[多奇出品] - 曼聯對白禮頓賽後檢討

今場球迷一定好開心，可以重回勝軌，有啲球員真係表現出色，但有啲位可以再做得更好。現在一齊探討一下：

攻擊線：佩利亞-佢入第一球雖然有點幸運成份，但見到佢入球後成班球員，尤其係年青嘅一齊圍著一團，好似想話俾當時人知我哋等咗你嘅入球好耐，之後成條攻擊線打生晒。

不過佩利亞在射門選擇方面要去執一執，始終以佢嘅射術仲未可以俾龍門有好大嘅威脅。我唔係話叫佢唔射門，只係希望佢可以多啲帶入去禁區射。仲有在同馬斯亞同福仔嘅默契都係差啲，咁間接令佢放直線波俾馬斯亞同福仔都少好多。

馬斯亞-佢今日雖然冇入波，但表現其實唔差，而且我會俾最佳球員佢。佢係冇麥湯文尼同費特搶鏡，亦都冇佩利亞同福仔嘅入球。但佢做到樣難度幾高嘅嘢就係等待。

作為前鋒最首要任務係入球，佢眼見中前場供應唔多，福仔同佩利亞鍾意上腳射門，加上佢被對方守衞睇得好緊，想控個波射都唔易。而且當中有個射門仲係射到守衞隻手，但馬斯亞完全冇氣餒，還把握緊有機會冷靜地處理兩個來球，令到敵方守衞失位，助攻俾馬你同佩利亞。嗰份冷靜同心理質素唔係單單技術好嘅球員就有。如果換作福仔可能已經心急地自己射咗門。不過，如果馬斯亞有波入就更好啦！

占士：佢今場有幾球傳中波都幾搶鏡，可惜佢係傳高波，大家都知高波係福仔嘅弱項，就算占士斬得幾靚都好，福仔永遠都頂唔入。另外，占士速度高，打反擊具威脅，可惜同隊友默契都係差些少。要我就你，你就我，咁就冇咗種速度同隱蔽性。

另外，占士表現冇頭幾場咁亮麗嘅原因係佢太尊重隊中嘅「老大哥」福仔同馬斯亞。頭嗰幾場當球隊需要到佢入波，佢係會負到責任，但當現在有兩大得分點，占士就轉化為助攻者。依個性格對同隊友合作係好嘅作用，不過佢現在就係要適當時候自私啲。

拉舒福特-佢被安排到適合自己嘅位置同埋有「老拍擋」馬斯亞合作令到佢愈打愈好。佢除咗發揮到自己嘅速度同技術外，佢同馬斯亞嘅小組合作亦出色。不過，高空波始終都係佢弱點，有兩球占士斬高空波俾佢，佢只要後上衝頂就好有機會頂到個波。但福仔係怕高空碰撞而令自己受傷，所以就唔敢博，睇佢跳起都唔係望波頂，而係縮埋一舊咁。

另外，就係想講福仔把握力。福仔主要得分在於自己帶住個波，然後擺順個呔射門。擺呔嗰吓其實就係佢嘅「描準器」，冇嗰吓佢就好似無咗方向地亂射，所以點解當占士橫傳個波俾佢時，就算近距離都會射失。個問題唔係佢踢波嘅距離，而係佢冇擺呔，即係冇咗個「描準器」。所以佢如果想射門命中率高就要將啲冇擺呔射門變為有。

中場線：費特-今場波可以話佢踢得得心應手，無論放長球定係放地波，分波分兩邊都傳得合度好處。仲有佢都傳過兩個直接俾馬斯亞，直接俾到對方一個威脅。另外，佢嘅控球亦都出色，使到對方球員冇辦法搶到個波。對方搶唔到我哋波，我哋個中場就有優勢。

仲有就係佢防守時不斷幫助威廉斯，幫助威廉斯去邊路防守。而且佢捕位相當出色，在中場做了無數攔截，佢由守至攻都做得十分出色，做得迅速而且睇得通透。

麥湯米尼-佢係一位全能中場，攻守俱佳。不過今場佢做嘅防守尤其出色，佢有跑唔完嘅氣力去追截對方球員，而佢企立同回防速度都快，阻止咗好多攻勢。而佢保護皮球方面都做得唔錯，幫波亦都係快同到位。

後防線：今次後防除咗失嗰球，其餘嘅對手都俾唔到好大壓力後面，可能係領先住嚟踢。另外亦都係對方冇一啲速度型球員去打反擊，對方亦都冇以高波長傳轟炸後防。所以整體上打得唔錯。特別提提第一次打正選嘅威廉斯，佢踢得都幾放，好少走甩對方，攔截都快而準，步速都快，而且肯上去助攻，只係有一腳勇得過火，差啲紅牌出場。其他後防球員：雲拜沙卡、連迪洛夫同麥佳亞都表現都唔錯。

龍門：迪基亞嘅反應好快，擋到一球近射，但始終嫌佢唔夠膽出迎接波。

雖然今場得到勝利，但攻中問題係未完全解決，佩利亞仲需要成長，無論在踢球決定或把握力。後防亦都有失球危機，尤其係高空波，所以今場勝利亦都唔代表往後比賽會易踢。但作為曼聯迷，見到愛隊贏波都開心嘅，希望球員們繼續努力。

[多奇出品] - 般利茅夫對曼聯賽後檢討

曼聯之前作客連勝三場，諗住今場full team應該會實食冇痴牙，可惜事與願違。究竟問題出喺邊度呢？

我今次帶出三個問題：

1）曼聯攻中出現咗咩問題，令到曼聯未能可以早早就解決對手。

2）當對方完全適應曼聯攻勢後，就冇進攻板斧。

3）所失嗰球邊個負責。

1）今場比賽落大雨，當然在組織攻勢方面係有難度，但相對嚟講由於草地濕滑，只要球員射中龍門，入球或雞機會大大增加。本來今日場比賽應該係屬於佩利亞，頭嗰兩球，一球占士橫傳俾佢踢空氣，另外一球占士傳俾佢有空位俾佢帶兩腳點知射出界。無錯有人可以話落雨令到場地濕滑，影響個把握力。不過，我就睇到佢處理依兩球係心急咗，缺乏冷靜，完全帶唔到俾對方守衛一種危機感。

睇番過往記錄，佢被外借華倫西亞，出場23次入1球，攻擊力有待提升。而最重要係今場左有福仔、右有占士、前有馬斯亞，在攻擊陣容上係無可挑剔。咁就反映出佩利亞嘅不足。首先，佢同前線默契不足。佩利亞之前都係外借出去，上個球季亦都唔係必然正選，所以同福仔，馬斯亞嘅合作機會係唔多，加上占士係今年先加入，依組攻擊線還需要好多比賽去磨合。咁其實我成日話默契不足，究竟默契不足有咩影響？一、容易有誤會而交錯波。二、就係進攻速度就變慢。三、係組織傳球缺乏隱蔽性。還有佢以往主要打翼，所以在傳球方面嘅技巧不夠深度，視野亦都唔闊同唔夠訊速。而當佢在禁區頂攞到波就會慣性地準備射門，缺乏一啲創造性。之後換咗連加特，無錯組織攻勢就暢順咗，但由於對方領先住嚟踢，加埋我方攻勢千篇一律，就好難造到個偶然性。

當然，蘇B俾得佩利亞出，都會係睇到佢有可塑性，但代價好似今場波咁。製造到機會俾佢，可惜未能把握，而要佢做由中場到前面嘅串連，但就唔夠一針見血。我相信如果蘇B有心培育佩利亞，短期內成績都會平平。又或者蘇B已經諗住到冬季轉會窗去搵個有能力打10號嘅球員。

2）除咗10位問題外，仲有就係其他攻擊球員缺乏多元化技術。無錯占士、福仔同馬斯亞都係有潛質嘅球員，佢哋每個都有自己殺手鐧，三個嘅速度好快，不過個個都要有球在腳下先至發揮到威力，只要啲波係彈地或者個波高過心口就多數俾人搶咗。所以在比賽有段時間後防攞到個波組織唔到攻勢就大腳踢上去，前鋒完全hold唔到波攻上去。

依個時後就要靠中場上前助攻，麥湯米尼射波都好啲，起碼中龍門或者被後衛擋出，但費特就幾腳射門都唔中龍門。中場入唔到波還有角球機會，可惜，曼聯冇一個球員係會衝刺式爭頂頭搥，所以球員永遠慢防守球員一步去佔先機。點解我哋咁難入對方波，就係太多球員都係相同類型，前中後都係都係技術型，對敵方後衞冇一種衝擊性。由於進攻冇變化，對方容易適應。

3）失嗰一球之前，對方已經經常在左邊做叠瓦式走位擾亂楊格。個源頭就係在撕破邊線防守，然後就可以傳中。對方之所以在左邊係因為楊格極少主動去欄截同埋去壓逼對方，咁就令到對方有充足而輕鬆狀態下去組織攻勢。

當個波斬去俾京治時，如果係面對面，雲拜沙卡根本就唔驚，但嗰球偏偏係京治背對佢，對雲拜沙卡嚟講依樣係佢在正式比賽中極少面對嘅狀況，所以當京治挑高個波，雲拜沙卡係唔識對應這個環境，成個人企咗喺度。仲有唔係想幫佢講好話，佢打開閘，對住高速嘅翼鋒佢係有經驗去處理，因為平時練習有做開，對住京治依類平時練習冇機會去練嘅就需要靠臨場應變，可惜佢今次就反應唔切。咁唯有當係交學費。

今次雖然輸波，但就可以更深入睇到球隊有咩問題，尤其係攻擊線。我一方面希望球員可以繼續成長，另一方面亦希望蘇B在冬季轉會窗去簽佢心儀嘅球員，令球隊進步。

[多奇出品] - 諾域治對曼聯的賽後檢討

今場比賽曼聯終於勝出，咁既然勝出同埋入咗三球喎，有咩好檢討呢？就緊係因為今場同前幾場有好多對比，所以想帶出啲問題去討論。

一、拉舒福特同馬斯亞嘅兩個12碼。

二、曼聯三個入波對曼聯攻擊力欠佳的啟示。

三、點解每次對方嘅進攻，都令我哋嘅防線好似好易散。

一、福仔同馬仔所射十二碼係兩個唔同風格，而告爾守佢哋兩個嘅十二碼亦都有唔同嘅策略。

首先要知道福仔射門嘅特點係佢係明刀明槍以射門勁度同速度，令龍門反應唔切然後入波，所以佢無論助跑、起腳同射門係好明顯，所以對經驗豐富嘅龍門嚟講，福仔係好易被捉路。就係因為咁福仔選擇先以向右橫移步，然後就再碎步，然後射門，可惜最後被龍門沒收。依個起動嘅目的想透個兩個假助跑去令告爾在福仔起腳前早早決定撲邊個方向，從而到最後福仔真正決定起腳射邊度時龍門因為已經預測而出現偏差。

另外，馬仔射十二碼係靠佢隱蔽式助跑，令龍門响對方助跑時捉唔到路，要到起腳射門嗰刻先至揭開底牌，好似一位殺手靜靜地走過嚟，到佢攞起把刀你先察覺。所以馬仔射12碼係已經諗好射邊度，唔需要做啲咩小動作。而龍門對住這類型射手要响對方起跑時用以往經驗加臨場觸覺去早啲捉到方向，因為龍門會知道等馬仔起腳先判斷飛撲就遲嘞。

喺依度我唔會怪福仔同馬仔，我只可以話係告爾遇咗比佢俾兩個更強嘅射手，可將兩類唔同射法嘅12碼輕描淡寫地化解。

二、麥湯米尼射入第一球後俾我有好大啟示。原來曼聯班攻擊球員本身入球能力係有，但有一啲來自自己同敵方嘅影響，加重球員在心理上的入球負擔。麥湯米尼入第一球係因為對方攞到個波唔解圍，然後佢就趁機會射門，然後就成班對方球員在毫無警覺下就望住個波入網。

當中令對方毫無警覺係好重要。就好似第三球福仔後踭妙傳俾馬仔然後單刀對住龍門挑射入網，福仔嗰腳傳波同埋馬仔嘅走位係自然流露。依腳波帶出曼聯入波能力疲弱因素有三。

首先，曼聯中場同攻擊線球員心理太希望做到每一腳都要完美。你一個人就話都係自己嘅事，但如果一隊球員都希望做每個攻勢，傳每一腳波都要十全十美，咁就好有問題。因為曼聯本身基礎仲未打得穩，依個係指個人技術、小組默契、身體條件同心理狀態，每樣嘢都係要時間浸。當我哋要做到100分，但我哋只可以做到70-80分，咁會增加球員嘅心理壓力。壓力劇增球員咪容易犯錯，犯錯後自己負面情緒就會增加，你有負面情緒就會感染到其他隊友，此消彼長對手表現就輕鬆好多，當然個發揮就會好。

其次，就係曼聯球員做攻勢時太過刻意，冇咗自我。從佢哋傳波就知道大家都係要刻意遷就隊友，攞波嗰個想俾個波隊友，但迎波嗰個球員就唔知你咩時候交，所以大家都打得唔夠放。再加上福仔嗰時唔係打自己擅長嘅位置，佢就要更加刻意去做單箭頭要做嘅工作。刻意令簡單事情變得複雜。例如：前鋒射門時見到有守衞飛鏟，前鋒本能反應就通常扣一扣個波，本來果腳製造到機會射門，但佢又留意有第二個守衞就過嚟，如果再扣的話就可能會做多咗。冇錯，有時我哋做決定都會諗多咗，但如果成隊都係咁就好大獲。

最後係曼聯球員缺乏一啲有能力老大哥出嚟提場。其實以上兩種情況出現係唔難見，但最重要係有位經驗豐富嘅老大哥提場。但我發覺係冇，反而提場最多係教練蘇B，成日叫球員出嚟俾提示。有踢11人比賽都知比賽成90分鐘，有時候真係唔知自己做咩，如果有經驗豐富隊友指點，就可以容易走出迷惘。

三、後防嗰度就，4位守衞，除咗雲拜沙卡係會主動攔截外，其餘三位，連迪洛夫、麥佳亞同楊格都係"行"住對方攻擊球員。咁本來唔算大問題，但最慘就係我哋兩個中堅講得好聽就係斯文，唔容易犯規，講得唔好聽就係太過錫身。後方有時要睇穿對方套路，有時亦都要學習以硬朗攔截去化解危機，如果兩個中堅都係習慣或擅長睇通對手，咁就大件事，因為對方會利用身體對抗性去力壓你製造機會，同埋對方前鋒唔怕俾你踢，從而冇嗰種氣勢同壓迫感。楊格都係一樣係行住對手，即係後防線有三個都係睇住嚟食，只有雲拜沙卡懂得主動欄截，氣勢同對抗性造成曼聯後防不穩。

最後，曼聯贏波係開心既，但開心過後就要繼續努力去準備下場比賽。

[多奇出品] - 柔與剛 x 貝碧托夫與迪維斯

首先就比較一吓貝碧托夫同泰維斯嘅踢法同特點：

在速度上：貝碧跑動速度表面上好似好慢，但其實後衛對住佢先至難觸摸，原因係佢其實在某幾方面嘅速度係好快。佢對守衛嘅反應，自己隊友嘅動態，足球嘅滾動球路係有好快同清楚嘅接收反應。當佢接收完整個環境信息，然後在判斷同出腳反應對比佢嘅跑動係快。點解我要用對比，因為對方守衛在腦海中已經好容易地習慣咗佢跑動速度，只要貝碧一變速，個個守衞就反應唔切。就係依個變速，令佢製造好多起腳機會同入球。

迪維斯在各方面嘅速度真係快。好似在無球走動時，除咗跑得大步外，而且步速亦都好快同好有衝勁。此外，佢盤球速度亦都好快，技巧好熟練。我估可能佢平時跑步都會帶埋個波，仲有亦都要提係佢同貝碧一樣於接收球場內訊息至到作出反應都好快，佢嗰種快係明刀明槍係跑得快過你，好似對方要用6秒跑50米，佢用5秒就攪掂。

在射門上：貝碧托夫最強嘅射門絕技就係窩利抽射同埋執雞射門。由於佢嘅射門觸覺實在太敏銳，加上佢起腳射門到佢接觸個皮球都好快好準，所以敵方守衛難以阻止。而且佢通常都係伏兵於禁區入面射門，所以其實佢於裏面起親腳都差唔多會入。

迪維斯射波俾佢三個字「快」、「狠」、「準」。快係起腳速度快，而且喜歡一邊帶波一邊遠射。狠就係勁度十足，通常俾佢起腳射得龍門，守門員唔係咁容易作出反應。準就係非正式統計，佢係中柱率同埋中柱彈入機會率高嘅射手。仲有佢亦都有一下絕招，就係禁區內改變方向射球。佢於2007-2008年最少有4至5球係咁入，所以絕對唔係偶然。

在傳球上：貝碧托夫雖然跑動悠閒咗一啲，但佢一攞到個波，然後做決策究竟係盤球定傳球都係唔拖泥帶水。而且佢交嘅波係好易控定，遷就到自己隊友啱啱好，好似會為隊友設想咁。通常自己有入球能力嘅人，都會比較個人化啲，唔係咁喜歡交波，而貝碧就係一個終結者亦都係傳球高手。

迪維斯亦都係一個傳球高手，佢傳嘅波係好有侵略性，鍾意交一啲直線同做小組滲入。佢嘅無球走動都做得好恰當，交完波之後佢都好肯跑，好肯走位配合。當然佢同貝碧一樣傳球係以隊友角度諗，點樣交到個波令到隊友容易控到。而佢射門同傳球俱佳嘅球員。

身體條件：如果要描述就係貝碧托夫係柔，迪維斯係剛。前者喜歡輕輕地用腳面同腳背接觸皮球，但就唔會好用力去踢個波，佢係用寸勁。仲有佢懂得擅用腰力，平衡力亦都好好，當佢俾人撞時都唔會跌倒。後者就好大隻，唔算高，身體有少少肥，下盤非常穩陣，佢射門係用全身去發力以腳面抽射。另外佢頭搥都唔弱，而且好肯跳。佢有時會主動去同對手碰撞。

性格：貝碧托夫就比較內斂，就算佢入咗波都只係對住隊友微笑同接受祝賀兩句。

迪維斯就鍾意將自己情緒表達出嚟。佢入咗波之後就好興奮，佢會對住啲觀眾和隊友慶祝。心裡面有股激情。

了解完佢哋特點，我睇番現在曼聯攻擊球員仲有好大進步空間。我明白現在實在有太多資訊去吸收，去模仿。但我想講就係有天份嘅球員需要去建立自己嘅個人風格，即係自創一套其他人冇咁易領悟到技巧。就好似貝碧托夫咁，表面上好似行行企企，實際就早有準備隨時插你一刀。而唔係有獨有天賦嘅可以透過學習前輩嘅技術，打好自己嘅基礎，從而有發揮自己能力嘅本錢。好似迪維斯咁各方面都有努力過，令自己無論在控、傳、射、走位都做得出色。

[多奇出品] - 曼聯對利物浦賽後檢討

今場波終於睇到蘇B在陣型方面有調整，雖然攞唔到3分，但係這個改變令我隊尤其係在攻擊方面嘅發揮有明顯效率。現在分析一下佢哋改變：

攻擊線：今場雖然陣式上福仔都係打前面，但反而佢常常出現在球場兩邊，透過邊路引球推進撕破對方防線。還有當福仔攞到波之後，身邊總有兩個己隊球員走位幫波，開始有啲小組入滲睇吓。而入嗰球係占士在右邊出波，當時福仔首先走右邊呃一呃對方令對方失位，然後攝到左邊輕鬆撞入。

占士上半場可以有更好嘅發揮，除左右路助攻嗰球外，於佢推上做箭頭時有兩個位走得都幾靚，可惜隊友都冇交波俾佢。而占士下半場有兩球打反擊時，福仔開始走位，但因為默契仲未完全建立得純熟，所以到占士想交波時，福仔已經越位，白白浪費兩次機會。

佩利亞進攻表現唔算話好出色，甚至有兩球可以分波俾隊友可惜佢就射咗，射咗都唔緊要，但個效果就差啲，威脅唔到對方門將。佢負責做攻擊策劃，幾時交波，幾時射波仲係有待磨練，佢有一球於前場攞到個波，然後心急咁打個後揪，嗰吓真係攞命。不過在助守方面，佢係做得好，除咗回防快，仲好有鬥心。

攻擊總結：攻擊線要學習點樣入第二球，始終領先一球唔穩陣，加上已隊後防又唔係特別出色。占士同福仔默契仲可以進步，因為當下半場打反擊時，有兩次如果占士第一時間直線傳俾福仔，佢就有機會單刀。佩利亞在前場做傳、射、控球決定有待磨練，佢個位對製造入球機會係好關鍵。好似佢上半場有兩球射門效果麻麻，佢當時或可以交俾占士。

中場方面：費特同麥湯米尼一攻一守。費特表現可以話不過不失，佢一方面帶動進攻另一方面在對方進攻時就協助麥湯米尼回防。費特在保持控球方面做得還可以，見到隊友上前都會横傳拉空，可惜就欠缺一啲致命直線傳波。如果一個負責策動攻勢嘅球員冇直線傳球，個威脅性就弱好多。

麥湯米尼就主要打防中，無論頭搥、攔截、都做到防線第一道屏障。保持控球亦做得合格有餘。佢係一個好忠於本份嘅球員。可惜佢身型較單薄，同埋性格太斯文，如果可以俾人感覺有啲火就更好。

楊格在防守表現都係非常集中，加上以佢經驗，協助後衞補位，所以唔容易跟甩人。不過佢同洛荷都有同一問題，主要都係只行住人，如果叫佢做主動欄截就好容易被人過。助攻方面就唔算多，因為利物浦嘅球員主要係攻楊格同洛荷。

雲拜沙卡就進守兼備。由於佢體力充沛同身體質素皆，所以佢經常走上前幫波，而佢亦都在右路出波。防守方面欄截係佢嘅強項，跟人亦都好少跟甩，而且佢俾對方有一種壓力。

中場方向：費特需要做一啲直線交球，如果吓吓都係橫傳，咁冇後衞驚你。今場見到唔再係楊格處理晒所有罰球，希望可以見到費特多啲處理死球。麥湯我覺得佢跑動幫波仲可以走快啲。希望可以繼續睇到麥湯米尼同費特依個中路配搭。

後防方面：麥佳亞打中間，佢做防線最後嘅一個人，指揮住整個防線。佢今日表現得唔錯，高空波頂晒，對方嘅傳中亦都處理得好穩定，而且佢擁有一定嘅技術，控波同傳波亦做得唔錯。

連迪路夫打三中堅嘅右邊，在企位上佢都好少走甩人，解圍都算清脆。我亦都見到佢同麥佳亞開始建立默契，控波同傳波技術算唔錯。不過佢嘅死穴實在太明顯，對抗性實在差得好厲害對比踢英超球員。有一球唔係因為文尼手球在先已經俾對方力壓射入龍門。

洛荷就打左邊拍住揚格算係打得非常集中，好少走漏人，就算走失亦都好快補番位。而且佢算係較好對抗性嘅後衞，除咗頭搥唔錯之外，仲敢用波將個波斬上前。不過佢有個致命傷就係佢好多時只係行住對方，唔會主動去俾壓力或攔截，當對方前鋒知道你只係行我，就會放膽去攻。另外，失嗰球佢要負責任，一次嘅唔集中就走漏咗拉蘭拿俾佢射入。

龍門迪基亞，基本上除咗球入波冇得講外，其他時間嘅表現都非常平穩。但有樣嘢就留意好耐，佢出迎嗰度就真係要諗一諗先決定出定唔出。好明顯佢對出迎係冇咩信心。如果好似拍連迪洛夫頭搥同對抗性麻麻嘅後衞就死緊。

後防總結：連迪路夫依啲技術型後衞踢英超真係可以話唔啱風格，佢性格實在太斯文。最重要係麥佳亞都係咁斯文，係洛荷較硬淨，咁就死啦，對方在氣勢上都唔會驚你。不過如果論技術佢哋都好全面。

最後，賽果令我有點失望，但今場表現令我高興，因為蘇B真係有做出調整，而效果係正面。不過，最重要係對一啲前鋒係衝撞型球隊，後防頂唔頂到。同埋前鋒嘅默契可否再快一點成長。

[多奇出品] - 歐聯資格係奬賞定係雞肋？

曼聯現在打咗8場得9分排第12，但已經被利記同曼城拋離，當然現在講邊隊攞到今季歐聯資格仲有好大段路走，不過普遍嚟講球迷對曼聯攞到前四都不寄予厚望。咁其實我哋依班曼聯迷仲好唔好將球隊個目標放在前四呢？

答依個問題前首先睇歐聯對球員有咩奬賞：

球會球員收入增加：歐聯會帶嚟巨額廣告同轉播費收入，而球員如果下年可以踢歐聯的話，人工亦都會增加。

為球員帶嚟知名度：歐聯係歐洲水準最高嘅比賽舞台，每位球員都希望參與同得到冠軍，而表現突出嘅球員會受到其他著名球員嘅注視。

增加比賽嘅動力：每隊有競爭力嘅隊伍會喺自己國家聯賽踢得更加努力，更加拼命，除咗令比賽嘅可觀性增強外，亦都令球員更有進步。

得球迷嘅支持：曼聯係歐洲數一數二嘅球會，過去曾攞過唔少冠軍，所以為咗今球迷唔好失望，踢歐聯係一個基本嘅要求，佢亦帶俾球迷有種榮譽感。當滿足到球迷嘅需要時，球迷自自然然會支持球員。

講完奬賞，究竟歐聯係咪都係雞肋？

基礎未穩：球員間尚待磨合：今季太多青年球員升上或加入一隊，缺乏穩定嘅高水平比賽經驗，而技術亦都有待磨練。另外，一隊中亦都缺乏世界級同有經驗嘅球員撐場。而稍為有能力嘅球員唔係外借就係賣咗出去俾其他球會。例如：盧卡古、山齊士同史摩寧等。加上頭幾場成績未合預期，都令到球會內外同蘇B都面對巨大壓力。

缺乏冠軍班底：在費格遜年代就算成績幾差都好，都會有歐聯踢。原因係佢哋當時有奪冠骨幹成員，好似在2002-2003球季有碧咸、堅尼、史高斯同傑斯，其實嗰兩年費sir都有幾個失敗嘅收購。例如巴夫斯、科蘭、華朗同施維斯達，但最後就係靠班骨幹成員打起成隊波。現在蘇B就係冇班能攞冠軍嘅骨幹成員，當年費sir用咗5-6年時間建立。蘇B又要用幾耐時間呢？班高層同球迷亦都等唔等到佢用咁長時間去建立班底呢？

歐聯對現在嘅曼聯嚟講好似係一個較難達到嘅目標，不如睇埋佢哋嘅現有陣容有啲咩要執

攻擊線：前鋒線係唔夠人用，得福仔，馬仔同格連活特。福仔唔使講，呢排佢在球場上好迷失，唔知自己想點。馬仔就一個字：「傷」。格連活特就年輕有潛質，但英超上陣時間少，實力有待證明。

翼鋒：有占士、佩利亞同鍾泰希。占士表現唔錯，又有入波，可惜之後幾場就被人釘死。佩利亞就唔多講，基本嘅過人、出波都做唔好。鍾泰希有衝勁，肯跑肯搶，但出場機會少。

攻中：有馬達、連加特同高美斯。馬達有閱讀球賽能力，但身體條件較差，同埋同隊友冇默契。連加特就肯跑，同隊友默契好，可惜就冇攻擊力。高美斯冇咩出場機會。

中場線：普巴被安排打自己唔係咁想打嘅防中嘅位置，在防守方面未盡責任，回防速度較慢，跑動亦未見勤力，而且間唔中在後場扭失波，佢扭失波之後通常會企喺度唔知做咩？相反，麥湯米尼就好珍惜自己能夠落場嘅機會，佢會安於本份，盡力做好自己防務同串連嘅工作。而且佢會去主動配合隊友，回防速度又快。但佢需要多啲比賽去吸收經驗。馬迪經驗豐富，指揮若定但狀態開始就下坡，未必可以維持90分鐘高水準嘅表現。費特攻強守弱，仲未可以擔起成條中場線。

後防線：連迪洛夫逐漸了解英超球員嘅打法，表現開始有少許穩定，但可惜打法太過斯文，在爭頂頭搥同對抗性就輸蝕。麥佳亞就無論對抗性、攔截同頭搥方面都有水準，又具備領導才能，可惜同班後防線只係夾咗唔耐，默契有待建立。兩閘方面，左邊楊格就攻強守弱，年紀都唔細，對住啲年輕有速度嘅翼鋒就難以招架；右邊雲拜沙卡單對單防守力極高， 攔截準確但仲係年輕，助攻出波能力有待提升。迪基亞就面對對方射門時撲救反應快，夠冷靜。可惜就身型輸蝕，處理高空波方面較弱。

綜合嚟講，球隊處於磨合期，年青球員需要多啲機會參與比賽攞經驗；新加盟嘅球員就仲係同隊友在建立默契。而班老大哥在經驗同技術都未去到世界級，莫講話爭前四，爭歐霸資格都有一定難度。所以我個人認為佢哋專心打聯賽先，歐霸就俾後生吸收經驗。

仲有蘇B有近火同遠火要撲息。遠火就頭先講咗。而近火就係曼聯同護級區爭兩分。如果佢於冬季轉會窗唔買前鋒後果就......。仲有就係普巴嘅離隊問題，依件事好重要！究竟留佢定放佢走，如果放佢走又可以搵邊個代替佢呢？就好似NBA速龍在轉會窗換咗李安納同馬克加素就換咗個總冠軍返嚟。當然籃球同足球係唔同，我係想講今次轉會窗係個關鍵。你哋又認為買邊位球員會令曼聯可以改變現在水深火熱嘅局面呢？

所以，歐聯資格對於目前嘅曼聯到底係獎賞定雞肋？留待看官自行判斷喇。

[多奇出品] - 紐卡素對曼聯賽後檢討

琴日睇完紐卡素對曼聯後，我覺得蘇B在攻擊線上要作出適當嘅調整：

攻擊線：1）唔應該再擺福仔做單箭頭。福仔本身係利用速度盤扭過人，擺佢去最前好多時就會變咗等波到。當佢做一啲佢唔係擅長嘅嘢時，就會感到迷惘，一感到迷惘就唔知自己想做咩。例如：不會主動搶點攻門。福仔有兩三球隊友傳中，其實落點都到位，但就被守衛好容易解圍，因為福仔無去力壓對方搶點。

應該就係擺番佢打翼同或者打雙箭頭，因為可以有得以速度過人和擾亂守衛，亦都可以為自己製造射門機會。雙箭頭就令福仔唔再係前鋒線嘅唯一目標，而且兩個前鋒會製造出唔同變化。

2）唔應該擺馬達打攻中，因為佢同占士、佩利亞同福仔嘅默契真係好差，今場有幾球係面對面都交失。仲有佢交波嘅距離係好短，同埋佢最容易俾人搶到個波時候就係背對對方。

應該擺佢打副鋒，因為佢只要在禁區頂或在禁區內攞到個波佢就有無限創造力。例如：熨射、一cup一射、二傳、小組滲入等。佢在禁區內可以製造到射門機會同入波。

3）唔應該搵佩利亞打翼，因為以佢嘅技術同速度係仲未可以隨意扭過閘位守衛，下下要達洛特上嚟助攻，咁樣跟本就就製造唔到缺口。

應該擺佢去踢攻中，因為佢唯一俾到對方威脅感就係在中路帶波扭過一兩個守衛然後遠射，咁樣就可以掩蓋佢在邊線扭唔到人嘅弱點。

4）整體攻擊陣式上唔應該同時出福仔、馬達、占士同佩利亞。如果要運作暢順就應該換走其中一人。因為佢哋四個有個共通點就係要攞住個波先至發揮到自己，同埋會增加自己嘅自我價值。換句話說，佢哋嘅無球走動係做得唔好，做唔到拉散後衞嘅效果。由於佢哋唔擅長做配合，當其中一人攞到波，佢就要做佢哋就邊個位，大家都知當比賽節奏咁急速而有壓力時一有猶豫就會容易犯錯交失波。

應該出多啲擅於無球走動型嘅球員打正選。例如：格連活特。琴日比賽見到佢出嚟之後，在禁區入做入滲有兩吓頭搥攻門，曼聯攻擊線正正需要依類型球員。除咗格連活特外，普巴係另一個選擇，唔知點解當普巴攞到個波，班球員會自動自覺走位配合，但其他球員攞住個波係無這個現象。

我認為現在曼聯攻擊線上最根源嘅問題就係擺福仔打單箭頭，當最前嗰個唔可以擾亂對方中堅，製造唔到一啲混亂，缺口，中場線就較難組織一啲有威脅攻勢。隊友就開始迷惘同猶豫，咁樣就開始有失誤，當有失誤時，隊友開始有不滿，如果繼續累積負面情緒，點可以發揮到本身實力？相反，對方容易守到我哋，我哋俾佢哋威脅感就細。對方覺得我哋無威脅，成隊球員就充滿信心，中前場球員都會發揮得較出色。此消彼長，高下立見。

[多奇出品] - 曼聯對阿仙奴賽後檢討

今場比賽在雨中進行，因為草地濕滑，如果想單靠組織去搵射門機會係難啲，反而如果可以製造混亂然後得到埋門機會就更有效。角球對應都唔錯，對手唔直接開，目的為咗製造一些變數令己隊防守時容易出錯。而罰球已經俾人睇穿，尤其係上半場，只要搵一個人釘住麥佳亞，然後搵幾個企在預計落點中，就可以清走個波。

攻擊線方面-占士表現唔錯，左邊出咗兩球好有威脅嘅波，可惜拉舒福特入涉唔到，右邊亦都有一球出波，加上佢回防幫杜安沙比，上半場可以話助攻助守。可惜嘅係佢未能製造機會俾自己，直到下半場先有射門。佩利亞同前嗰幾場一樣都十分賣力佢有一球帶波到禁區頂然後射門都十分有威脅，不過就冇咩機會爆落底線出波，要到下半場當對手放開嚟攻就開始有兩球在右邊出波。另外，佩利亞幫波嗰度做得麻麻，令楊格走唔到上嚟助攻，要靠福仔走右邊幫波。我個人覺得佢較適合打攻中多過打右翼。福仔對比上兩場比賽走位嗰度係靈活咗，多咗去右邊發動攻勢，但有個問題係佢走邊線，邊個補佢位呢？連加特定占士？另外，佢有兩球左邊出波都冇意識去衝門搶點，有一球係半單刀射門被對方擋到，好明顯用左腳邊走邊射就唔夠純熟，而且佢當單刀攻門俾守衛追時處理射門唔夠集中。連加特嘅工作係接應中後場傳送然後再傳波俾前鋒線，佢啲第一時間回傳還可以，對比馬達，始終佢同福仔、普巴個默契好啲。可惜佢好少轉身去扭波同埋交致命直線俾隊友，多數都係做啲橫傳，防守佢係幾落力落力，但我相信球迷要你在進攻上做多啲嘢囉，唔係吓吓要普巴做較炮手。

我今次睇波時發覺有一點係，占士出嗰兩球波，連加特同佩利亞在等波唔係入涉攻門。前者仲要企在禁區頂，後者雖然入咗禁區但就企咗喺度。咁就算係個波斬得幾靚都好都冇用囉。開始有用高波斬入禁區。另外，到咗下半場，阿仙奴同己隊開始對攻時，己隊攻擊線開始發揮佢哋速度做小組涉入，同有多次射門，其中麥湯米尼嘅頭鎚攻門，麥佳亞同福仔嘅罰球都有威脅，咁即係話佢哋係可以打到進攻，不過唔係隊隊波都同我哋對攻，佢哋屯重兵後防，然後靠死球屈你機。班後生仔始終爭個領袖去帶佢哋去破密集。下半場出咗格連活特，好明顯佢嘅前線走位係比福仔靈活好多，蘇B真係要諗諗。

仲有我想講吓上半場麥湯米尼嘅入球，嗰球係一個令對方守衛覺得意料之外嘅組織。點解，首先占士在右路出波，之後福仔接應唔到，然後傳中，跟住普巴想攞個波但唔得，呃咗守衛，最後麥湯米尼在冇人阻礙之下射入。我諗球隊攻擊線可以諗吓點樣可以組織類似攻勢，令到最後一腳射門變得容易。

中場線方面：普巴雖然做防中，但佢係有時遮吓個位，防守唔算專注。其他時間都係等待隊友傳波，然後一攞到個波就發動攻擊。佢嘅傳球可以穿過對方嘅防線，令到攻擊球員容易接應，再在前場做波。不過佢唔係咁識走到對方盲眼位幫波。麥湯米尼就今場射入咗一球，上半場佢嘅跑動幅度好大，個中場都係佢防守晒，高空波又肯爭頂。當我隊進攻時，佢亦都跑上助攻，下半場有一個頭鎚機會可惜頂高咗。佢今日可以話係攻守兼備。普巴無球走動幫波係少啲，但佢嘅無球走動至係最有威脅。費特交波都唔錯，跑動亦靈活，可惜出場時間太短，我都希望見佢踢吓正選。

後防線方面：今場楊格上半場發揮麻麻，可能係佢少打右閘，無論傳波定配合走位都容易俾對方攔截到，加上普巴傾向在左邊發動攻勢，右邊少人幫。上半場都食咗張黃牌。所以好少做疊瓦式助攻。麥佳亞都係一貫水準，防守同釘人都做得穩健，高空波都頂晒。對手出波亦都作出多次攔截。連迪洛夫今場嘅狀態幾差，防守釘人唔夠專注，對方有兩球傳中波都釘漏對手，只係對手把握唔到機會，如果唔係曼聯有機會失多兩球。仲有上半場尾段俾人打反擊，對方前鋒好容易起腳射門，仲有佢在同人搶身位唔夠人爭。不過佢單對單釘人比之前兩場硬淨咗。最後係杜安沙比，失波係佢同連迪洛夫傳送唔到位。不過除咗個失球外，其他時間都防守得稱職無論助攻或助守都有水準。佢好肯帶球助攻，我認為佢係曼聯重建嘅一隻好重要嘅棋子，希望蘇B俾多啲正選佢打正選。

龍門方面：迪基亞表現稱職，球隊所失嘅一球都同佢無關，上半場對手把握一次反擊，連續兩吓射門就係被迪基亞擋到。

最後，我個人認為尤其係下半場，班後生仔係可以做到一啲小組（雖然唔係好成功，但都有試），行軍速度亦都比之前快咗，而且佢哋都製造到一啲入球嘅射門。只要馬仔能傷癒復出，加上善用後備前鋒格連活特同埋在轉會窗補強就可以帶番起攻擊線。不過，普巴係一個變數，究竟要加薪留佢定賣咗佢，依個就要睇蘇B嘅選擇。

[多奇出品] - 要突破自己的福與馬

承接上一篇福馬嘅文章，我個人覺得福仔同馬仔係想不斷地進步，但點解佢哋反而會停滯不前呢？好簡單佢哋想繼續向前走時，對方球員亦會不斷地進步，而且足球係隊際運動，除咗要自己有本事之外，仲有睇吓自己同隊友嘅配合。而且踢足球係相對的，並唔係單向。相對係指睇球賽嘅同時睇自己加埋對方，當自己有優勢對手相對就處於劣勢，而你想做到嘅動作成功率會較高，對方就低。

講翻福仔同馬仔，佢哋係好專注令自己嘅速度同射門把握力加強。但咁做有個大問題，因為佢得一兩樣技能係專長，所以好容易被後衛睇通同捉到路。例如：福仔同馬仔需要有空間俾佢以速度爆入禁區，對方咪派重兵在後防，唔俾你哋有空間爆入禁區。

另外，福仔係明爆你嗰類，當攞到波想引球推進，對方咪用強壯嘅身型食佢位；有陣時萬一後防失咗位，咁咪有技巧地犯佢規囉，通常3次犯規先至有黃牌，一個攞完下次夾定邊個守衛犯規。而馬仔嘅快速引球推進係冇腳影捉，所以對方就派兩個守衛同時對付佢，務求減低佢扭過對方嘅意欲。這些對策都係賽前已經有步部署，仲要係練到好熟先至對福仔同馬仔。

講到依度，我想帶出一樣嘢就係無論一位球員幾咁好波都好，只要佢俾人睇穿佢嘅踢法，就會已經失去咗威力。就好似拳擊運動，最具破壞力嘅拳頭並唔係力量最大嘅拳，而係在對方無防備意識下所中嘅拳頭。

咁即係點樣，係咪佢哋唔需要練習，唔需要去變得咁強？當然唔係唔需要練習，但要改個練習嘅方向；唔係令自己變得更強，而係令對方變弱。我舉一個例子：就係太陽伯伯同風伯伯比賽，睇吓邊個可以令穿著大褸嘅途人除褸。風伯伯雖然好用力吹，但途人見風勢愈大，佢就愈捉緊件褸。反而太陽伯伯只係加強熱力就令途人自動除褸。現在尤其係福仔，就好似風伯伯咁。

令守衛變弱嘅方法就係分散佢哋嘅注意力。點樣令到福仔同馬仔有依啲能力呢？我參考咗2006-2007同2007-2008球季嘅攻擊手：C朗、朗尼、沙夏、泰維斯作比較。

要有全面嘅技術:

一、當年嘅攻擊手除咗速度快同臨門一腳把握力強外，佢哋嘅頭搥都係十分耍家。要頭搥好首先要入涉時間快同準，從而為自己制造空位。然後就係跳頂時間恰當。最後係決定用頭嘅邊個部位去頂。例如：前額、側額或者後腦。（小豆試過用後腦入波）

二、當年攻擊手嘅傳送技巧亦都好純熟。純熟嘅傳送技巧就係當一個人傳波俾你時，就算你係跑動緊，個波係追住你，令你好舒服地控落嚟，而唔係個波愈走愈遠。要有純熟嘅傳送技巧，首先力度控制好重要，其次係決定用腳嘅咩位置。最後係有為隊友製造機會嘅心，即係無私嘅心。對一個射手嚟講，要有無私嘅心唔係咁易做到。因為既然自己有能力去入球，點解要去製造機會俾其他人呢？

三、係無球走動引開守衛，分散對手注意力。當年嘅攻擊手由於又可以射門又可以走位分散人注意，所以對方守衛根本唔知邊個係射門，邊個係誘餌，令人防不勝防。例如：C朗有時打左邊，有時就在右邊出現。沙夏除咗在禁區入波亦都可以在左邊出波。每次有人攞波，同時就有兩三個人在唔同位置出現。當然要福仔同馬仔去轉型唔係咁易，因為佢哋都係控球技術佳，有單對單過人能力嘅球員。

四、福仔同馬仔嘅對抗性太弱。對比當時嘅C朗、朗尼、沙夏同泰維斯除咗有速度之外，個個都撞得。從性格上嚟睇，福仔同馬仔實在太斯文，平時好少話會故意犯規，更何況同其他球員有碰撞。踢其他國家嘅聯賽還可以，但踢英超啲咁體力化嘅比賽就好洩底。要技術同對抗性兼備其實係好難，因為兩者對身體條件嘅要求係唔同。例如：如果要對抗性強，身體肌肉要強壯兼懂得用力。如果要技術好身體要靈活同埋懂得掌握出腳嘅時間。

五、修正。當自己在形勢嚴峻嘅時候，無論有無控波都好，可以立刻作出修正，令形勢逆轉，依個俗語係啲人識唔識「執生」。踢波冇話有絕對啱同錯，只要係識得掌握優勢同扭轉劣勢，咁就有條件做頂級球員。但我睇到嘅係，福仔同馬仔在處於劣勢時，心理上調整做得唔好。馬仔缺乏鬥心，沒有打不死嘅精神。福仔就心急，攞到波不斷推前。同埋一樣嘢要補充，能力高嘅人未必識得「執生」，相反懂「執生」嘅人能力未必高。當然作為領隊希望自己嘅球員兩者兼備，但好多時都要有所取捨。咁你哋會選擇前者定後者呢？

以上一啲技術，唔係話不斷練習就可以調整到，而係要有老大哥分享經驗同做榜樣。好似C朗當年都係不斷進步但去到某個點時都停停地，之後先有個突破 ( 佢狂操自己身型同變到用速度同身型黎硬爆，唔再係純玩花巧嘅插花，下一個突破點係練埋門前把握嘅攻門 )，嗰種由經歷低潮再爬番起身係最難克服，當然現在好難叫C朗過嚟親身教導啦。另一個方法亦都好難做到就係將佢哋兩個借俾其他球會，等佢哋可以體驗到唔同球隊，唔同球員嘅踢法，從而對佢哋有所啟發。例如：一隻困在一個盒嘅跳虱同在一隻動物上嘅跳虱比賽跳高，邊個跳得高啲呢？答案係後者。因為前者被個盒限制咗自己，後者就可以在外面盡情地跳。同樣地福仔同馬仔已經被自己固有踢法限制咗，佢哋反而係要有一啲新體驗去被衝擊。好似普巴去過祖雲達斯學到新技術。最後就打雙前鋒，兩個球員一個打前鋒一個副鋒，起碼攻擊線唔洗咁單調，同埋打單箭頭個壓力大啲，轉咗雙前鋒後壓力就冇咁大。

總結，都係一句，當你嗰招係俾人睇穿時，就算你係幾強都無用，因為對方已經諗到對策點樣對付你。

[多奇出品] - 韋斯咸對曼聯賽後檢討

今場曼聯作客輸0:2，現在就分析一下曼聯嘅表現。

攻擊線：福仔今場表現不濟，佢好少掂波，主要原因係福仔經常都要一對二。另外，當有人在邊路出波佢都做唔到第一點攻門。係有一次有機會爆入禁區，可惜帶近龍門時可能睇到有對方守衞追緊佢，分咗心就帶甩咗個波被人解圍。占士嘅表現尤其係上半場都想做啲突破但就真係被人睇通咗，成日被兩個人一齊睇住。直到下半場打正前鋒後開始有以速度爆落禁區射門嘅機會。佩利亞開波初段踢得好賣力，亦都好努力去搶逼，但單對單好少過到對方守衞，係上、下半場各有一球右邊出波，其他都係做啲橫傳。馬達就打得麻麻地除咗有球近射柱邊嘅機會，其他就控波都好易被對方逼甩，傳波又俾對方攔截同埋係回傳多過俾直線。連加特啱啱後備入替時打前鋒，之後轉打左翼，除咗有球直線，其餘時間表現都乏善足陳。另外，今場做前場壓逼都係形同虛設，對方幾吓短傳就破解咗佢。

我睇咗今場波發現正選攻擊線除咗馬達外，其他隊員（福仔、占士同佩利亞）都唔識以地波去組織小組攻勢，占士同佩利亞都只係爆落底出波，前者都話速度快，但後者就速度同技術都未足夠可以單對單過對方守衛，其實咁樣守衛好容易適應兩邊攻勢，作出調整。福仔就好少背對守衛而做一啲二傳，只係一味向前跑，咁對方淨係用兩個中堅一齊守佢就已經搞掂。馬達佢攻擊同組織思路係靈活，但佢身體條件對住啲又快又強壯嘅守衛係輸晒，仲有佢唔擅長背對敵方，加上馬達同其他攻擊球員嘅默契係未完全建立到，所以今場作用唔大。我覺得馬達應該多入禁區，因為佢嘅強項係處理罰球同埋在禁區入面無論係射門、做二傳同都帶俾對方係好大威脅，就好似下半場嗰腳走位射門。

中場線：在進攻方面麥湯米尼同馬迪勤於做駁腳，橫傳分波都叫做得稱職。馬迪仲有一腳遠射中門，麥湯米尼於下半場角球攻勢回傳俾麥佳亞近射，可惜射地波被龍門沒收。不過兩者都缺乏一啲隱蔽式貼地長短傳球，咁間接令到馬達同其他攻擊球員一迎接佢哋嘅傳球就即刻有對方球員逼埋去做搶截，組織攻勢就相對困難。費特之後換入嚟，佢就攻強守弱，跑動力比馬迪強好多，傳波嘅侵略性亦大，仲間接令到連加特傳個靚直線俾占士。

在防守方面，無論企位，默契、回防速度都做得唔錯。可惜到38分鐘後，對方攻擊球員開始適應佢哋兩個嘅企位防守，開始多咗在中路組織攻勢同埋做一啲入涉走位，當防守第一道屏障被人破咗，後防未完全建立默契依個問題就浮現出嚟。下半場換咗費特之後，個防守穩定性都係冇改善，論防守始終馬迪經驗豐富啲。

後衛方面：右邊雲拜沙卡單對單嘅攔截做得非常準確，佢直情係一個犯規都冇。助攻亦都見到佢越嚟越夠膽上前出波。左邊楊格上半場前段都可以沉着應戰，有兩吓鏟波都幾清脆，不過後段開始失去冷靜，因為中場防守屏障俾對方攻破，所以對手針對佢防守力相對較弱，就攻佢嗰邊，就好似失第二球都係因為佢魯莽出腳而犯規輸罰球。中堅就連迪洛夫同麥佳亞當防中屏障失去效用之後，就露出默契未完全建立嘅弱點，第一球之失就係當對方球員制造到起腳機會，兩者就我以為你，你以為我上次做攔截，結果兩個都企咗喺度，俾人起腳射入。

龍門方面：迪基亞雖然失兩球，但係唔可以完全怪晒佢，第一球在禁區內射門其實射中有角度都應該會入網。第二球更加唔可以怪佢，因為俾對方有射兩次罰球機會，如果第二次都唔中龍門就真係好難踢到英超。

總結：我係對賽果感到失望，對前鋒線入唔到波亦都感到不是味兒。我亦都唔明白蘇B點樣對馬達嘅定位，因為我覺得馬達應該可以更常入禁區制造威脅。但我知道對方教練係柏歷堅尼，係一個帶過曼城攞過英超聯賽冠軍嘅教練，對住咁強嘅對手，蘇B真係要好好偷師。我真係希望蘇B可以吸收更多臨場經驗，重整番條攻擊線，同埋希望普巴，馬仔等傷兵可以早日康復。

[多奇出品] - 福馬誰來定錯對

在2019-2020年球季，曼聯正選而又有經驗前鋒現在只餘下兩位 - 拉舒福特與馬斯亞，佢哋兩個曾經交出過亮麗嘅表現，但現在狀態俾人感覺發揮唔出以前嘅水準。今季打咗5場波，馬仔嘅表現還算唔錯，但福仔表現未能說服到球迷點解要俾你打正箭頭。現在就等我分析佢哋兩個嘅打法。

首先，福仔同馬仔前鋒嘅速度都係快，以地波推進為自己制造有利位置而射門得分。不過佢哋以速度引球嘅方式其實係有好大嘅分別：福仔係擺明同守衛鬥速度，佢响準備帶波一刻個身體語言已經話俾對方知我要跑得快過你，直到跑咗一段路後，守衛係因為跑得唔夠快所以就追唔到佢。而馬仔嘅快係當佢起步引球時，守衛係完全察覺唔到，到佢差唔多就快過對方時，守衛先至察覺到，啲人俗稱「無影腳」。

同樣地，佢哋雖然都係攻勢嘅終結者，但其實骨子裏都係有分別。福仔主要係靠優良身體條件，起腳射啲速度同力量兼備嘅波，當佢起腳時龍門係會察覺到。這個擺到明係學C朗啦！而馬仔係靠佢優質嘅天賦，起腳時龍門未必即時可以察覺，都知道時個波已經飛緊向龍門。這個好似一個冷面殺手，在你面前插你一刀你都察覺到。

然後，硏究吓佢哋心理方面，究竟點樣影響佢哋技術嘅發展。由於佢哋好後生時已經為曼聯一隊上陣兼做主力，佢哋在觀眾、球迷、教練同隊友嘅壓力低下表現係唔可以經常有偏差，所以佢哋大多數只會做一啲自己最擅長嘅動作。例如：以速度制造空位射門。其他自己唔擅長嘅動作就好少做。例如：頭搥攻門。大家都知，如果將自己學過嘅嘢唔用一段時間就會退化。所以佢哋嘅進攻套路都係較單調。例如：佢哋在無球走動，做二傳、頭搥攻門、窩利抽射、執雞同引開守衛都唔係經常做，長此下去佢哋這些技能都會退化。（講笑咁講，我所舉嘅咁多例子，每樣都可以寫一篇文。）

咁我抽兩樣對攻擊球員最重要嗰兩樣講：就係引開守衛同做二傳。引開守衛係指當球員無球在腳時，做引開敵人注意嘅走動，使到己隊球員更容易組織攻勢同射門。而二傳就係當己隊球員迎接來球可以即時或第二時間傳球，藉此制造機會俾隊友直接攻門。由於福仔同馬仔習慣引球進攻，所以佢哋走嘅位多數係令佢哋進成單刀狀態，直接攻門。要佢哋引開守衛制造空位俾隊友唔係完全無，但少囉。而二傳就更少，因為佢哋攞到個波就已經諗點射門，射唔到波扭唔到人先俾番自己友咁就唔係二傳啦。

另外，佢哋防守力極差都係一個大問題。唔係！在前鋒身上唔應該用防守力形容，係應該用「壓場感」，「壓場感」即係指當敵方守衛控球時，前線攻擊球員壓前，令對方在有壓力底下出現失誤。現在英超球隊嘅防守都做得好好，正面攻佢哋其實唔易攻入，所以要靠前場壓迫令佢哋出現失誤先至可以增加入球率，曼城同利記都係用這招。

講開又講，容許我用少少篇幅談論盧卡古，原因係我上一段所講嘅技術，佢係做得唔錯。尤其係曼聯2017-2018年攞亞軍嗰季，點樣做得唔錯我唔多講，我要指出一點就點解盧卡古技術可以咁全面（雖然控球經常控甩腳）？因為佢曾經在中游球隊磨練技術，在一個可以容許佢有失誤嘅環境下成長，使到佢在技術同心理上作出調整。除咗佢，曼聯有啲出名球員都係之前在中游隊浸淫。例如：貝碧托夫（2006-2008熱刺）同卡域克（2004-2006熱刺）等。

其實要講福仔同馬仔，仲有好多嘢可以講，不過我希望自己唔係為寫而寫。最後，我覺得有一個人係可以在技術同心態上引導佢哋，嗰個人就係「朗尼」。如果我係蘇B，我在冬季轉會窗第一個就買翻朗尼，因為朗尼嘅成長過程同福仔、，馬仔相似。以朗尼嘅經驗同能力，應該可以幫到佢哋。

[多奇出品] - 曼聯對李斯特城賽後檢討

曼聯贏咗1:0，終於拿下聯賽第二場勝仗，唔知你哋滿唔滿意佢哋嘅表現呢？

佢哋有做得好嘅地方，亦都有嘢需要調整，咁現在講吓我對佢哋嘅評價啦。

在攻擊線方面：福仔、占士、佩利亞同馬達在技術方面欠缺一種全面性。例如：佢哋好少用頭鎚攻門，除咗有一球係楊格開角球交俾麥佳亞頭搥攻門。仲有佢哋傳波嘅默契係幾差，尤其馬達攞到波後都要諗一諗，帶一帶個波至傳，有時仲會面對面傳失球，好似有球波馬達傳俾占士，但占士走快咗最尾交失咗。福仔都係老毛病，佢要攞住個波有一啲空位被佢爆先發揮到威力，但當要佢同對方守衛爭位，爭頂攞波佢就會縮。最重要佢唔係爭輸咗，而係佢做都唔做，所以到二十幾分鐘後福仔都好少接觸到皮球。占士係較突出嘅一個，在上半場都有幾次以速度進過守衛，擾亂對方後防，但可惜佢依種擺明以速到過人好快被對方睇穿，同好快適應咗，所以到之後占士就少咗機會用高速引球推進過人。佩利亞在右邊就可以話踢得麻麻，在右路冇咩出波，想做一啲小組滲入但唔成功，原因係佢一來未有板斧扭過班後防，二來佢同雲拜沙卡默契仲未建立。另外，除咗占士同福仔嘅十二碼外，其他球員仲未搵到入球嘅方程式，換句話講，就係佢地嘅得分點實在太少，試問如果在比賽過程中，球隊係冇咩得分板斧，咁點俾到一種威脅感俾佢哋，加上正選4個攻擊球員啲搶逼未有俾到壓力（除咗鍾泰希佢係逼得幾投入之外），所以之後李斯特城班守衛踢得比較輕鬆。

講完佢哋做得不足嘅地方，就講吓佢哋有咩做得好嘅嘢。

福仔處理十二碼有備而來，睇見佢射十二碼首先用橫移步之後加上普巴式碎步然後射右下角，動作做得流暢，無拖泥帶水嘅感覺。另外，兩球罰球都射中角位，係佩利亞射得爭少少隱蔽性。我相信佢哋班球員係預計到有射罰球嘅機會，所以睇得出佢哋有練過。

中場線方面：麥湯米尼同馬迪個默契都唔錯，佢哋知道幾時要一齊上去參與助攻，幾時要兩個一齊回防。有時候麥湯米尼上去馬迪就回氣，有時就對調。佢哋嘅表情話俾你知佢會點做，唔使成日指手劃腳咁。仲有佢哋做防守嘅時候係非常專注，而且回防速度係好快，頭鎚亦做得好，尤其係麥湯米尼在禁區多次用頭鎚解圍，攔截亦都做得硬淨同準確，仲有佢哋兩個好識得利用犯規去延遲對方進攻，賽後兩個防中竟然連一張黃牌都冇。費特亦都做得稱職，佢嘅跑動亦都幫咗後防好大忙。佢哋三個為後防做一道好穩固嘅屏障。

如果去講佢哋不足之處就係麥湯米尼都有在中後場失波，但佢同普巴唔同嘅係佢會即刻跑番去搶番個波，而馬迪亦都以佢嘅經驗去減少中場失波為已隊帶嚟嘅壓力。仲有佢哋防中缺少咗好似卡域克嘅隱蔽式地波傳送，例如：當卡域克到起腳至傳波俾隊友時對方係未察覺到個皮球，到察覺到時隊友已經攞到個波組織攻勢，如果防中球員可以調較佢哋嘅傳球技術就更好。

防守方面：後衛今場做得唔錯，當然其中一個原因係防中所做嘅第一道屏障做得非常穩固。另外，守角球就用聯防，搵咗麥佳亞、麥湯米尼等頭搥好嘅球員，盡量隱藏已隊係致命傷。而中堅處臻土回傳球做得好穩妥，麥佳亞嘅高空波幾乎係殺晒，連迪洛夫亦睇穿咗對方好多嘅攻擊，然後作出攔截，不過佢嘅對抗性亦都有待改進，開賽頭5分鐘爭啲輸波，始終佢嘅踢法太過斯文。左右閘亦都做得好稱職，雲拜沙卡同楊格助攻助守都做得唔錯。雲拜沙卡在防守方面，攔截非常準，根本對方想單對單扭過佢都好困難，而且佢頭搥又唔差，真係一個難得嘅收購。佢助攻就爭少少，主要係同前線未夾熟，再過多幾場夾熟啲之後睇睇十佢會唔會有助攻？楊格就好明顯你叫佢單對單防守對手就較困難，但如果你要佢以經驗去預先判斷對方嘅攻擊套路就還可以。另外，佢打翼出身，所以佢在有壓力低下處理皮球係做得好好，係好少在後場失波。而佢嘅助攻算係帶起少少左路嘅攻勢。

龍門方面：今場要撲救次數都唔多。係頭5分鐘有球要迪基亞用腳擋，係佢最擅長嘅一樣技術。而角球嗰度，蘇B安排打聯防，令到佢唔洗暴露佢弱點。整體表現算合格。

雖然贏波，但表現未必可以完全說服到球迷。球隊仲有好大嘅進步空間。