洛荷長抖

另一個係八強受傷嘅球員洛荷，經過檢查後證實左膝十字韌帶撕裂，需要開刀做手術，佢最快都要今年九月先可以復出，即係話今季佢已經收咧。依家曼聯已經傷左史摩寧同鍾斯，再加上洛荷，前後傷左三個中堅。係季尾聯賽爭前四，歐霸爭冠軍嘅情況下，接連損兵折將，對曼聯黎講真係一個惡耗。相信摩連佬會以白連特甚至係小將杜安沙比作為今季餘下賽事嘅正選中堅。由於幾個中堅都係容易受傷的男人，式者連迪洛夫會再次成為曼聯重點收購對象。

神話破滅？

ibrahimovic-injury-manchester-united.jpg

尋日曼聯雖然成功殺入歐霸四強，但就要付上沉重代價---伊巴同洛荷受傷。當中以伊巴傷勢較為嚴重，經過檢查後，伊巴右膝韌帶撕裂，唔單止今個賽季報銷，最壞情況起碼要休息到明年1 月。突如其來嘅受傷令到曼聯同唔同伊巴續約成為一個轉捩點，而相信對伊巴一直充滿興趣嘅洛衫磯銀河亦都可能「行人止步」。不過最大問題係伊巴自己會唔會係呢個時候就選擇掛靴？「得伊巴得聯賽」呢個神話或者會係曼聯呢到畫上句號。

伊巴累了

尋晚大戰之前，一睇到個陣容相信大家都嚇左一跳，伊巴謙莫域竟然係後備，反而係拉舒福特踢正選。摩連奴事後就解釋佢知道今季已經踢左42 場嘅伊巴太攰喇，不過佢都知道就算放伊巴係後備席，佢一樣隨時準備好落場。雖然依家就會覺得摩連奴部署做得好，但當時睇怕大家都會有一種「今次瀨野」嘅感覺。經過尋晚場波，摩佬應該都幾頭痕，究竟應該繼續用福仔踢箭頭？定係用番已經入左28 球嘅伊巴做正選呢？

摩連奴：福仔無與倫比！

尋晚踢得好嘅除左靴里拉，其實拉舒福特一樣獲得好高評價。係面對對方兩三個後衛時佢一樣毫無懼色，為對方防線製造龐大壓力。佢雖然踢箭頭，但好多時都見佢會係邊線出現幫手。摩連奴亦都察覺到福仔嘅優秀表現，仲大讚佢踢得好好！「拉舒福得係之前足總盃對車路士已經踢得好好，個一場佢都有機會入波，一樣係用速度壓過對手。」「今場佢入到波，令到球隊更有自信，表現更加穩定。」另外，摩佬亦都表示今場用啱左戰術：「其實我地無為左歐霸八強次回合留力，我只係揀左我認為最適合踢呢場波嘅球員落場。」「係史丹福橋，我地用同一套戰術，仲係11 個人時我地控制戰局。但係踢少一個之後我地比左機會車路士扭轉戰局。」「我地知道呢套戰術會令車路士踢得好辛苦。」摩佬仲同BBC 講今場贏波佢好開心，不過唔係因為贏左車路士，而係球隊好需要呢三分。「贏到車路士我無特別開心。」

靴里拉：我無心手球！

曼聯對車路士MOTM 靴里拉交出一個助攻一個入波，幫曼聯兩球淨勝榜首車路士！不過有人就質疑曼聯第一球入球助攻嘅靴里拉手球在先，應該足罰，但係靴里拉係Sky Sports 嘅訪問就唔係咁睇。「我唔係特登用隻手去掂個波。」「個陣我係跑緊，我都唔知個波有無掂到我，我無心架。」「係我嘅認知入面，如果個波掂到你時，你隻手係一個自然嘅姿態，就唔會構成手球。」靴里拉亦都大讚曼聯嘅表現，仲話今場近乎係完美。「車路士係榜首，佢地係今場創造唔到任何機會。」「我地贏在反擊，同埋我地控制戰局，今場贏波好值得開心。」

馬達收咧

曼聯中場馬達早前因為腹股溝受傷而開刀，佢之前都好想爭取係季尾再次為曼聯上陣。不過摩連奴就確實左馬達今季唔能夠再上陣，正式收咧。有記者問到摩佬馬達幾時可以復出，摩佬就答5 月尾，而曼聯今季最後一場英超聯賽係5月21號對水晶宮。所以今季英超應該都唔會再見到馬達，如果成功殺入歐霸決賽，就會係5月24號踢，不過馬達夠唔夠Fit 踢都係未知之數。換言之今季為曼聯射入十球嘅馬達，要打破自己係曼聯嘅單季入球(10球)紀錄，機會都幾渺茫。至於鍾斯同史摩寧，摩佬就話可以係5月中復出。

卡域克：我地踢得太懶散喇！

曼聯又再做和平使者！歐霸八強首回合曼聯領先大部份時間，點知最後5 分鐘被安德烈治迫和1:1。賽後今場隊長卡域克接受BT Sport 訪問，佢表示曼聯應該係支配球賽時入多D 波去終結球賽。「係上半場我地控制球賽，但係愈踢就愈懶懶閒。」「令人困擾係因為我地應該好輕鬆就贏波，但係我地做唔到。安德烈治只有一個機會就入左個頭槌，太令人失望。」「我地太懶散攪到控球權都失埋，對手變到踢得好舒服。球隊無創造足夠嘅入球機會，1:0 永遠都係一個好危險嘅比分，今場亦都再次證明呢個事實。」「作客和波1:1 其實唔係世界末日，我地嘅形勢都算唔錯，不過真係令人好困惑，今場我地唔應該只係和波。」「點都好，我地會保持正面，下回合會踢好D，希望可以殺入四強。」

拉舒福特的志願

仲記唔記得細個時作文大熱題目<我的志願>寫左D 咩？小編就記得好清楚，因為到今時今日都係無實現到...不過仲有好多人憑住實力、把握機會實現夢想！拉舒福特今日摷番8 年前自己嘅相同埋一段題為<將來與目標>嘅文字放左係社交平台。當年嘅佢寫左：「我希望自己嘅前途係一片光明，我特別想成為一個足球員。我想有一個與眾不同嘅生活方式，令到我屋企人同埋其他朋友都為我感到自豪。我呢世仔只有一個目標，就係成為一個職員足球員，希望我踢個隊波就係曼聯。」福仔恭喜你已經初步做到當日嘅志願，成為曼聯職業球員！作為曼聯球迷，大家都會想見到一個根正苗紅嘅青訓產品係曼聯發光發熱！

梳爾的救贖之路

4 月5 號，梳爾後備上陣搏得12 碼，令曼聯得以保持聯賽不敗，賽後摩連奴依然批評梳爾表現。「佢係好有潛質，但係佢要換一個更加有足球智慧嘅腦袋。」「佢今日踢得好，係因為我就係佢附近一路提點佢。如果係另一個半場，我諗佢嘅表現未必會咁好。」

4 月9 號，楊格受傷，梳爾正選上陣。梳爾雖然食左一面黃牌，但表現令人讚賞，包括摩連奴。「我會講佢嘅表現好穩健，完全無犯錯。佢表現得好有信心，亦都好專注。」「我60 分鐘換走佢係因為佢已經有牌係身，同埋主場球迷對球證施加嘅壓力。」

短短幾日，摩連奴對同一個球員嘅態度可以話係截然不同。有人會話摩佬立場搖擺不定，但係小編睇到嘅係球員係訓練場、球場上付出嘅努力，摩佬一直都有看在眼內，亦都唔會介意去打倒昨日嘅自己。而梳爾亦都為自己曼聯生涯鋪好一條救贖之路，當大家都認為佢態度消極令自己紅魔事業行將完結，但佢用口話比大家知佢好想留低，用腳表現比大家睇原來佢仲有大把貨賣。可能佢季尾仍然可以留低，但可唔可以穩佔左閘正選，就要睇佢往後造化了。

摩連奴又一次盛讚小豆！

今季曼聯係英超只係入得43 球，摩連奴就話一個好似小豆咁嘅前鋒可以加強曼聯鋒力，睇黎下季鋒線一定會有新球員加盟。摩佬亦都盛讚小豆，「曼聯陣中有好多有創造力嘅球員，不過佢地就欠缺入球觸覺。」「我認為小豆係依家隊曼聯，可以好輕鬆就入到20 球。」「就算佢每場都係踢得10-20 分鐘，入20 球都無問題。」「佢係天生機會主義者，個波係邊，佢就會係邊出現。」「龍門撲左球波出來，佢會係個到，入波。有隊友斬中，佢會預計落點，入波。」摩連奴認為伊巴入球量係前鋒應有入球數字，就算係其他進攻球員，都應該有一定入球量，但係曼聯球員無人做到呢個效果。佢亦都認同運氣同埋對方門將上晒身都係曼聯失分嘅因素。「剩係普巴中柱嘅次數都夠入健力士啦。」講到小豆咁好，唔知摩佬係咪真係會招攬小豆返來呢？

摩連奴已經決定贊奴沙去留！

22 歲嘅贊奴沙今季外借新特蘭，上陣24 場只係收獲一個入波。而係新特蘭輸比屈福特0:1 個場，賽後贊奴沙仲比新特蘭球迷柴台，主帥莫取斯亦都明言贊奴沙表現未夠好。贊奴沙同曼聯仲有一年合約，所以完成外借後佢將會重返曼聯。有記者問摩佬係咪已經決定左贊奴沙嘅去留時，摩佬就話：「係，我已經做左決定，不過我唔會係呢一刻話比你知。」睇番贊奴沙今季嘅表現，睇黎呢位前11 號仔被賣走嘅機會都相當高。

連加特續約四年

曼聯官宣同青訓產品連加特續約至2021 年，另加延長合約一年條款。自從2014/15球季入選一隊，連加特已經為曼聯上陣70 場射入11 球。連加特表示自從7 歲佢就係曼聯，每一次著起件波衫落場佢都覺得好自豪。而兩度係盃賽決賽為曼聯入波，令佢同佢屋企都覺得驕傲。佢亦都好多謝球迷對佢嘅支持。官方消息無提及連加特人工有幾多，不過外媒報導連加特週薪大幅提升200%，亦即係十萬鎊週薪。