[WKD手記] - 變變變
屈福特季初四場全勝令人眼前一亮,狀態飄忽嘅曼聯自然唔敢輕敵,尤其而家每場都有基本要求:一係贏波一係踢進攻足球,兩樣都做唔到就即刻敲起換帥警號。利物浦全場壓住熱刺嚟踢又係贏一球;我地踢得不過不失又係贏一球,勝負之分就喺可以爭咁少,而我地呢三分最後由迪基亞係袋口執返嚟。由下半場睇得出解放中場後嘅弊端,唔難明白摩連奴點解一直都咁抗拒進攻中場,但哭笑不得嘅係佢真係無退路,時勢迫佢一定要跳出保守觀念,險中求變。
今季微調甚密,每場攻守都有不同理念、戰術,作為球迷當然大開眼界,更令人佩服嘅係班球員執行力提升咗好多,落到場全部都好清晰自己定位同工作,唔會俾人“成場唔知佢做過啲乜”嘅感覺。今場最有趣梗係費蘭尼踢變型中堅/防中,防守時只要有任何疑似長傳,佢都會直接搵甸尼同格雷嚟守,以防佢地有任何衝頂機會;進攻時一對中堅會平排散開等佢去分波。因為上半場嚴格執行踢法所以留下好深嘅印象,單單係肯平排三中堅已經令傳球選擇大大增加,缺點係持球者只要出錯一次就等如中門大開,所以身型瘦削嘅佩利亞幾乎唔可能搶到呢個位置。戰術對兩邊中堅嘅走動要求高,好多時費蘭尼會刻意等埋中堅上嚟先開始組織攻勢,所以節奏偏慢。兩閘企得好前但又唔夠侵略性,情況有如熱刺進攻時老鼠拉龜一樣,甚至好容易俾人放對角過頭波,楊格有好幾球睇落似失位但其實係戰術效果。毫無疑問前場人多能夠壓制到對方,加上普巴上半場發揮出水準,領先係合理嘅。
戰至六十分鐘,呢種戰術漸漸走向崩潰。踢完國際賽令體力下降當然係原因之一,屈福特下半場踢法非常直接,瘋狂爭頂之後曼聯即使有反擊機會都因為轉數趺、隊友跟唔切而白白浪費。更大問題係上次提及嘅中場工作量過高:今季普巴同馬迪都可以上去進攻,但防守要同以前一樣效率。有控球權還好,回防唔切果陣就要費蘭尼上去補位,放棄掩護中堅嘅職責,甚至乎要用返連迪洛夫做波。兩閘同樣愈踢愈辛苦,華倫西亞近乎爆炸嘅情況下要盧卡古返嚟幫手,仲特登換埋麥湯美尼去支援佢。究竟係班球員體力未回復,還是係上半場嘅踢法本身就預支體力?相信要再對高Q大棍型球隊先知道,因為曼聯絕對唔會用呢個陣去踢啲有快翼嘅球會,否則兩閘必然出事。
最後必須譴責馬斯亞,單憑二十分鐘嘅表現就足以了結佢喺曼聯嘅生涯。反擊處理得唔好、走位麻麻呢啲尚可以歸咎於出場時間少,但佢唔追波令馬迪要做代罪羔羊就無得抵賴。哪怕佢全速回防都追唔到個波,馬迪起碼可以選擇拖延進攻而唔係格硬犯規。早一個月,32歲嘅朗尼係第96分鐘做Last man,攔截完再交出助攻。球迷可能有千百個原因去解釋係曼聯對佢唔住先,但作為一個職業球員落場盡力踢係唔應該要原因嘅。朗尼都大唔過球會,你呢?
[WKD手記] - 差少少的奇招
曼聯好耐都無試過喺主場淨吞三隻蛋,摩連奴被炒嘅呼聲越嚟越高,嚟緊呢三個月每一個比賽日都可能係佢嘅最後一場。大敗,但無乜人會否認呢場係開季以嚟曼聯踢得最積極嘅九十分鐘。輸比白禮頓會嬲係因為以呢個陣容唔應該踢得咁消極咁無冒險精神,相反今場輸到三比零嘅時候球迷仍然大聲吶喊唱歌,正正表達咗佢地支持球隊放膽去攻嘅聲音。當醜陋都拎唔到三分,摩連奴又四面受壓,曼聯就無唔進攻嘅條件。大方向正確,但輸個人質素,你地又點睇呢?
單單係出場陣容已經夠哂大膽,點知落到場仲有驚喜。原本以為放棄邊路進攻轉踢鑽石型442,原來係352先真,更令人估唔到嘅係右中堅竟然係靴里拉。呢位通天老棺有活力有智慧又肯搏殺,單單講後防控球時佢跑住拉邊現位已經好過拜利,甚至以身作則咁示範咗後衛要夠機動先可以將個波盡早送上前場。可惜中場球員轉踢後衛必然會出現一個問題:反越位意識薄弱。面對快攻佢出於本能地想回防補位,但注意到已方人少防線高嘅中堅決定壓前擺越位陷阱。呢個失誤導致第二個失波都唔怪得佢,畢竟華倫西亞轉踢咗後衛咁多年都仲係會包越位,唔係咁易㗎。喺度必須強調呢個變陣屬於奇招,未來其他球隊將會有所準備,相信淨係放個英式高大前鋒專攻靴里拉已經好頭痕,所以長遠嚟講未必喺上計。
今場戰術執行得好好,團體性好強,偏偏三個失波都係輸個人質素。簡尼頂入一球咁乖巧嘅波令人心服口服,起碼唔係因為鐘斯走漏俾人任頂。兩人生涯發展大不同,後發先至嘅簡尼已經成為英人第一中鋒;鐘斯早早成名但就一直被傷患影響,呢球鐘斯已經盡跟,但嘗試起跳時已經俾簡尼上身嘅力完全壓倒,可以想像到果種失望同無力感。其餘兩球都無須多解釋,包括埋連迪洛夫嘅三個半中堅都各有不足﹐確立咗摩連奴夏季求購中堅嘅理由。再望下收購目標之一嘅艾達韋特點樣殺哂啲波,同曼聯班後衛形成強烈對比,呢場波實在夠哂諷刺。
盧卡古再次失機成笑柄,問題又回歸基本︰正選踢得唔好但又無後備頂佢個位,領隊同球會都要負責任。今仗三個中場中都幾多空間發揮,只係連加特下半場受壓令觸球次數減少,費特除咗最後一腳差啲之外係進攻上都幾有位置感。梳爾同華倫西亞踢得唔錯,即使無經常落底但都傳到幾腳有威脅嘅early cross。今場二十個射門裡面有唔少都係大機會入波,同平時啲浪射唔同,係真係有組織有空位先射。
未來仲會唔會咁進取要視乎摩連奴心態如何,當下難題反而係球迷接唔接受到佢同時棄用山齊士、拉舒福特同馬斯亞呢?而且352作為一個必須主攻同搶控球權嘅陣式,似乎好難可以係客場發揮作用,對手只要成功壓迫兩翼就已經令我方中場做唔到overload嘅效果。無論如何,嚟到第三季我認為球隊有兩套踢法嚟應變係好基本嘅事,希望我地盡快搵到Plan B,否則不停要啲球員轉位其實係害咗佢地。
[WKD手記] - 久違了的最差
全失三分近幾年已經唔係新鮮事,但輸到見唔到反勝曙光又係另一種層次,對上一次場波都未踢到一半就有絕望感已經要數到一二年作客俾紐卡素大炒三粒,當時仲係費爵爺教緊。我都算係相當包容嘅球迷,但今場真係由球員到領隊都要鬧,因為唔係令人失望咁簡單,直頭係唔值得球迷入場嘅表現。
本身排陣出楊格踢右閘係個無可厚非嘅決定,事關達米安上場都俾人爆到死死下。問題在於佢好多波標得太前,同整體防線距離太遠,以致身後嘅拜利要同時兼顧左右兩邊嘅過頭波,成條防線得一個人想壓前係無用㗎。至於中堅就絕對係輸波罪人,連迪洛夫第一球難辭其咎,一個好典型嘅走遲半拍就俾梅利攝咗前柱彈入;第三球當費特係中場失去控制權俾人打反擊時,拜利因為要盯實右邊嘅梅利,根本無可能控制到越位線,但連迪洛夫就嘗試衝出嚟令哥斯趺落越位陷阱,呢個連環失誤間接令拜利喺禁區入面犯規。除咗呢兩下之外,我認為連迪洛夫係各方面都有進步,最少肯積極配合迪基亞開短波,唔輕易放棄喺後面開始組織攻勢嘅機會,正式踏上用波型中堅之路,要追上全盛史摩寧非難事。
拜利今場可謂露哂底,不幸地確立咗我一直都認為佢被高估嘅理據。第一球佢其實唔一定要立即包楊格個位,因為費特已經回緊防理應可以限制對手進一步帶入禁區,自己企好危險區域清波就足夠。如果呢個只係佢唔好彩選擇錯誤咁都情有可原,但留意咗咁耐唔難察覺佢只看眼前波,不顧身後位。放返喺呢個情況,其實佢好可能無衡量過等費特補位會唔會比較好,因為佢根本睇唔到呢個選擇。今季開始佢開始踢Last man同埋指揮越位線,熱身賽對祖雲達斯失過一球破越位,今場更加睇到好多過頭波喺斬起咗佢先開始搵自己要mark嗰個喺邊。最後就係佢連走位都比以前懶惰,迪基亞控住個生波時佢竟然可以慢條斯理咁行幾步先發覺自己要拉邊,但對手一早迫到埋嚟喇。呢啲看似"好少事啫"嘅細節,最後就會變成出一個球員實力同潛力嘅差距。大局觀比起個人技術更緊要,因為前者唔會隨年紀流逝,仲會令一個後衛係體能下跌時仍然調節出適合自己嘅踢法。
進攻今場大可以拉埋一齊簡單講,不要分那麼細,個個都踢得差。差不在個人技術同發揮,而係心態。踢到下半場幾乎每個進攻球員都投訴判決,心裡面果種迷失愈滾愈大,仲傳染埋自己友,情況就等於尼馬最渣嘅時候就係佢不停投訴、插水而唔係每球都專心去盡咁。
進攻毫無部署可言,責任自然落喺摩連奴身上。第三季喇,我唔係要求曼聯踢到曉飛,但如果進攻同Day 1一樣嘅話,你點說服球迷我地係進步緊?佢講過當佢隊曼聯不變應萬變或者作出嘗試而失敗都會被狠狠抨擊,可能佢其中一個新嘗試就係用上場踢得唔錯嘅佩利亞而非高大嘅麥湯美尼繼續打單防中,效果喺預料之內︰上場個個掛住拍普巴同費特所以先俾到空間佩利亞用波,但作客波就好難唔迫你。
好多朋友都問過我點解摩連奴教到啲進攻咁難睇,有機會再解釋呢個幾乎不會被解決嘅問題,在此奉上一張睇到我R哂頭嘅現場截圖,呢個神秘三角型幾乎放到每日150個單程證來港人士。
[WKD手記] - 不敢樂觀的一季
呢篇文章早就喺世界盃前諗好,只係估唔到經過咗咁耐都無任何收購行動,所以我嘅觀點亦無改變過。摩佬有樣嘢講得好啱,就係熱身賽絕無意義︰頂多提升到呢班後備或邊緣球員嘅狀態,但對來季踢法同戰術無乜啟示同影響,因為我地心裡都知道當世盃球員回歸後佢地又會長任正選,而家呢班大部份都會坐板凳坐到無哂狀態。最斃係熱身賽仲要踢到一塌糊塗,只會更加難俾到信心摩佬去起用佢地。領隊都要負上責任架,因為無意義得嚟佢又唔利用呢個無傷大雅嘅機會去試一個啱佢地嘅陣式,而係要呢班用得嘅球員踢佢果家波。
點解啱啱完季就覺得下季會出事?係因為世界盃。眾所周知摩連奴最大缺點就係輪換能力差,拎冠唔拎冠都好,成季踢極都係果十六、七個球員,其他球員就算有出場機會你都唔會覺得佢地喺最佳狀態,俾人一種正選同後備差距好大嘅感覺。摩三季呢個魔咒同球員體能下跌有莫大關係,加上主力球員今年要踢埋世界盃先休息得三個星期,試問又點可以唔擔心來季表現呢?
完季我第一時間諗嘅係曼聯咩位置最需要增兵,果一刻嚟講絕對係兩閘同中鋒。首先兩閘年事漸高,要不是左楊右華本身屬速度型又操得夠弗,可能已經俾英超淘汰咗。就算當年實力不俗嘅伊雲洛域同高拉洛夫,只要運動神經稍稍退步就已經醜態盡出,量你有幾好路數,踢閘位就係咁殘忍。老實講,華倫西亞臨近季尾都開始回塘,只係佢好聰明咁少咗上去助攻所以無乜犯下大錯,但球隊唔應該再依賴佢踢哂成條右邊。曼聯好迅速咁買咗迪洛特,暫時未有機會睇佢實力同適應性如何,但怕且都唔係期望呢個上季踢得六場葡超嘅十九歲仔可以即刻勝任正選掛?左閘既然無買人就等於俾機會梳爾上位,撇除同領隊嘅關係,佢攻守決定做得差係不爭事實,做唔做到冧巴溫左閘就真係要靠佢自己喇。睇埋熱身賽可以預計到季初會先俾達米安同梳爾上陣,不過兩個明顯一個踢唔掂翼衛一個踢唔掂邊衛,仲未計班中堅識唔識踢三後衛添...
有盧卡古果陣就話佢波底差曬料,無果陣我地就更加無進攻瓣數,所謂嘅Plan B其實就係天才波。咁講唔係為魔獸護航,而家道出摩帥要踢柱躉先得嘅死穴。正當我以為買中鋒係夏天主要工作,熱身賽期間摩帥反而將山齊士推埋中間踢單前鋒都唔變陣,除咗人腳之外其實戰術上無乜郁動。新一季拉舒福特雖然著十號,但似乎進入咗撞板期,依照近況應該唔會踢得到單前鋒,可能回歸左路吧。至於馬斯亞就算吧喇,無論係關係同足球理念上佢同摩連奴都唔咬弦,是但一個走人似乎係時間問題。
睇過中前場就明白點解熱身賽無意思,淨係拎贏皇馬果場嚟講,呢種入波已經好低機率係英超度出現,因為全英超都覺得曼聯而家唔識攻、死球又唔集中,只要後面放九個人打穩守突擊就已經有勝算,又點會俾咁多空間你跑呢?而且摩連奴本身又有一套用人方針,面對英超球隊硬橋硬馬嘅踢法,真係好難想像佢會擺西甲回流嘅佩利亞踢墮後中場,尤其係中間已經有新入魔嘅費特、普巴、連加特、麥湯美尼等等一係勤力一係高大嘅球員,我就寧願佢踢兩邊向風格有啲似嘅馬達取經喇。
點解唔提馬迪?因為我大膽假設佢會慢慢兼任第三中堅。上季季尾已經從變陣中見到端倪:球隊落後焗攻時經常見到佢落一格踢中堅,等兩閘壓上前變352/361。現階段後防仍欠缺有視野同足球智慧高嘅統領者,加上麥湯美尼吸收得幾快上位有望,如果中場生性嘅話真係頗有機會見到佢轉型架。
[WKD手記] - 2018終
足總盃決賽竟然輸比一隊狀態甚差嘅車路士,摩連奴認為舊東家嘅表現唔值得捧盃,我認同架,不過曼聯除咗份爭勝心外就更加唔值,因為講到底我地有一個致命失誤同把握唔到嘅黃金機會sss。比起輸波,更加令人失望嘅係雙方比賽心態,同晚睇埋拜仁對法蘭克福嘅德國盃決賽,感受到佢地真係為榮譽而戰。十年前曼聯同車路士上演過一場超高水平嘅經典歐聯決賽,而家只能踢到咁真係令人唏噓。
盧卡古能唔能夠上陣係紅魔迷賽前最關心嘅事,因為大家就算幾唔鐘意都無法否定佢對曼聯嘅影響,最後踢到十幾分鐘已經說明咗佢未完全康復,無加重傷勢已經萬幸。經過季尾幾次試陣,缺魔獸下轉踢雙前鋒屬正常判斷,可惜山齊士同福仔默契之差有目共睹,馬素爾踢前鋒又未必發揮得好過前者,所以只可以話係無可奈何嘅選擇。靴里拉試過盯到夏薩特一棟都無,不過今場就踢返防中,為中場同右閘做掩護。最爭議性當然係一對中堅喇,唔少人都認為兩者應該只出一個嚟同拜利搭擋,賽前鐘斯嘅正選係我最懷疑嘅地方,我會揀洛荷同史摩寧因為佢地拍檔起上嚟位置感同落腳比較平衡。
入波發生前兩隊都踢得非常謹慎,少有地見到曼聯唔洗迫搶都可以長期拎住控球權,只不過面對住車仔嚴密防守,根本創造唔到啲咩攻勢出嚟。進攻嚟講上半場有兩大問題,首先當然係無腦式出波,最明顯不過見到楊格係畸角位攞大位望都唔望就斬出嚟。呢種踢法會蠶食進攻球員嘅思考同創造力,仲要唔係第一次發生,每次半場訓話完就會戒返,咁點解唔可以一落場就見位俾波呢?另一個戰術執行問題落喺兩位前鋒身上,佢地太鐘意落中場拎波喇,而且背向龍門拎完波仲想帶上去想做俾波果個,事實上邊個中場會夠膽離開崗位變做殺入禁區,普巴?馬迪?俾盡得連加特有咁嘅自由度去嘗試。比賽節奏咁慢,前鋒最應該做嘅係落嚟彈一兩腳波再回身向防線施壓,務求以少許走動嚟破壞對方防守結構,拉舒福特想成為正箭頭就必須理解前鋒同翼鋒之分。
"下半場表現我收貨架",講多幾次就要檢討點解永遠都要嘥咗頭四十五分鐘,否則失敗幾多次都唔會有所領悟。雖然最終無法破門,但下半場進攻係似樣返啲嘅。原本半場會調走連加特或者靴里拉,換入麥湯美尼再將普巴推上去攻中位,因為普巴踢前啲先可以俾到更多直接威脅。估唔到七十三分鐘先見到第一個調動,相比起摩連奴今季果斷嘅換人實在略嫌太遲。馬仔後備入替經常有貨交,就算無正選都值得更多出場時間;馬達亦應更早換入,保守啲可以入替靴里拉,因為當時車路士已經無進攻意欲。
今場再次見到曼聯嘅變形352/343陣式,靴里拉每逢進攻就會化身第三中堅,企位比起史摩寧前少少但包哂華倫西亞嘅後方,等左羊右華可以踢前半格。我唔認為佢地兩個係合適嘅翼衛,企前啲對攻力無太大分別但要用一個人補位,間接令到普巴要墮後少少。最終普巴頭槌頂斜、福仔門前撻Q單刀被救出就成為呢場波嘅分野,真心講車仔都踢得好差,就算基奧特同夏薩特係入完波之後啲控傳都失曬水準,我地咁都扳平唔到仲有咩好賴?
關於鐘斯犯下天條,其實佢除咗完全錯判對手會控定先推之外,好明顯佢仲未喺三秒前自己交失波嘅事實走返出嚟,導致集中力全失。一個後衛點都唔會喺個波就落地先減速轉身、正面面向持球者,連最基本側身防對手變速推進嘅姿勢都擺唔到。對於史摩寧落選英軍我已經有啲疑問,畢竟後衛踢國際賽講求經驗多於技術,名單內除咗卡希爾外都好似無乜邊個夠成熟,以為佢起碼可以做下後備。鐘斯有份我就更加唔明白,大把英式後衛殺波比佢更狠,處理危機更啖定,只能講修夫基必然有佢個人考量,唯有祝入選嘅小將今屆可以同英軍走遠啲。
見證過咁多年嘅起跌,要接受失敗嘅球季或者輸波唔係難事,更重要嘅係球隊有無向正確方向進發。睇得出摩連奴絕對有嘗試過改善進攻問題,並唔係完全唔肯創新嘅人,過時嘅反而係人事處理。要知道社交媒體橫行、球星又唔愁無班落嘅今日,齋用鐵腕政策未必能夠鞭策到所有球員為自己賣命。對我嚟講,山齊士係好球員,但買入佢令到曼聯進步嘅路上再加多一個難題要去解決,所以我一直認為詳細評論佢嘅時機仲未到。
其實球隊踢成點都會支持,沒有恨只有愛,下季再同大家喺Royce Sports講波!
[WKD手記] - 最後試陣再見卡域克
最後兩輪比賽安排咗喺三日內進行,總算有機會俾唔同球員上陣,尤其係仲有可能被徵召入國家嘅邊緣人都需要時間表現自己。因為聯賽已經無嘢好爭,班球員唔使下下去盡都係一件好事,但兩場波嘅觀賞性真係奇低,即使未開紀錄都刻意放慢節奏,為嘅就係幫迪基亞拎第一隻金手套。卡域克優美地完成咗掛靴戰,相信短期內都再見唔到有踢得咁柔嘅英人中場。不過睇完呢兩場排陣之後,而家最驚嘅係足總盃決賽會唔會踢三中堅呢?
首先作客韋斯咸,中堅分別係連迪洛夫、史摩寧同埋鐘斯,其中以史摩寧最搶鏡,原因係佢受到嘅威脅最大。韋斯咸只踢阿奴杜域一個箭頭,但前場控到波、突破能力高、身體質素又強,真係好易令人諗起伊巴。佢分別挑戰過三個中堅,唯獨史摩寧俾佢變速過咗兩三次,不過之後處理得唔夠好先無造成入球。事實上阿奴杜域今季只係得十個聯賽入球,咁就俾到麻煩我地反映出問題所在。季初已經試過踢類似陣式,今場單對單仍然有待改進,但企位補位方面自然得多,起碼係控制防線距離已經係有進步。槌仔幫尾段換入卡路爾諗住用雙塔方式破門,反而俾摩連奴用大巴戰術化解咗。中前場方面壓制絕對合格,創造力先係老問題,睇咗咁耐雙箭頭都無乜配合,踢落反而似打四隻翼嘅無鋒陣,最有睇頭嘅攻勢已經要數到連加特同麥湯美尼啲遠射。
閉幕戰彷彿就係為咗俾卡域克表演技術,麥湯美尼打返未上一隊時嘅位置 - 靠前嘅中場中,幫卡域克擋住對方體力化嘅壓迫之餘,亦會嘗試做多啲向前傳球甚至帶上去。卡域克好耐無上陣但一踢就顯功架,自從史高斯退役後,中後場串連嘅工作就咗俾卡域克。而家即使有馬迪同普巴,但呢方面嘅功能同佢仲差得遠,因為佢勁在人地未拍到埋黎已經將個波傳咗去一個安全、甚至對進攻有利嘅位置,唔使每次花力氣用身體對抗或者盤扭技術擊倒迫搶者。當然喇,唔單只要有跑腿掩護,仲需要隊友長期積極走位先發揮到,對其他球員嘅閱讀能力都有幾高要求,難怪呢類球員買少見少,唔通真係會俾現代足球所淘汰?
呢場波值得一提嘅仲有楊格同白蘭特,喺442下兩者雖然分別踢左閘同中場中,但當楊格㩒上去助攻時白蘭特就會縮後半格,準備隨時防守補位又或者轉做第三中堅。如果摩連奴下季打算繼續用達米安同白蘭特,轉踢翼位陣式真係一個合理想法,畢竟華倫西亞同楊格年紀漸大始終要搵後備,而達米安同白蘭特擁有嘅條件同足球背景又比較適合踢翼位,呢個改造計劃未嘗不可,不過最好贏埋個足總盃先試新嘢喇!
金手套任務達成,聯賽績分同排名都喺後費爵年代最高,但球場內仍然有唔少不滿摩連奴嘅聲音,即管睇下今季收購計劃又會有咩搞作。
[WKD手記] - 洗腦後遺症
前言:本專欄一直多用白話文係想讀者睇緊果陣好似有把聲係隔離講波咁,因為用廣東話旁述係特別傳神嘅,希望透過文章令大家注意到多啲唔同運動、甚至乎電子競技嘅粵語旁述。
盧卡古上仗傷出意味住中鋒有空缺,拉舒福特操到咁大份,等足一季就係為咗有機會證明自己可以踢最前。馬素爾都一樣,自從山齊士加盟後就失去正選左翼,但係每次後備上陣都有一定表現,唔少曼迷一直想睇到佢地一齊踢自己嘅最佳位置。結果失望嘅又點只係球迷,連摩連奴都不記名咁話外界唔應該批評佢過份重用盧卡古,因為'其他人'擔大旗就會踢成咁。成場波咁失水準絕對係全隊(包括領隊)問題,佢地只係最明顯地不在狀態而成為兩隻代罪羔羊姐。歸根究底,咪就係打唔熟PLAN B囉。
記得上星期魔獸被換出後,曼聯轉踢福仔搭費蘭尼嘅一個半前鋒陣,最後仲靠後者補時入波贏三分。今場照辦煮碗,話就話433,實情個波去到兩邊禁區頂附近,爆炸頭已經入埋禁區同福仔平排咁滯,相反普巴就會逗返後一格。問題黎喇,兩翼同閘位完全失去聯繫,馬仔上半場甚少有掂波機會;右路更加運唔到波俾馬達,楊格同達米安搵唔到方法幫兩翼,自己又無機會出波,試問爆炸頭個頭又點發揮威力呢?
另一樣睇到無癮嘅係亂放高波。因為兩閘用唔到波,好多時由三中場喺中路傳地波上去,但係費蘭尼同馬迪橫傳失誤幾次之後開始無乜信心打幼細波。上半場中段開始,中後場受到少少威脅時就會斬個波上前場,拉舒福特同馬素爾十頂九輸,就算爭贏都做唔到有效嘅二傳。其實平時都係咁踢,只不過盧卡古喺呢個戰術體系下做到嘅野多好多。簡單而言,佢地根本無因應隊友而踢出第二套戰術,領隊要更大負責任,因為佢大可以即場指示球員走動,唔需要等到入更衣室先講。
加利佬話曉頓唔希望零比零完半場,因為下半場曼聯一定會唔同哂。為咗解放普巴,摩連奴換入連加特之餘,馬達變成另一個中場補位而唔再係一個硬生生嘅右翼,後者即時踢得生好多。普巴本來企定定,只要俾適當壓力就可以迫到佢得返傳波呢個選擇,其後佢又上又落就令對手好難捕捉到防守距離,甚至有幾次換人防守時出現失誤,俾佢有起腳機會。換邊後喺地波組織方面有所改善,梳爾入替後同馬素爾有更多交流、配合,呢半場表現我收貨,所以先更加嬲佢地點解頭四十五分鐘會踢成咁。失果球波有少少唔好彩,一對中堅尚算穩陣,唯獨達米安真係嚴重缺態,唔怪得離隊指數同白蘭特一樣係全隊之冠。
呢場最後入唔到波我覺得同決定力有關,而唔係組織上出現大問題。普巴、馬仔同福仔有幾球應該傳嘅波就走咗去射,有唔少機會可以再做得深入啲,好過下下喺禁區外起腳。普巴故然獨食,過少出場時間亦都直接影響咗兩個射手嘅信心以致決定。有一腳黃金機會福仔無傳中俾馬仔喺抵鬧,但有可能係因為佢想傳果陣發現人快波慢,想修正而錯過咗最佳時機。話二人有心病實在太陰謀論,不如當佢地正值樽頸位,球迷俾多啲時間喇!