小將韋洛克上一隊,隨時候命!

由於普巴同馬達受傷、靴里拉停賽、小豬離隊,曼聯中場人手極度緊絀!所以摩連奴決定向小將埋手,今次機會佢就交左比20 歲嘅韋洛克。呢名中場小將本來係阿仙奴青訓,不過係15 歲時就比阿仙奴放棄左,係曼聯試腳之後正式加盟。今季係曼聯預備組大放異彩,今季已經為預備組上陣22 場賽事。之前對利物浦預備組嘅賽事,就係靠佢射入致勝入球!其實韋洛克嘅好表現一早已經吸引到摩佬,亦都有好幾次機會同一隊操練,不過一直都無入選一隊大軍名單,今日機會終於來喇,希望佢好好把握,可以好似師兄拉舒福特咁一戰成名!