曼聯股東大會要點

曼聯係1 個鐘頭前開完股東大會,係個會到木仔講左幾點對曼聯嘅睇法,亦都有講到曼聯呢一年嘅營運狀況。

營運狀況:曼聯係2016 年頭三個月收入係一億二千三百萬鎊,對比上年同期上升左30%。

贊助方面:假如連續兩年入唔到歐冠,Adidas 嘅贊助會大幅減少30%。至於Chevrolet 同曼聯定左一個懲罰性條款,不過就會係曼聯降班先會生效。

青訓發展:對於曼聯有咁多有實力嘅青年軍出現感到高興,而U21 係過去四年拎左3 次冠軍,證明曼聯係青訓方面朝住正確方向進展。

一隊陣容:曼聯會繼續放水買人,目標係同呢兩年一樣繼續挑戰各項冠軍。之前兩三年洗咁多錢,都係因為要重建陣容。

人事任命:莫耶斯時期加入嘅 John Murtough 會擔任 Head of Football Development。

好多曼迷睇完個會都對木仔好不滿,覺得佢根本就唔了解足球。有D 就覺得木仔話曼聯一直挑戰緊冠軍係個大笑話,仲有曼迷要求係對般尼茅夫場波完場之後,將木仔紮係張凳到然後放係球場中心,因為仲有好多問題要問佢。最重要 係有球迷發現舊年股東會木仔對雲高爾高度讚賞,但係今年就完全無提過佢個名,或者會唔會係一個暗示?