[WKD手記] - 變
悶和修咸頓後，有部份主場球迷似乎以噓聲表達不滿，認為愛隊最近已經失左唔少分但心態仲懶懶閒，單單呢場波就反映到攻不銳守不穩嘅問題。進攻方面十五次起腳都迫唔到對面門將麥卡菲做啲高難度撲救，另一面就多得迪基亞繼續上身先幸保不失。隊波踢得差，好自然會歸咎於摩連奴，甚至開始質疑佢嘅管治手法，亦有球評家認為佢令到某啲球員愈踢愈差。盧卡古同伊巴齊齊養傷，意味住曼聯進攻套路一定要變，變得有幾快有幾成功就視乎筆者成日講嘅Plan B。如果呢場波唔合格，咁岩岩客勝愛華頓有無挽回你地多少信心呢？
盧卡古傷出令全隊要即時面對打短傳嘅課題，而當晚佢地完全交唔到功課。尤記得盧卡古季初經常係禁區頂現身迎波同中場打短做配合，但日子耐左佢淨係要係前場瘋狂搶點擔位Hold波已經分身不暇，隊內攻擊中場嘅表現無之前咁生，加上佢場場英超都踢足咁滯，佢慢慢就變返果種純中鋒嘅踢法。雖然左楊右華兩閘開弓製造到好多機會俾佢入波，但某程度造成左對高空波嘅依賴，普巴復出後首當其衝就要帶頭改善返中路進攻質素。
拉舒福特入替後，球隊嘗試推快節奏，縮短傳球距離，臨完半場前有一段踢得頗流暢。不過更加令人印象深刻嘅應該係米希達恩，因為淨係上半場佢已經浪費左三次反擊機會，而且幾乎倒模咁三次都左腳傳左去無人地帶。佢嘅身體語言反映到信心有幾低，好似完全唔知隊友想點唔知自己應該點做，再唔積極回復返狀態同心態，係曼聯嘅日子只會倒數得愈黎愈快。
下半場踢法反而仲退步左，再次放棄中路突破，繼續依賴側擊。當對手識穿中鋒搶唔到高點，兩邊出波威脅大減之餘，後衛就更易企位迫兩翼落底出波，呢點令到球評家將分析焦點放左係普巴身上。史高斯掛靴後雖然彈多過讚，但有一點佢講得無錯，普巴的確有哂任何中場需要嘅條件，但佢天生就係想同適合做致勝球員。唔係話無名英雄無價值，而係佢有能力同性格做最關鍵一腳，所以佢唔會係派路、卻奧斯果種風格，反而係識放長波之餘仲會殺埋入禁區嘅球員。
其實呢場波就算將普巴推前一格都未必會踢得出對愛華頓嘅水準，因為班球員真係好攰。微細如馬迪落中堅位攞波時兩隻中堅都唔散開少少拉空位就決定左賽果，踢到七十分鐘我已經認為最多都係和氣收場。連加特踢攻中處處現位，連馬達都要讓路踢返右中場，盧卡古踢前鋒時佢仲做到輔鋒工作，同普巴更加心靈相通，剩低要解決嘅反而係靴里拉踢防中同馬迪嘅體力問題。
曼聯要點捱過呢一段聖誕快車，關鍵係球迷願唔願意俾多啲掌聲，少啲噓聲。表現差如米希達恩咁，佢有幾多實力點會唔知，賞罰分明既摩帥都肯繼續俾時間佢，我地又點可以咁快放棄呢？梳爾之前咪又係俾摩帥批評到一棟都無，呢幾場進步左幾多有目共睹，要信球隊返緊正軌！
[WKD手記] - 三場不勝
兩個補時失波，成就左兩場極富戲劇性嘅賽事， 但同時傷透曼聯迷嘅心。Boxing Day返到主場諗住係時候踢返場爭氣波，結果要踢到最後一分鐘先拎得返一份。輸比曼城我唔難受，畢竟對手係排陣同發揮上的確贏半個馬頭，僅負榜首一啲都唔失禮。最近三場波睇完係憤怒多過失望，因為明明三場都秤贏對手，但全部輸自己唔集中。「運氣係實力一種」從來都唔係自圓其說、自我安慰嘅說話，而係奇蹟只會係你出盡力之後先有可能發生。唔好怨中柱多運氣差，反而應該檢討下自己點解會失呢六球波，點解有大好機會但把握唔到，留下失分伏線。球場上每一個決定都咁關鍵，一次失誤就消耗其餘八十九鐘嘅努力，相信先失兩球，最後力追到底嘅曼聯真係吸取到教訓。
對布里斯托城一仗我只係睇左精華，但都睇到對面真係有鬥心想係法定時間內解決曼聯，尤其係致勝球果個攻勢真係無諗住拖慢黎踢，心態已經秤先。曼聯即使派出半隊副選，實力同經驗都理應較對面高，但人地打反擊時我地總有一兩個中場球員慢慢踱步，睇死對家做唔出咩威脅。第二球失波就更加係心散招致，麥湯美尼、連迪洛夫同洛荷一齊走甩一個前鋒，除左唔集中同埋防奴無溝通之外真係無其他原因俾人地有個咁嘅單刀餐士。一班要副選就係咁送走左聯賽盃呢個可以搏表現嘅機會，無得怨人。
如果仲係費爵爺帶隊，俾李斯特城迫和後應該波Boot橫飛。對住以反擊為傲嘅李城失一球典型反擊本來唔係咩問題，但呢球係恥辱。眼見史摩寧要單打馬列斯，鐘斯同連迪洛夫竟然由中圈慢慢行返去，就算無華迪後上都唔應該用聽天由命嘅心態去守。如果肯一早起步，馬列斯就由主動變返做被動，亦唔會見到史摩寧同迪基亞嘅無奈樣。之後點樣接二連三地失機、做錯決定而無法拉開比數我諗唔洗點重溫，只能講呢班中前場果晚真係好抵鬧，而隊長普巴做唔到令隊友冷靜落黎嘅工作，反而成為埋心急魯莽嘅一份子。最後果球好難怪責史摩寧，反而要問點解無人掩護佢、頂佢個位黎踢，就算盧卡古無自覺咁樣做，場外嘅摩連奴都應該好清楚要落咩命令，而唔係由得佢地陷入混亂之中。
奧脫福球迷支持下，曼聯總算連追般尼兩球。下半場有一段攻勢非常入肉，令人回想起季初果種霸氣，但無法否認佢地一場比一場慢熱。後防組合因傷病問題而經常改動係會影響整體防守力，但絕對唔係踢得差嘅原因，畢竟季前部署已經考慮左人腳問題，反而係整體狀態下滑，出邊個都有唔少犯錯。球季去到呢刻失左唔少死球同大意波，可見前場搏罰球已經成為左其他球隊對付曼聯嘅著手點。
憤怒過後始終要繼續支持球隊，拉舒福特、馬素爾同盧卡古差唔多場場都俾人評擊，甚至講到要賣走要借走。其實佢地同當日俾人笑係契仔嘅連加特無分別，都係經歷緊證明唔到自己嘅難關，但你睇下連加特每次為紅魔入波果種驕傲、果種熱血令幾多人改觀。我地可以做嘅就係嗌大聲啲，令球隊盡快走出低潮！
[WKD手記]-藍關始終闖不過
終於黎到上半季最難一關，即使有風雪影響，係奧脫福地底發熱功能嘅幫助下，呢場曼市打吡仍然可以如期舉行。比賽結果我諗無一個曼聯球迷會接受，但同時證明左我心底裡一個諗法，曼城絕對唔係無堅不催，至少佢地未達到當年七冠王巴塞嘅高度。下半場曼聯用行動去表現出同曼城嘅差距無想像中咁遠，今次只係爭啲，而果少少可能就係爭左盧卡古嘅信心同狀態。
見到份出場名單我就已經有種不安感，首先係費蘭尼連後備都無，中場中就靠馬迪同靴尼拉把關。表面上一個高大一個肯跑，好似夠哂防守力咁，而有睇過佢兩個同場演出都會知道佢地雖然各有長短，但未能互補不足。靴里尼慣於緊身防守而馬迪以掩護中堅為主，兩人之間嘅空位反而成為對方進攻點。果然，頭十分鐘條中場線吃盡苦頭，面對住前場人數眾多嘅曼城，靴里拉嘅跑動接近白跑，但完全阻礙唔到迪布尼係中場用波。每次只要迪布尼受到壓迫，佢個近身侍衛史達寧就會現身攞波，前者幾乎唔使過份壓前，好似以前沙維咁墮後派牌俾捷西斯同辛尼就已經夠哂頭痕。眼見中場失陷，原本踢十號位嘅連加特都忍唔住要落返黎幫手，總算堵塞返中路同埋減少靴里拉經常要一打二嘅情況。代價係盧卡古無哂支援，進攻只能吊高波寄望佢可以拖到隊友後上幫波，而好明顯呢招唔多湊效。
後防係早段完全拿捏唔到適當嘅防守距離，捷西斯、辛尼經常可以係危險區域任意盤扭、愈推愈入搞到曼聯後衛更加唔夠膽出腳，導致上半場守得咁唔穩陣。下半場改善左咁多，應該係教練團觀察後作出嘅指示。呢場波雙方戰術鮮明，兩個領隊將自己最擅長嘅踢法拎出黎，一人踢半場好波，三個入波都係把握對方失誤而造成。死球失波永遠都係抵輸嘅，因為九成都係防守方出錯先會俾人用死球戰術得分。第一球點解前後柱都唔擺人？以往守角球一定有人企柱，今場無守柱就即刻失球執雞波，而盧卡古竟然俾人壓住哂黎頂都有相當責任。至於第二球就更加係佢一個人揹哂所有罪名喇，明明有足夠時間調整動作佢都無辦法清脆咁解圍，仲俾奧達文迪執隻靚雞。從慢鏡睇得佢因為場地濕滑同體力問題怕跣腳，做出左一個極唔自然嘅拉弓動作，亦總結左佢當晚表現。
兩三次大好機會把握唔到不特止，仲間接助攻左兩球俾對手，賽後魔獸成為眾矢之就梗架喇，但輸波係咪淨係一個人嘅問題呢？唔難發現盧卡古上陣時間甚多，一場比一場早出現疲態，落到場唔單只下下要同對面肉搏爭頂，仲不時要返後迫波Hold波。歐聯最後一場只需要和波就出到線，點解唔用其他球員輪換呢？又或者盧卡古真係狀態不足而伊巴又未能應付九十分鐘嘅賽事，領隊係咪應該要有一個後備方案？唔係要為佢開脫罪名，而係我地應該要理解贏輸都係整個球隊嘅事，何況佢一直都表現出球員應有嘅態度？由韋碧克、卡域克到華倫西亞甚至連迪洛夫都俾人笑係水貨、係契仔，最後咪又係憑努力憑表現贏返球迷嘅心。係魔獸甦醒前，我地唯有盡量體諒佢同穩守住第二位先喇！
[WKD手記] - 勝利的姿態
同熱刺一樣，阿仙奴踢曼聯之次果場都係大炒對手振士氣，加上曼聯有好幾個重心人物受傷患影響上陣機會成疑，我都怕呢場會好似悶和利物浦咁保守。點知呢場成為左今季紅魔最刺激嘅九十鐘，贏波之餘，球員上左重要一課 : 同樣以三分為目標，摩連奴究竟要求球隊以點樣嘅姿態去踢每一場比賽。
賽前阿仙奴今季係主場未嘗一敗，不過今晚只係十一分鐘就已經失左兩球，為呢場敗仗寫下無可挽回嘅序章。由於拉舒福特狀態下滑，本來就預計頻頻交到功課、又有大賽命嘅連加特好有可能攞返個正選位黎踢，但點估到佢係咁關鍵嘅賽事突然轉踢十號位，仲好波到令一眾haters大跌眼鏡呢？
頭兩球絕對係因為阿仙奴班球員慢熱嘅老毛病發作。華倫西亞截走高斯尼嘅橫乓，第一腳推得麻麻，但係蒙維爾殺到之時有你無你照射穿施治大細龍門，最緊要係睇到平時內儉沉着嘅佢都振臂慶祝入波，睇到我幾咁熱血。
槍手仲未意識到問題所在，紅魔反擊組合再次把握到對手中場同後防之間嘅大空地黎快攻。馬素爾巧妙地腳面一彈俾連加特輕趟遠柱射成二比零，呢球高斯尼以為唔使貼身防守就限制到馬仔嘅威脅，後者上半身完全無受到任何壓力同牽制，結果就俾佢係咁小空間交出助攻。
阿仙奴覺醒後先慢慢上力，攻擊手傾巢而出造成後防空虛，曼聯就更加大條道理等反擊。曾經有五至十分鐘係大家鬥攻，啲攻勢入肉到下下好似要入波咁滯，不過摩連奴絕對唔樂見一隊無紀律嘅曼聯。前場始終較多年輕球員，贏左兩粒會心雄都係人之常情，可能潛意識覺得只要鬥攻落去就可以重演八比二嘅戰果。眼見馬迪同普巴一齊壓上左條中場線，連加特做得太多衝刺連回防都無氣，摩帥就忍唔住出黎喝止住班球員，再係有球員傷停時指導普巴應該點樣完成上半場。
入場睇波梗係鐘意睇進攻足球睇入波喇，但難得係咁早階段領先兩粒，有無必要冒太大嘅險呢？要知道阿仙奴非泛泛之輩，如果咁天真以為佢地會打定輸數投降，咁同佢地初段犯下嘅錯誤又有乜分別呢？更重要嘅係，摩連奴不單只要求防守紀律，向前推進、打反擊時一樣要咁嚴謹。進攻固然要有自由度，但亦講求效律同節奏控制，連加特今場搶鏡之處不只在於進攻時同普巴有超級默契以及入攝觸角，而係佢身處攻中位仍然會盡力回防，甘心做普巴嘅跑腿，又會向阿記防線施加壓力。有見佢三十五鐘已經莫莫地，好彩兩邊終於漸漸踢返正常節奏，如果唔係分分鐘增加受傷機會。
後來嘅故仔大家都知道，迪基亞十四次撲救、摩連奴式有驚無險頂到完場。普巴因為危險動作領紅直停三場本土賽事，下場究竟可以點應付氣勢如虹、連反CUP都有埋嘅曼城呢？如果費蘭尼趕得切復出，或者呢個原班陣容都係唔錯選擇？只要保持到集中力，主場應戰最起碼可以不敗！
[WKD手記] – 擺大個頭
踢左接近半季，令筆者睇得最唔舒服嘅就係攻守平衡性。如果擺出保守陣式例如單鋒451，就會怕好似上年咁瘋狂和波失分;如果太過進取，分分鐘連果一分都無埋。無論係咪領先緊，我都會有種隨時輸返粒嘅不安感。我知，今時唔同往日，英超競爭激烈呀嘛，不過作為球迷就梗係想愛隊係場上有更強嘅統治力喇！
上週中派出防守力較佳嘅球員，結果又係多控球零入球，仲係最後階段輸埋而未能提早出線。雖然仲係好大機會小組首名出線，但不能否認曼聯上半場把握力差，下半場唔夠對手積極嘅事實。
返到主場對升班馬白禮頓，以為實食無痴牙喇，結果苦戰一輪先憑住一個烏龍球攞走三分，保持住同曼城嘅距離。呢兩場分別睇到唔同取態下曼聯要改善之處。當兩閘起用白蘭特、達米安、洛荷時，翼鋒好似毫無支授，單打獨鬥咁。唔係佢地唔肯壓上黎，而係現位唔合時，或者唔夠膽殺入禁區，始終無法分散對面中場同後衛嘅注意力。當左楊右華上陣時，兩邊進攻即時順暢好多，但同時加重左中場中嘅防守負擔，俾人放過頭波打反擊屢見不鮮，踢三中堅時更加經常出現中堅要單對單防守嘅驚險場面。對弱旅可能唔係好明顯，但當列強專攻楊格果邊就會變成左路防守力不足，反而要馬素爾或福仔落黎幫波。黎緊作客阿仙奴究竟會出狀態勁弗嘅楊格繼續爆邊丫，定會出達米安大踢穩守突擊呢？呢下就考摩連奴功力喇。
中前場方面，普巴復出後再次成為進攻重心，係中路有一定能力硬闖，唔使再局限於兩邊出波。進攻自由度大左，代價係中場甩波風險高。由於普巴踢後一格又鐘意上腳造波，一個失誤就中門大開。點解咁多球隊唔介意一開始就死守，因為曼聯踢得愈急中場壓得愈上，後面就愈多空位俾人有機可乘。現階段馬達、米希達恩同時啞火，普巴分擔十號工作無可厚非，但如果十號位踢得好仲需唔需要佢經常引球推進呢？還是直接將佢推前一格，防守工作直接交俾馬迪同費蘭尼/靴里拉呢？費蘭尼最近在續約一事遲遲未落實，但鬥志十足嘅佢應該唔會被呢啲事影響場上表現，星期六晚好大機會正常上陣，用高度同硬度直接衝擊阿仙奴條中場線。
作為常任單箭頭，盧卡古最近嘅把握力實在慘不忍睹。即使佢好努力為中前場創造機會，甚至戰至最後一分鐘都勤力協防，但係門前將半機會轉化為入球嘅工作佢就仲未做得夠好，尤其係信心下滑時佢嘅處理會有所遲疑，失去魔獸原本有嘅射手本色。現階段仲要評估伊巴體能足唔足夠取代盧卡古、拉舒福特可唔可以踢中鋒等問題，如果解決唔到可能就要係一月買正前鋒做替身喇。
既然太保守都未必換取到勝利，不如擺大個頭，係酋長球場同阿仙奴對攻！
[WKD手記] - 大師兄返黎喇
未開波已經充滿期待，因為一個個久違嘅名字重現係出場名單上。洛荷、伊巴雙雙係韌帶受傷中康復過來，普巴更加一黎就正選上陣，總算減低左鐘斯受傷對曼聯嘅影響。雖然今仗失左球無謂波，但激發左球員進攻嘅慾望，要不是主力提早換出，今晚真係變成奧脫福入球派對。
曼聯得唔到一個理想開局，普巴復出第一仗即刻拎返中場控制權，隊友紛紛讓路俾佢發板。馬素爾、拉舒福特鮮有同場雙翼齊飛，滿足左唔少球迷嘅願望，但同時解釋到點解摩連奴甚少咁樣排陣。兩人都慣於逆足踢左邊，是但一個踢右邊又會踢得唔自然。拉舒福特係右路照樣能夠落底斬靚波，但突破效率就爭得遠，畢竟順足切入中路時嘅盤扭動作、視野都會完全唔同。開賽頭半個鐘幾乎見唔到佢地兩個同馬達有啲乜野實際嘅配合，非常依賴兩個防中從後殺上黎開路。
為左配合前場進攻，連馬迪都經常離開崗位，有時仲企得前過普巴。史摩寧同連迪洛夫前面嘅空間愈黎愈大，用黎俾紐卡素打反擊一流。繼上次犯左個業餘級數嘅失誤黎，呢個失波佢又一次需要負起好大責任。因為掛住望波而失平衡絕對唔能夠接受，何況英超仲有大把球隊擅於傳中，如果佢真係得咁嘅水平就真係令人擔心喇。不過，我相信佢實力不至於此，早段怯場導致失波後佢反而放低左心理包袱，做返簡單嘅傳球同攔截。踢完上半場行緊返去更衣室時，佢已經神色自若咁同隊友傾計，知道自己雖然犯錯但唔可以俾呢件事拖垮往後嘅表現，呢種恢復力令人刮目相看。睇黎佢唔屬於心靈脆弱嘅球員，呢個階段盡量拎多啲出場時間可以幫更加快融入球隊，揹起呢件紅魔波衫。
追成平手後曼聯掌握返節奏，原來踢得好生嘅舒爾維同基爾漸漸無波到腳，只能返後場幫手協防，失埋第三球後就再無力反撲。馬達靠右邊發展反而有更多機會比波打短傳，佢就好似華西嘅潤滑劑咁，兩個人打條邊線時攻守都得心應手。至於左羊就愈踢愈有，最近啲扣大位傳中落點恰到好處而且弧度十足，無論係柱躉嘅盧卡古定後上嘅福仔都有機會頂入。唯一不足之處係有時壓得太前回唔切防，呢點要同馬迪夾多啲去搵出平衡點。
成場波最振奮人心嘅當然係伊巴重回戰場喇！我同幾個朋友睇直播果陣都又興奮又緊張，一邊心諗伊巴真係超人黎架，一邊擔心究竟佢係咪真係有足夠狀態踢返呢咁高強度嘅比賽。見到佢差啲用功夫腳窩利入波，我就知佢已經戰勝左心魔。佢回歸唔單只可以加強攻力，所有隊友都有種"大帥兄返黎喇！"嘅感覺，只係短短一年就俘虜左我地嘅心，唔通佢真係有魔力？今季佢好可能踢攻中，馬達同米希達恩要加把勁，唔係就俾人搶走十號位架喇！
[WKD手記] - The-Better-Team-Won
史丹福橋對特別的一個當然有特別意義，身份換了，今次只可以靜靜地空手而回，再無之前嘅氣燄。比數上無大敗已經是對曼聯最好嘅消息，否則做成嘅傷害就未必係一兩場波咁簡單。曼聯有嘗試反客為主嘅態度令球迷振奮，執行起上黎就係第二件事，當中有幾個決定令人摸不著頭腦。
對熱刺時已經覺得曼聯對三中堅嘅掌握比對手差，最後總算力保不失。今仗繼續同樣陣式其實唔意外，但踢落完全係另一種風格。配合五人中場嘅壓迫，防線比以前壓得前，曾經係比賽初段壓制住車路士係前場嘅傳球同上腳。去到呢度我尚且明白，但拜利同鍾斯嘅防守範圍就真係令人費解喇。佢兩個為史摩寧左右護法，經常要對夏薩特進行迫搶，甚至乎走到中圈位置。上場艾達維特同維頓漢活動範圍係大，但都不至於要離開防守崗位咁遠掛？如果要兩個中堅好似上次靴里拉緊貼夏薩特咁滿場跑，我地仲要果五個中場黎做咩呢？結果車仔每放一個跨越中場嘅過頭波，我地就陷入另一次危機。
米希達恩。數據上佢的確比馬達好，但我再重申係呢一刻佢仲係一個需要人地創造空間俾佢去造波嘅球員。如果曼聯踢緊一隊求和、放棄控球嘅對手，需要人打破膠著狀態，佢可能比馬達更加適合。事實上每次大賽佢都接近隱形，正正係因為佢唔擅於配合隊友防守，亦無法分擔搶奪控球權嘅工作。另外，佢封位意識不足，好多時隊友已經拍埋去自己果隻，佢先係傳球目標嘅四五個身份以外，浪費左自己同隊友體力之餘，352嘅五中場優勢亦隨之消失。我唔認為佢懶惰或一無是處，只係倒戈嘅馬達好似更加清楚要點踢先威脅到車路士。被換出之後已經見到佢信心盡失，希望摩連奴可以好好保護佢，因為佢絕對有能力為曼聯創造更多。
曼聯最有機會入波果球頭鎚，楊格K角位斬出黎俾無人看管嘅福仔頂中波底略楣而過。呢球一啲都唔可惜，因為係拉舒福特自己失機。睇返慢鏡佢係因為古圖斯出迎嘅來勢洶洶而瞇埋雙眼，原本起跳時間完美但最後判斷失誤。為此而責備佢係有啲苛刻，不過呢球的確可以處理得更好，如果佢係呢一球度吸收到經驗，一季就可能入多兩三球救命波架喇。經常講嘅毫釐之差，其實就係呢啲最最最微細嘅決定、本能。
莫拉達頂入教材級頭鎚當然抵讚，但曼聯條防線先得人驚。中堅嘅企位正好說明左以上戰術唔湊效，當中最大問題係三個中堅無控制好大家之間嘅距離，上前標波後經常漏左一個大窿出俾人放波。有無覺得似曾相識？早係對熱刺時已經試過同樣失誤，不過阿里把握唔到咋。要經歷嘅課題始終都要面對，唔會每次都咁好彩。
知恥近乎勇，摩連奴黎到曼聯後比以往更願意試新陣式及新戰術係好事，只能講句佢輸左俾呢個陣式嘅專家。曼聯呢刻最需要嘅唔係必勝戰術，而係一個咩情況下都咁有鬥心嘅人去重新推動球隊，我覺得會係近況低迷但持續有火嘅盧卡古，你呢？
[WKD手記] - 福馬雙星
由於聯賽接連失分，表現又未如理想，曼聯爭冠嘅可能性已經屢屢受到質疑。曼熱大戰本來就係一場唔輸得嘅波，不單只是三分唔輸得，而係球員嘅信心都唔可以再受到打擊(特別係進攻球員)，否則肯定令往後嘅幾場波更難踢。熱刺大炒利物浦後士氣大增，連著名魔迷李克勤係賽前都唔敢太樂觀，我地又點敢話勝算高呢？最好嘅結局發生了，雙方踢出一場高水準賽事，而曼聯就靠果一次機會分出勝負。
呢場波彷彿以防守黎比拼，兩邊都擺出三中堅陣式，雙方防守都有上乘表現，熱刺甚至乎對呢個陣式有較佳掌握。如果話曼聯班中堅少甩位、專注防守，咁熱刺班中堅就係活動範圍高、對翼衛同防中支援比紅魔更出色，踢活左352轉守為攻嘅精神。防守上曼聯有一樣野優勝：靴里拉。佢踢法未必有上季咁富娛樂性，但有無發現踢親大戰對面個Key Player都被凍結/無乜上腳機會？夏薩特、古天奴、艾歷臣都無法係自己慣常位置造波，正正係因為有佢專人服侍。靴里拉頭四十五分鐘緊盯艾歷臣，下半場見艾歷臣威脅漸減，索性將專注力放係阿里身上。
勝負果一線之差就係福馬雙星，唔係福仔唔係馬仔，係福仔加馬仔。先講盧卡古同拉舒福特係前場俾到好大壓力對面三個中堅，雖然無失波但一邊要同魔獸爭頂，一邊要同拉舒福特鬥哨落腳攔截已經消耗左佢地好多體力同腦汁。七十分鐘換入馬素爾對佢地黎講係一個惡夢，入球亦係體力原因直接造成。成場都好集中嘅艾達維特迎高波時俾盧卡古假動作呃開左半步，就係呢半步令盧卡古二傳到球靚波俾馬素爾，負責跟佢嘅戴亞無預見到呢個情況，於是又遲左半拍先起步。毫釐之差，其實包含左幾個人嘅決定同判斷，絕非純運氣咁簡單。
縱然射入關鍵球，加利佬仍然對馬素爾有微言，認為佢水準飄忽同比賽心態不足有關。佢作為球評家經常出入練習場，睇到嘅絕對比普通人多，我純粹以紅魔迷尚可理解佢嘅觀感。講到馬素爾同拉舒福特，我會即刻諗起巴西孖仔閘達施華兄弟。加盟時原本法比奧被寄予更高期望原本，後來拉菲爾發展得俾佢更加好，曾經有一段時間係右閘必然正選，點解？拉菲爾雖然衝動但個性鮮明，失波後仍然會抬起頭力追，魔性比起內斂嘅哥哥強得多，自然容易融入球隊。馬素爾喜怒不形於色，有時隊友都唔知佢心裡面嘅諗法又或者係當下嘅情緒，缺態時更加見到佢會同自己鬥氣而影響決定，呢種距離感令到佢好似得自己一個人戰鬥緊咁。拉舒福特係發揮上同樣未夠穩定，雖然面容有啲稚氣，但佢同隊友之間嘅交流令到成隊波好有動力，無論咩比數都唔會變得消極。放開黎踢喇，馬仔！
[WKD手記] - 地獄賽程迎熱刺
連續踢四場作客波，而且英超﹒、歐聯、聯賽盃嘅對手唔弱，無論狀態幾好都會愈踢愈辛苦喇，不過曼聯就係咁樣俾同市宿敵曼城拉開左距離，優勢有成五分之差。以表現黎計，能夠兩勝一和已經算係不俗。輸俾哈特斯菲激嬲左好多魔迷，連迪洛夫更加因為犯下低級錯誤而淪為笑柄，英國傳媒可能已經準備好一塊水貨王嘅牌匾俾佢。曼聯可唔可以盡快重拾信心，無左幾個主力嘅情況下都能夠踢得出季初果種霸氣呢？其實不要問只要信，哈特斯菲就係因為球迷全力支持同打氣先守得住曼聯最後階段嘅狂攻。
我睇完呢場波之後一啲都無嬲，優勝劣敗，踢得好就應該獲得勝利。曼聯係咪踢得好差？除左兩個失波之外，佢地算係中規中矩，下半場無論係進攻同防守上都踢返出水準同回復冷靜。咁當然喇，係咁高水平嘅比賽只要一下失神就足夠全失三分，何況係幾次失誤？不過我就不盡認同摩連奴對球員心態嘅指摘喇，可能佢知道球隊只要保持集中應該根本可以避免落後，先會咁嬲。
上半場有三位球員踢得特別差:馬素爾、馬達、連迪洛夫。馬仔係好早階段就領黃，其後仍然多次犯規，主場球迷梗係乘機起哄向球證施壓，希望將佢趕出場。睇得出佢本身被呢張黃牌影響左發揮，無法專注返自己職責嘅情況都幾明顯，而呢種不安慢慢係隊友之間慢慢發酵。馬達要為第一個失波負上唔少責任，係中路做到嘅野唔多。數字上曼聯擁有絕對控球優勢，但大部份時間進攻都靠兩邊，中間唔敢推得太前，你見呢幾場波盧卡古少左接應短傳就知最近曼聯少左一瓣路數。其實有靴里拉同馬迪坐陣做防守掃蕩已經足夠，馬達應該踢得更加放，結果兩者都係半場被換走。
連迪洛夫臨危受命，點知只係用左十幾分鐘就大出洋相。第一球佢可以話係盡左力拖延快攻，不過拍埋去恩斯就顯得步伐好重，令人諗返起佢係歐洲超級盃俾巴爾用速度欺凌。第二球更加係完全錯判，我就覺得唔係技術問題，反而佢無做好心理準備就落場。如果佢本身唔係後備入替，好可能同利物浦嘅路夫蘭一樣咁早早被換出。摩帥認為佢現階段信心不足，要一段時間後先再出戰。要適應英超嘅作客氣氛同節奏唔容易，呢位中堅潛力唔差，最少應該達到伊雲斯嘅高度，希望伊巴幫幫佢喇！
落後之下曼聯反而放低左包袱，拉舒福特同米希達恩為中前場注入新動力，哈特斯菲決定守到完場，後段壓哂上去攻真係熱血十足，所以我絕對唔質疑佢地嘅爭勝心。如果要為呢場敗仗定一個原因，應該係因為佢地無諗過升班馬會咁難踢，形勢變得太差先醒覺。
小勝賓菲加未必夠說服力，輕取史雲斯就證明曼聯擁有控制戰局嘅能力，係主場迎戰TOP弗嘅熱刺之前可以挽回信心係好事。如果輸一場就識得反省、進步，咁可能係件好事，黎緊呢場波應該會激過雙紅會，但我地都係要坐和望贏！
[WKD手記] - 防守反不了擊
期待已久嘅雙紅大戰最終以零入球結束，而要為賽果感到慶幸嘅係曼聯。作為一場大戰曼聯當然踢得唔夠好喇，幾乎俾利物浦㩒住黎攻，反擊機會少至又少，執到一分算係好彩。盧卡古再次被外界點名批評，話佢大賽又隱形，但係咪佢一個人嘅問題呢？摩連奴賽前部署係咪只求一分，中途又有無諗過要改變戰術？無論如何，我相信如果同對方鬥搶下場可能更加慘，季尾我地就知摩帥咁踢係啱定錯。
賽前公佈嘅出場陣容有達米安、華倫西亞同埋楊格三隻閘，我當時仲好肯定曼聯將達米安擺做左中堅，楊格踢左閘幫助前者一齊看守沙拉，實行黎個532守住兩邊。現實就係踢返一套慣常嘅451陣式，達米安踢返左邊，楊格就踢華西前面果格。右楊右華發揮尚算平穩，但就更加突顯到左路攻守都有不足之處。成場波沙拉一攞波二話不說就直接突破，盤扭成功左幾次之後信心大增，創造左好多驚險鏡頭。當然你可以話因為利物浦左路無左文尼先顯得曼聯右邊輕鬆，達米安亦都叫做出腳準、守得住，但係每逢佢出場嘅比賽，邊線進攻真係會好疲弱，上落走動較多嘅楊格或者係更佳人選。
得中場得天下，係呢一環我地今場絕對係處於下風。一開始雙方小心翼翼，兩邊都唔敢亂攻，但利物浦係節奏仲係極慢嘅時候選擇控住黎踢。二十分鐘打後利記加快行軍速度，曼聯雖然擋得住啲攻勢，但觸球次數愈黎愈少，結果處理反擊嘅質素都隨之下降，成場波只有一次贏波嘅機會。
無左兩個大隻中場，靴里拉終於有機會正選上陣，而呢場難啲說服到摩帥俾返個正選位佢。防守上佢算係幾專注，沙拉踢得咁Sharp唔多唔少係因為佢盯到古天奴無乜機會造波同遠射，情況有啲似對車路士時死跟夏薩特咁。奈何佢同全條中前場一樣，傳球成功率不足八成 (只有馬迪、連加特超過)，難得拎返個波又好易咁送走。中場失利又點只因為佢一個丫？馬迪今場刻意留後，只專心做兩位中堅嘅屏障，應該係收到領隊指示而一改前幾場嘅踢法。但正正係保守所以靴里拉踢得咁吃力，進攻時又同兩閘一樣俾唔到足夠支援米希達恩、馬素爾同盧卡古，啲波就上左去就傳唔返黎慢慢搓，控球就慢慢變得一面倒。
盧卡古錯失唯一入球機會故然值得檢討，但佢成場波無乜供應亦係事實。佢唔係懶惰嘅球員，不過作為單箭頭佢唔應該成日返去後面要波，反而要一直牽制對方一對中堅。邊個踢得最唔合格？我會話係米希達恩，佢對強隊隱形程度不下於盧卡古，呢場亦不例外。摩連奴應該好清楚只有踢強勢足球先會發揮到佢嘅能力，佢唔係四六/三七波時搶返主導權嘅球員。以防守表演黎講，曼聯算係做到賽前部署，但摩連奴如果想主守的話點解會出佢做正選呢？下半場換入福仔同連加特但為時已晚，因為馬迪同靴里拉已經無乜進攻嘅意志同信心。
對上一次國際賽後我地有好明顯嘅體力問題，加上高普擅於踢高壓足球，或者就係摩連奴選擇呢個戰術嘅原因。不失球和波唔係問題，但必須重新考慮排一個點樣嘅中場先可以製造到有效反擊出黎。
[WKD手記] - 蓄勢待發！
國際賽期前在主場迎戰頹勢未止的水晶宮，三分應該十拿九穩，最後亦不負眾望大勝四粒。同樣是四比零，但今次是贏得最有說服力的一場。與其話係曼聯踢出超水準，不如話水晶宮完美解釋左點解佢地處於榜尾而未入一球。當然，曼聯全場控制住局面亦係實力嘅表現，作為雙紅會嘅前一場比賽，我地當然收貨喇。
比賽發展異常簡單，就係我地上下半場各一球早段入波令水晶宮完全無法執行賽前部署。上半場客隊尚有積極嘗試迫和，但下半場幾乎是抱住破蛋、爭取個人表現嘅心態黎踢，試問咁樣又點可能踢得贏而家呢隊團隊至上嘅曼聯呢？
賽前有傳受傷而無法上陣嘅盧卡古同費蘭尼都出任正選，前者繼續交出入球，爆炸頭更加做埋最佳球員添。無論外界點質疑曼聯今季重奪聯賽嘅可能性，佢地都無法否認呢隊波係進攻上係非常立體嘅。
表面上，我地買入盧卡古後就係為左靠高波搵食，甚至似當年莫耶斯九九八十一斬戰術。非也！以前我地每一次傳中只係因為中路塞車、組織乏力而迫於無奈地斬出黎;而家係只要有波在腳，打短波定長波我地都有方法入波。對防守方黎講，呢度已經有好大差別，因為佢地唔可以再係禁區內佈防，而要將防守範圍向外推。
馬達、米希達恩同拉舒福特各有突破同中路造波嘅能力，有更多空間俾兩閘疊馬助攻，所以見到近兩季有好多機會Early Cross，亦造成唔少入波。再者，由於高點選擇不再得費蘭尼一個，所有死球都變得有威脅，仲記得費爵爺離開後幾季以來差唔多未試過用角球造成入波，人地就更加唔怕將個波清出底線。今場馬達入果球波正正顯出左當人地掛住盯實盧卡古費蘭尼時，反而會走甩較矮嘅馬達，防守球員走少一步就會空哂任人射。
防守方面今場可謂完全無受威脅，雖然水晶宮係上半場有一小段時間嘗試反撲，但實質做到嘅攻勢少之又少。史摩寧久休復出，頭鎚判斷準確、生波處理冷靜，有望重回受傷前嘅狀態。鍾斯繼續當弗，可惜賽後又證實受傷，連國際賽都無法上陣，雙紅會可能見佢唔到。
十字軍名單陸續增加，但摩連奴已經有哂心理準備。今季全隊狀態有明顯提升，接近每一個位置都有後備，稍一不慎就會被搶去正選位置，所以傷兵不會影響爭冠心態。摩帥之前用冷淡嘅方式回應普巴傷勢就係為左向球員重申球隊目標，免得佢地分心。
國際賽後兩日就要作客晏菲路球場，未知曼聯會唔會踢得守勢一啲，但我好有信心佢哋可以踢出水準！