source: TheWorldNews)
人們對伊巴謙莫域的印象技藝超群之餘,總是大放厥詞,但無可否認當伊巴謙莫域健康在陣的時候,曼聯的攻力是更有保證。而一眾年輕球員如普巴、拉舒福特等,在伊巴謙莫域帶領下踢得總是更有方向。伊巴謙莫域在曼聯的生涯並不是一直一帆風順,最後更因為曾經受重傷,無法返回最佳狀態下自己選擇離開,但能夠以三十五歲之齡首次打英超就整季攻入二十八球,而且在摩連奴近乎沒有輪換休息的情況下維持高水準,可見伊巴謙莫域既有過人的能力,亦可以調整自己一直保持狀態。反觀之後加盟的盧卡古,為了世界杯備戰時增磅之後,大大影響了自身的靈活性和敏銳度,狀態之差令他連基本控球或者一度有把握的爭頂都出現問題,論自己身體狀態管理和專業態度方面,盧卡古比年紀大十多歲的伊巴謙莫域實在有明顯差距。中鋒是摩連奴戰術重要的一環,但盧卡古竟出現以上的情況,摩連奴的戰術怎會輕易發揮出來?
點解可以比人直插入禁區對住迪基亞而冇人追波呢?(Source: 101 Great Goals)
除了球員自身準備狀態沒法達到摩連奴的戰術,球員的集中程度和專注力有沒有達到要求,亦是掣肘摩連奴排陣和部署的重要因素。今季的比賽曼聯失球明顯比以往嚴重,而頗大部份的失球,都與比賽部分關鍵時刻不夠集中有關,即使被攻的時候防線夠人,但往往一兩腳簡單的直傳就已經撕破了整條防線。最直接例子對利物浦的比賽,沙迪奧文尼第一個失球就是整條防線呆呆望著拿比基達的過頭波越過自己,而後防五個人都沒有人察覺盲眼位有文尼後上插入導致失球。該場波下半場摩連奴放入費蘭尼堵塞中場中路漏洞其實是迅速而有效,一度令利物浦一眾狀態上佳的攻擊球員老鼠拉龜,連洛夫雲和佳尼都三十多碼外胡亂遠射,但最後中路協防依然不足讓沙基利一次又一次有後上機會射門,球員則只有圍住禁區頂而沒法阻止沙基利起腳,難道這些球員執行摩連奴防守指示上做得不足的地方都要入摩佬數?不太公平吧?
Caption this? OK, Stupid Pogba!(Source: The Independent)
摩連奴以往被炒的時候,最後時刻往往與隊內球員鬧不和。今次與摩連奴對著幹的其中就有普巴。自上季季中開始,普巴漸漸地多出現在後備席。而世界杯之後,二人不和的新聞一直沒完沒了。兩個人都是喜歡吸引記者注意的人,亦動輒就把隊內的矛盾放上枱面,令本該內部處理的矛盾被不斷放大。普巴的質素當然無容置疑,可是奪得世界杯之後的普巴,除了技術外更總是帶著一份過份的傲氣上場。今季至今普巴的確帶來不少入球,而沒有他的中場的確近乎毫無創造力可言,但散漫的態度和一些絕對可以避免的失誤,個人是讚成摩連奴將他放到後備席的決定,奈何收起球隊身價最高的球員而接連失分,受苦的往往就是領隊自己。只能夠說當普遍球員都被經理人、贊助商和球會明星化,商業活動和社交網絡上的自我宣傳,還有身價一路上升帶來的利益,摩連奴這種舊派喜愛家長式高壓管治的領隊,要這班大帝心悅誠服去為球隊賣命一點也不容易。或許摩連奴暗地裡總是羡慕費 sir 早點出世,可以早點退休便不用被普巴擺上枱了。
走的終需走......傷的早傷透
其實……捨不得你(Source: Cloudinary)
摩連奴的上任,曾經令不少球包括我對曼聯復興滿有期望,可是經過六年三個領隊,一次又一次的球員進進出出,連個性突出的「特別的一個」都成了被掃出門的一個。今季英超的爭標,相信離不開兩隊令曼迷咬牙切齒的死敵,而曼聯則距離第五位,今季由新帥艾馬利上任帶領下有亮麗演出的阿仙奴十一分;歐聯抽籤遇上的亦是實力強橫,在國內聯賽早就橫掃千軍的巴黎聖日門,曼聯高層面對這個境況,對摩連奴投以不信任一票,是可惜但亦可以理解。選擇借來曼聯史上其中最重要的人─三冠王射入關鍵致勝入球的蘇斯克查,加上費 sir 曾經的副手費倫崔護重來,而沒有強行要一些熱門人選如施丹或者普捷天奴季中就開始執爛攤子,曼聯高層算是踏出了務實的一步。可是蘇斯克查執教能力並不算被證明成功,費倫亦遠離了頂級足球一段日子,憑二人曾經在費 sir 手下效力的經驗就可以扭轉曼聯今季的命運甚至爭入歐聯或其他錦標未免太痴人說夢,若果二人可以令曼聯重新穩定表現,追近前五名的差距,他們已經可以算是成功。
你們可以再成為曼聯的英雄嗎?(Source: Manchester Evening News)
不管怎樣,我還是忘不了摩連奴帶領的曼聯,贏過歐霸杯、社區盾、聯賽杯,可以作客贏過曼城和祖雲達斯、可以連續兩年出線歐聯十六強,還帶領這隊人事複雜的曼聯,取得費 sir 退休後最好的位置─亞軍…..
摩佬,多謝你,捨不得你。
祝君好運(Source: Sporting News)
[K11出品] 曼聯K角度 - 創世紀下的犧牲品
2018年12月18日,曼聯正式宣布時任領隊摩連奴離任,正式結束摩氏紅魔。首先我K11要利申一下我非撐摩或反摩,我最著眼的只有曼聯,而摩連奴所帶領嘅曼聯,曾經為沉寂咗3年嘅紅魔球迷帶來希望,因為摩連奴就是冠軍保證。摩連奴所執教第一季,引入世界級射手伊巴謙莫域,前曼聯青訓卻於祖雲達斯踢出身價嘅法國中場普巴,德甲MVP米希達恩及年輕有潛力嘅拜利。雖然聯賽成績談不上成功但卻成功奪取聯賽盃冠軍及歐霸盃冠軍,亦因歐霸盃冠軍而再度帶領球隊晉身歐聯賽場。