[WKD手記] - 國際賽後打吡戰前
筆者自細就同好多香港球迷一樣捧英格蘭，但長大後就覺得香港隊先係歸宿，所以國際賽好多時都無乜波想睇。餓左成個禮拜無曼聯波踢，主場出擊天鵝梗係以食硬嘅心態睇喇！呢個星期有好多球員為國家隊出戰，對摩連奴選人排陣有多少啟發，而贏完史雲斯之後可以為打吡作最後準備。入正題之前，係度多謝已離隊嘅伊巴為曼聯貢獻左咁多，見到佢係新球會已經有個好開始實在係令人雀躍。一個球員嘅成就唔受制於佢效力咗幾耐，當年拿臣只係踢左幾個月已經征服曼聯球迷嘅心。
曼聯係聯賽失波第二少，但陣中兩個中堅鐘斯同史摩寧都落選國家隊，當中涉及傷病因素，但證明修夫基都唔太睇好紅魔條後防。廿七人名單入面閘仲多過中堅，只要餘下賽事佢地踢返正常水準的話應該可以去到俄羅斯嘅。英軍開始加快改革步伐，無踢大球會就必然入選呢支歌仔唱，一年前又有邊個諗到連加特會搶咗上年大勇嘅阿里個正選位？法國方面，迪甘斯先為普巴講說話，再係第二場友賽俾佢正選上陣，一入球一助攻後即刻踢翻出信心，最大得益肯定係曼聯同摩連奴。而麥湯美尼嘅輕傷再一次俾機會普巴重奪正選。
輕取史雲斯又係踢左半場好波，五十分鐘打後就收油。上半場表現絕對收貨，尤其係山齊士、連加特同盧卡古係前場嘅配合令人眼前一亮。山齊士啱啱加盟時被要求盡量靠近盧卡古，佢好似漸漸做到，更加驚喜嘅係連加特催化埋前場化學作用。好多第一時間短傳，走位自由度非常高，馬達同連加特係左中右都有交替出現。因為大家都踢得好生，場上無邊個被盯得好緊，山齊士一走入中路，史雲斯就即刻亂曬。盧卡古射入個人英超第一百球，亦係今季第三十二球，最近連短傳長傳都有進步，相信佢份心態已經得到球迷肯定。未來就可以提升對佢嘅要求，就係控波射波要再清脆啲，咁樣先可以提升轉化半機會嘅能力。普巴今場再次企防中位放咗幾腳靚波仲差啲有助攻添，睇得出佢有嘗試克制過度上腳嘅習慣，就算帶上去攻都會見到前面有人落返黎填位，成個中場演繹到機動性出黎。當然喇，史雲斯完全無針對性部署，令到局面非常一面倒。進入下半場佢地先識將條中場線壓上去普巴附近，雖然曼聯開始多咗失誤，但揸住兩球同埋神龍優勢己經係睇住黎食。
下星期曼城只要係主場贏到曼聯就可以即時封王，我地係聯賽就算已經無乜野爭都會全力阻止。相信摩連奴唔會排出咁進取嘅陣容，433/451下普巴可能拎返個十號位黎踢，防守曼城雙核大衛施華、迪布尼係成條中場線首要任務。上一循環雙方差距比相像中少，經過咗大半季之後曼城建立到一套好有紀律嘅踢法，單睇領先愛華頓三球都無放軟手腳就明白，而曼聯兜兜轉轉之下仲未摸索到條方程式。排面上爭咁啲，但曼聯有成個星期休息，下星期當決賽咁踢！記得留意連迪洛夫，佢漸漸搵到自己定位同風格，可能下星期會正選上陣添！
[WKD手記] - 原罪缺點
民怨儲左咁耐，終於係今個星期引爆。贏咗雙紅會當然開心，但好波只係維持左四十五分鐘，下半場踢得太龜縮簡直就好似第二隊波咁。當時仲可以話為咗留力踢歐聯而放慢手腳，但輸埋俾西維爾就負評大爆發。入魔至今，摩連奴第一次經歷下台危機。先旨聲明，今日主力講摩帥，唔代表我認同球員心態懶散、季尾都未修到身係合理嘅。
現代足球講求嘅係成績，忠誠、風格、陣容雖然重要但通通唔夠成績緊要。對曼聯迷黎講，只要可以重拾冠軍，哪怕賣走朗尼、雪起上季踢得好嘅靴里拉，有必要嘅賣多次普巴走都仲得！曼聯請得摩連奴返黎，唔通係因為佢教嘅進攻好悅目咩？我地心底裡好清楚防守先係佢拿手把戲，季初進攻有板有眼當然係Bonus，但沉悶嘅三分都尚可接受。相對於普捷天奴、高普、哥迪奧拿等教頭，佢少左華麗足球呢個防衛網，所以輸波果陣佢係球迷心目中就一文不值，更何況佢已經浪費左好幾個有天份嘅攻擊手呢？面對現實，佢黎就係為左勝利，如果聯賽領先十幾分嘅係曼聯，就算幾保守我地都會默默接受。即使佢有提及球員係進攻上未達到佢要求，但亦唔好再幻想佢會忽然踢得好具侵略喇。
除左足球風格，公關手腕同人事處理亦係佢經常俾人批評嘅原因。語不驚人誓不休令佢得到狂人嘅花名，以往有人將佢呢種性格解釋為轉移傳媒焦點，等班球員唔使承受咁大壓力。係當年黎講又真係湊效嘅，但同一招用得太密就無用架喇，何況佢近年最大轉變就係開始強調自己係冠軍教頭、拎過幾多獎盃，一副阿Sir做野唔洗你教嘅口吻，想唔得罪傳媒都難喇。
過往同摩連奴不歡而散嘅球員多不勝數，多半係因為心態同防守達唔到前者要求，但更大原因係溝通方式出現問題。鐘意得佢通常都係啲心理質素、好勝心最強嘅球員，泰利、林柏特、馬達拉斯同伊巴就係好例子，因為佢期望球員就算點批評都可以頂得住，最後係表現上有突破，但一套方法總唔會啱哂所有人口味。曼聯防守進行改革，我地睇到米希達恩係足球風格雖然係唔夾，但後期表現根本係完全係因為信心低迷所致，已經唔關個人實力問題。一個廿零歲嘅英超球員要面對各方批評本來就唔係易事，有啲需要時間消化﹐有啲需要人地扶持，而摩帥就堅持佢呢種處事手腕。
米希達恩人已走，黎緊最大可能離隊嘅就係梳爾，佢被領隊稱讚為最強左閘之後就一路無踢過正選，你話迷唔迷惘？史高斯退役後成日鬧呢樣鬧果樣，俾人觀感麻麻，但對梳爾嘅分析真係無得你唔認。『當教練席係佢果邊時，佢完全無辦法專心踢，因為摩連奴俾左好大壓力佢』梳爾嘅身體語言反映咗一個訊息︰佢係場上做嘅每一個決定都會俾領隊昅到實，結果所有行動都好避忌，就好似米希達恩咁失左對咗足球嘅直覺。
要解決既球員關係何其多，普巴性格多變就話難處理姐，連靴里拉都由最佳球員變到無哂定位，陣中又無好似當年保羅費拉拿呢啲溝通橋樑，呢條路唔通得返馬迪、盧卡古會陪摩連奴行過去？
[WKD手記] - 雙紅會半場好波
係打吡戰勝出比起反CUP水晶宮仲更奮到全隊士氣，因為對住英超攻力第二強嘅鋒線，可以守到佢地無乜符弗，上半場仲入左兩球靚波。話就不能說得太盡，因為文章出街之時曼聯已經被西維爾踢出歐聯，但從呢場波真係見得返前中後三線應有級數。
倒轉咁講，如果對西維爾我地夠膽踢到好似雙紅會上半場咁有紀律同效率，贏嘅可能係我地。
排陣方面摩連奴今次技高一籌，透過左翼壓制對方右閘，係邊路完全食住利物浦。賽前以為高普會一貫地推高條防線，靠體力化足球搶中場得天下。開賽初段利記的確拎到唔少控球權，但個波其實好少去到曼聯禁區附近，呢樣野要歸功於球隊防守時紀律同默契好，知道去到咩位要開始迫出去。利記其實唔少人係中路走位﹐又嘗試快速轉邊希望拉走雙防中同中堅嘅距離，但今仗見到佢地四個補位意識相當好，而且仲有盡力溝通，當對面開始overload時更加會見到山齊士回防填返啲空隙。用另一場大戰黎比較就可以知道紅魔鬼係防守上嘅進步︰仲記得十二月輸俾曼城嗎？當時曼城放高波入危險區域，史達寧同捷西斯竟然係禁區可以三番四次控低個波再修正埋先有人埋黎迫，而今場沙拿想入禁區都難關重重。
簡單黎講，曼聯反擊太有效率令阿諾特完全唔敢疊瓦助攻，沙拿一個人係右路俾好醒神嘅楊格封印足全場，戰術上已經成功左大半。相反，曼聯係自己右路控球嘅時候會放慢黎踢，可能知道馬達容易俾人夾死之餘，又唔適宜快上快落喇。不得不提麥湯美尼成長速度驚人，唔講真係以為踢緊果個係卡域克黎，仲高咗幾吋添！再次成為迫搶目標，但佢完全唔怯場，係中場做交波轉物都夠哂快捷，亦學識左利用重心去應付身體對抗，對手好快就無再刻意去拍佢。咁快已經不被大賽氣氛影響表現，真係令人非常期待﹐呢個PLAN B已經直接俾緊壓力一眾中場球星了。唔好忘記佢對車路士果陣因為大意而令球隊先失一球，簡單工作佢似乎掌握得遊刃有餘，黎緊應該俾佢作更多嘗試同埋增加出場時間。
拉舒福特難得重奪正選就梅開二度，入選世界盃廿三人嘅機會大增，對曼聯固然係一件好事，但同時令仲未融入球隊嘅山齊士更大壓力。山齊士前場大部份位置都踢過，即使夠哂勤力但繼續瘋交失波，尤其下半場形勢開始被逆轉，佢就算拎到波都會心急交返個波俾對面﹐一係就格硬盤扭。我唔認同佢已經開始回塘，反而係被心理壓力影響發揮，如果佢仲俾最高薪英超球員呢啲名綁住自己，硬係想將阿仙奴嘅球味帶入黎，其實好難預見到佢會啱摩連奴用。
[WKD手記] - 攪攪陣最後一個彎位
“轉埋個彎就入大直路喇！”過埋呢一兩星期嘅調整，往後兩個月直到球季完結都唔會再有喘息機會。襯住呢個彎位不如回顧下兩個位置對球隊嘅轉變。
盧卡古係本專欄出現次數應該最多，因為佢係必然正選、首席箭頭之餘，仲係球迷批同恥笑得最多嘅對象，而我偏偏認為佢值得更多尊重。主觀願望梗係想佢完全取代伊巴，客觀事實就大家都知佢腳下功夫差，尤其係控波呢瓣。無可否認佢對強隊真係無乜入球同助攻，尚未擺脫弱旅殺手呢個花名，甚至因為佢嘅存在而剝削左馬仔同福仔兩個踢正前鋒嘅機會。計我話佢對住頂級防線仲有大把進步空間，但鬥志同心態足夠佢再上一層樓。以前踢拖肥同西布朗成日俾人話佢獨食又罵隊友，今年見到最常激勵隊友嘅就係佢，一個成功或者失敗嘅進攻佢都會拍掌鼓勵，亦交左好多次killer pass俾隊友。球場外嘅評價佢好少回應，但就非常信任教練團嘅分析。一個球員如果謙虛，勤力，用鬥志去面對批評，佢差極都有個譜。英格蘭班國腳成日俾人話得心理質素差到好似小朋友咁，不如向呢個廿四歲魔獸學習下。
麥湯美尼今季彈起為中場帶黎咗一次改革。馬迪一加盟就場場踢足咁滯;普巴就梗加唔洗講，本來買馬迪就係為左彌補佢防守不足，條中場線又點少得佢呢？咁樣一來條中路已經有兩個鐵膽，仲有費蘭尼、靴里拉、米希達恩、馬達，幾個球員爭剩餘一席，連加特後期都加入競爭行列，有邊個會諗到呢個無名小子會上位，同馬迪拍檔緊雙防中呢？從頭幾場表現應該唔難察覺佢踢法有好重卡域克影子：著重傳球、少上腳、無球時尤其見到其閱讀球賽能力。不過佢鐘意企前半格，結果令馬迪防守時同之前一樣咁孤單。聯賽對哈迪斯菲爾德，摩連奴第一次委派佢踢純防中，佢唔算得心應手，但就嚴格執行到穩陣為先。明知自己作為英超新仔未建立到信心就會被對方盯上，於是踢得好簡單，搏到唔少罰球。就係呢場波示範左俾坐係後備席嘅普巴睇，摩連奴對防守嘅要求。我地明白普巴唔會踢死一世防中，呢個亦唔係佢最佳位置，但作為一個全能中場如果無紀律去執行每個中場位置嘅主要職責，又點稱得上全能呢？
曼聯陣中不乏頂級球員，但從部份球員同球賽中感受到佢地對摩連奴設定嘅職責有所懷疑，曾經有一段時間見到球員係場上士氣低落，球迷亦唔知自己睇緊乜。莫耶斯同雲高爾捱唔過呢一段，愈搞愈衰最後都係要同紅魔分手。摩連奴雖然手段好硬，但賞罰分明令佢地保持競爭力同鬥心，當球隊贏波時自然會理解領隊初衷，近排仲反勝埋水晶宮，應該會再團結起黎嘅。中前場就見到唔少正能量喇，條防線呢？迪基亞近仗失兩球近映柱波反映到神有時都係平凡人，前面果四個唔幫手嘅話救得一時救唔得一世。山齊士就話一月先加盟姐﹐班後衛磨合咗成季喇﹐究竟係佢地質素有限定摩連奴教得唔好？
[WKD手記] - 攪攪陣
守和西維爾後，我諗無乜人會話踢得好好掛，頂多係零比零呢個賽果唔算太劣勢。另一邊車路士係歐洲戰線都只能打和收場，但人地係欠運先贏唔到西甲榜首，就算曼聯有主場之利都預左會踢得好辛苦。呢兩場防守都唔少低級錯誤，係人地啲前鋒識攪攪陣定我地自亂陣腳？
外界成日揶揄摩連奴對強隊淨係識泊大巴，同佢以前教過嘅球隊比，曼聯好似最唔穩陣。往日見識過真正車仔同國米嘅銅牆鐵壁，而紅魔最近不失球幾乎都係因為迪基亞多番神救，而唔係後衛限制到對方埋門機會。
自從係奧脫福睇過畢爾包踢曼聯出局後，一直都覺西甲隊好難踢。西維爾有好多次零壓力頭槌都頂唔穿迪基亞十指關，但點解會有咁多球空哂任頂呢？臨完上半場前，西維爾右路一次傳中，馬迪因為補位而唔敢向華斯基斯施壓，華斯基斯企係佢同史摩寧之間就拑制哂兩人企位，梅利爾就入左無人之境。華倫西亞應該觀察到完整情況，但都犯左同樣企位錯誤，可見西班牙式入攝拉空對靈活性甚低嘅曼聯非常有效。
回到英超，車路士先開紀錄，又係一記BB式防守失誤。當韋利安係中場交波俾夏薩特時，曼聯其實有足夠人手應付三人反擊，絕對唔應該有任射龍門嘅情況出現。最大責任當然係麥湯米尼喇，佢好明顯掛住望波而將防守目標轉左做已經有連迪洛夫招呼嘅夏薩特，韋利安就係咁樣食左全季最大塊叉燒。咁其他人呢？淨係講果球攻勢，佢同連迪洛夫、楊格三人之間毫無交流，只能斷估隊友企位同判斷整個防守形勢。就算唔能夠預判韋利安前插、只要簡單用言語或者肢體動作表示夏薩特由佢黎盯實就已經有可能提醒到隊友。咁講可能馬後炮，但對於中堅黎講，每一次防守時手口並用咁溝通、指揮同協調防線係基本技巧，等到有危機先咁做就已經比本能反應慢。現時陣中仲有邊個會指手劃腳？比盡都係守死球果陣史摩寧會指揮多啲。唔改善呢個問題嘅話攞幾多人係後面都係會走甩啲走位型前鋒。
掉返轉睇，我地又有邊個用跑動黎擾亂對方防線，增加佢地離開崗位同溝通失誤嘅機會？當然係連加特喇，佢換入後無時無刻都搵機會係擺脫後衛視線範圍，就算最後唔交波俾佢都已經分散左防線注意力。由米希達恩到福、馬、山，始終係連加特最踢得出”盧卡古身後自由人”呢個角色。佢同前面講果幾個人最大嘅在於用波簡單直接，縱使有時會玩下腳法，佢俾嘅波走嘅位永遠都最容易令隊友理解；佢亦唔會強求攞到波先突破，成日無球反越位入攝之餘，縱向橫向跑動都做到足。入波非僥倖，佢唔夠其他新星出名，但絕對係曼聯嘅一粒寶石。
[WKD手記] - 領先一球永遠很危險
足總盃第五圈再遇哈特斯菲，無論賽前賽後都有討論話題，不過最重要都係成功出線。可能聯賽已經無行，上一場落後時好似唔太肉緊咁，感覺上黎到盃賽就少啲包袱，多啲鬥志。莫耶斯講過領先一球永遠很危險，用黎形容呢隊曼聯都仲係咁貼切，係巧合定事出有因？
上星期分析過後防過少參與組織會限制咗進攻能力，呢個問題上半場再一次表露無遺。開波早段就靠盧卡古一己之力先開紀錄，其後三十五分鐘幾乎俾對面猜住黎攻。今季我地早早領先嘅情況唔多，即使有都好少提前鎖定勝局，通常都係六十分鐘打後先入到保險球。有踢開業餘隊/聯賽嘅讀者，入完一粒隊友最鐘意講咩？“未贏架，當零比零咁踢！”
曼聯球員偏偏唔係咁諗，贏緊一比零反而愈踢愈縮。唔係要同曼城做比較咁極端，但見到哈特斯菲控球時條防線都企得比我地積極就知有問題。
控球在腳果陣，中堅無拉開距離等防中落黎當第三中堅咁踢，一個死實實嘅442，兩閘自然上唔到去，人地邊路四個人盯馬達同山齊士就緊係容易喇。短傳目標同路線都太易估到，跑多兩步已經令史摩寧同連迪洛夫，甚至係迪基亞局放長波，落點一般之餘，對手亦好少走甩哂第一二點。反觀人地做到哂上述踢法，一個對角直線放去右路會見到閘翼湧上去接應，好在佢地係中路真係無乜邊個有破門能力，我地班後衛頂得住啲高空攻勢，守得住領先優勢。
因為縮得入而逐漸放棄控球權，成個過程可以見到山齊士同其他球員嘅思維有別。作為翼鋒佢希望直接俾壓力對面中堅，迫右閘返黎幫波而唔敢壓得太前，但要成功執行就需要隊友配合。防線深得滯令到梳爾同山神距離太遠，對手變相有更多空間入攝，所以山齊士最後都跟返梳爾黎企位同協防。係呢種決策上無話邊個啱哂，最重要係成個團隊一齊執行。佢爭勝心強而且敢於表達諗法所以一加盟就指手劃腳，但如果咁樣可以激發到隊友同加快融入速度，又點會係壞事呢？
下半場曼聯就真係踢返自己瓣波，畢竟要卡域克同馬達呢類球員發揮作用，前提係要攞到控球權。結果就係要當零比零咁先入到第二粒，先贏得夠說服力。從半場出黎嘅表現黎睇，摩連奴係觀察到呢個問題所以指示佢地要踢得積極啲。外界經常質疑佢太保守，有時可能係球員自身信心不足所以先踢得龜縮，將所有批評推向領隊實有欠公平。而領隊嘅職責就係要令球隊係呢種高半班波嘅比賽晉級之餘，同時提升士氣同累積信心，咁先能夠贏到之後嘅勁敵。呢場只屬僅僅收貨！
黎緊兩三個星期大戰連場，又係一系列嘅考牌戰！
[WKD手記] - 回帶
摩連奴賽前從未係聖占士球場贏過波，面對今時今日要為護級而努力嘅紐卡素，就算點無信心都無諗過真係會一分都拎唔到掛。事實係由車仔年代就開始同佢鬥嘅賓尼迪斯，今場激發到班球員去搏命，呢隊喜鵲真係對親曼聯都咁醒神 (當然唔少得前利記球員舒爾維喇)。撇開對手表現，我地今場波嘅表現如果放係全季黎講已經唔算係太差，前場有攻勢欠運、後場失死球已經係老生常談。睇完半場令我諗通左起以前隊曼聯係某一環比而家優勝之處，你又知唔知係咩呢？
呢場波只講兩個事件，首先山齊士扭過門將後面對空門，佢無直接起腳反而修正左一下先射波，最後被勤力嘅利祖尼護空門清走。呢球只可以話佢唔夠信心，但未達恥笑級別，事關過完人之後的確有啲人快波慢嘅情況，心急起腳又可能射唔中龍呢。山齊士加盟後攻勢已經入肉左，今場又屬於少有踢得好嘅紅魔鬼，真係怪佢唔落。第二球波好多人怪史摩寧控甩左腳波，插水失敗輸個死球俾人結果入埋。史摩寧當然錯在技術差，否則都唔洗情急之下插水，但呢個失誤何嘗唔係由鐘斯交球醫院波先呢，再者附近隊友都企定定睇住佢自己去，如果華倫西亞提一提場結果可能已經唔同。至於死球盯漏人相信大家都知道有咩問題，而家應該要俾返啲空間普巴調整心理同狀態，睇多幾場先再談論普巴喇。
上半場傳波慢到嚇死人，我開始思考點解以前曼聯無咁易老鼠拉龜。中前場分析就多喇，但今場有走位有交靚波又不乏埋門機會，問題係個波係中後場悶傳太多，好耐先做到一腳組織出黎。
係後防。當里奧同史高斯效力緊曼聯時，即時高峰已過，仲可以利用簡單短傳黎拉空對手。史摩寧腳下功夫麻麻，不過踢法同視野比起鐘斯同伊雲斯更似里奧，費爵爺退休前明顯想佢接班。我認為佢仍然擁有上述長處，不過之後三任領隊唔鐘意後衛上腳太多，於是我地而家見到馬迪拎波位置愈黎愈深，希望帶上去再交波。事實係佢同其他中場球員斷橋，只要搵專人壓迫馬迪就可以令攻勢減緩，甚至要放長波。
以前兩老又會點踢？佢地好興一路面對面互傳俾對方一路將防線推到中圈附近，過程無甚風險，因為一個望住後場一個望住前場，隻鬼未到就已經傳走左個波。熒幕上好似無意義嘅傳球﹐實際上對組織進攻有幫助，而呢場即使做左好多下轉邊，都因為傳控速度慢而變得低效。史摩寧同鐘斯絕對識亦都做到One touch交俾簡單目標，但保守令佢地習慣正面控波仲要黐腳，修正多腳先再傳走，到真係有人埋黎拍就出事。呢種惡性循環令到佢地自己信心下滑之餘，中場負擔都增加左唔少，睇下季中隊隊都識得迫搶馬迪就知喇。
好多人批到史摩寧一文不值，其實佢有一啲傳統英人中堅無嘅質素，至於用唔用得著就要睇下摩連奴喇。踢得唔順究竟係咪純粹人腳問題呢？係咪大清洗就得呢？
[WKD手記] - 三步定律
聯賽最吸引人睇嘅地方就係你可以成年咁睇住自己隊波點樣成長、同佢地一齊經歷高低起跌，回顧返每一個賽季好少可會覺得表演同成績唔成正比，因為係一場長途賽入面，實力佔嘅成份一定遠超於運氣。相信無乜人會否定曼城今季好好波，但曼聯弗起上黎無論攻守都有得相當水準，唔應該落後緊曼城十幾分。標題講果三步並非指要作出三個改變先有力奪冠，而係指我地近季發展步伐就係行兩步退一步，開始俾人一種海鮮波嘅感覺，以今個禮拜為例我地已經見識到兩隊狀態鬥心有別嘅曼聯。
作客輸兩粒比熱刺真係一字咁淺，就係一開始已經打爛左自己算盤。正如摩連奴賽後分析第一個失波包含四個失誤︰無迫搶俾對面輕鬆較炮、高波第一點輸、第二點輸、走甩艾歷臣。淨係呢十一秒已經說明左我地有幾唔集中，你叫防守行先嘅摩帥點忍？第二粒雖然都係核突，但算係執行上出錯，罪名比起係球場上遊魂(詳見第一球馬迪企位)叫做輕少少，當然鐘斯用左腳清波會順腳啲，但去到佢呢個歲數應該好難再改善到呢種本能用順足嘅問題。進攻是其次問題，今場熱刺示範左點樣走位，孫興民把握力未必好穩定，但佢啲走動經常令到簡尼有機會單對單，甚至有角度起腳，曼聯要學下點用呢手牌做到同樣效率喇。
打完強隊之後返黎主場對七場不勝嘅哈迪斯菲爾德。著巴被列作後備，取代防中位嘅係青訓產品麥湯美尼，今仗佢逗得仲深過馬迪，上腳時間短又甚少向前傳波，同伊奧維果埋嘅踢法有好大出入，應該係摩帥想佢先以簡單為主。
呢個變動令到對方派人專責招呼佢，希望迫佢犯錯再打開反擊缺口，不過麥湯美尼非常有紀律，就算轉身唔快都有驚無險咁搏到幾個犯規。從場上表現睇得出佢好多動作同視野都有卡域克嘅影子，缺點亦都相似–唔擅用上身幫助護波、下盤唔夠穩陣。馬迪係上半場同佢構成一道屏障，但同時全隊企位非常保守，拎住八成控球都做唔到咩威脅。
係更衣室收到進攻指令後，中前場自由度得到解放，走位靈活得多，最後淨勝兩粒。摩連奴判斷出哈迪斯菲爾德無乜還擊能力所以半場就改變踢法。其實呢隊曼聯先係球迷最想見到嘅波，如果後衛夠穩陣俾到信心領隊，佢應該放心係主場一黎就強攻。要過到佢呢個心理關口，首先要守好人地啲反擊同長波，否則好難改變到佢保守行先嘅作風。
新仔明顯都係踢慣中中甚至再前啲，但今場表現都夠平穩，普巴可以從中學習返一個防中嘅基本要求同意識。無錯我地都意識到攻中最啱普巴﹐但當你被安排係防中時就要跟足戰術板黎行事，因為球隊永遠大過球員呀嘛！
[WKD手記] - 山神來了
山齊士一如外界預料，係冬季轉會窗加盟曼聯，愈踢愈沉嘅米希達恩被交換到阿仙奴重新上路。話咁快佢就已係足總盃為曼聯首次披甲，仲交左一個助攻，貌似有個唔錯嘅開始。但論你有幾多斤兩都好，唔岩踢嘅一樣要走人，曼阿風格迥異，佢又要點樣先容融到入球隊呢？
對伊奧維因為馬素爾休戰，盧卡古又踢後備令拉舒福特有機會打正前，山齊士就順理成章出任近年踢慣嘅左翼。啱啱對熱刺亦都係捱住左路黎踢，睇黎摩連奴唔太希望佢一黎就要轉做右翼。
阿仙奴年代嘅山齊士比起巴塞時做多左波，奧斯爾狀態差果陣佢更加會分擔埋進攻中場嘅角色。呢啲經驗令佢由純翼鋒變成一個全能前場咁滯，但同時有球迷認為佢變得太鐘意上腳，成日都想交啲killer pass反而終結左攻勢，仲有啲球霸心態添。
黎到曼聯，假設中間幾個發揮正常，佢就唔洗帶咁多波，畢竟佢把武器係愈接近龍門愈有威力，後面理應有足夠支援同供應俾佢專心突破同入波。中場話事人普巴熱衷用波，所以山齊士首要任務就係要適應分工，同中場球員建立進攻上嘅企位同默契，減少爭住做波嘅情況。
雖然同福仔做左幾下短傳，交左兩腳直線，仲有埋個助攻，但見到隊友入攝時機同接應位置都唔係好啱心水。始終我地傳球距離長少少，one touch亦唔多，偏向利用球員個人質素，直接引球推進黎創造威脅。見到換入盧卡古同連加特後，隊波係進攻又生返哂，唔多唔少證明左曼聯真係好依賴高大中鋒黎做支點，可幸嘅係盧卡古都好肯配合隊友踢法，所以關鍵在於佢同山齊士可唔可以做到一高一快，產生化學作用。
又講下另一個現象丫。好多時佢拎住個波都搵下左閘係邊，從佢嘅身體語言可以得知佢希望閘位球員可以壓前些少。摩連奴一向以防守意識為先，控球區域無阿仙奴咁前所以唔太可能要求兩閘長期留守中前場，頂多見有空位先疊瓦助攻。一個傳統左閘會更加容易明白佢想要啲咩走位，所以梳爾會幾適合做佢拍檔。話哂踢左咁多年翼，楊格嘅防守意識始終好難再上一層樓，唔係個個都好似華倫西亞咁有盡天時地利人和同埋出場時間去成功轉型架。
輸完俾熱刺之後已經俾曼城拋開成十五分，後面幾隊又殺到上黎，真係無乜時間再慢慢試陣。既然左邊已經夠多選擇，不如考慮俾佢踢右邊，我諗好多人都期待佢同隊長可以打哂成條右路，唔係齋斬波而係有埋CUT IN有埋射門威脅。
[WKD手記] - 老大哥普巴
睇標題大家會諗起邊個，係堅尼、李奧，定係朗尼？如果要你即刻講個現役紅魔，又有邊個擔得起呢個名呢？我諗到嘅 ，一係就心態未夠成熟，一係就因年齡/傷患漸走下玻連正選都未必有。老大哥唔係淨係效年得夠耐就做到，仲要係適當時候帶領球隊衝出困局，阿仙奴失落聯賽冠軍咁多年同缺乏領袖有莫大關係。無記錯上年都探討過相關人選，其實想重奪聯賽冠軍嘅話思考呢個問題，而且啱啱小勝般尼再次勾起呢個話題，點解？因為前場真係爭咁個阿哥囉！
今場般尼極其量係防守上踢好本份，唔算特別出色，但曼聯贏得非常驚險僅勝一粒。追開波嘅球迷一路睇一路驚重演俾李斯特城追和果場波︰又係領先一球；又係浪費左幾次拉開比數嘅機會，好彩今次無人係最後階段受傷咋。普巴一墮後，中路進攻問題就老是常出現﹐今次就唔再多講。普巴本身有一個慣性﹐就係帶波愈耐做嘅決定就愈差﹐而且連球迷都估到佢九成會梗硬射埋去。呢種情況唔只一次半次，反而係經過左一季半都無甚改善。普通人都睇得出嘅問題，何況係隊友？但永遠無人去糾正佢。當朗尼仲未離開，只要佢或者卡域克在陣中，普巴都唔敢太放肆，因為兩個係隊中都夠哂份量都係多年功臣。甚至伊巴有落場時佢都會比較肯將射門機會交俾伊巴處理，而唔係下下死去。今場有個三打二嘅快攻機會佢完全夠哂時間交俾馬仔或者福仔單刀，最後梗係轉化唔到做入波喇。今季唔只得佢處理得差，前面年輕球員太多，犯錯後如果無人即場提點又唔識反省，只會不斷失機。摩連奴向來注重防守，進攻反而偏向俾球員自由發揮，試想下如果係費格遜帶隊，睇完呢球仲唔即刻跳起身捉住黎罵，罰佢坐返幾場冷板凳？
普巴成為隊長只係時間問題，況且佢自己都好想帶領曼聯重返高鋒。除左以上問題之外，佢仲需要改進一樣野，就係自我。每個球員都會犯錯，都會獨食，但點樣去面對同反應先係重點。伊巴夠哂自我啦掛，但失誤後佢會立即意識到要道歉，就算對象係年紀好細嘅福仔馬仔都一樣，因為呢個係對隊友嘅尊重；同樣情況下，普巴通常會仰天長嘆、投訴。有時唔夠運就梗係激動喇，但有時就會忽略左隊友感受，對扭轉困局可以話係毫無幫助，分分鐘影響埋士氣添。肯正面面對過失先會進步同得到體諒，先可以更加團結而唔係各有各踢天才波。
我地後防有史摩寧主導防線，中前場始終未有適合人選，就算係準備退役嘅卡域克都唔係好壓場果種領袖。伊巴相信都係最後一兩季﹐佢嘅性格同普巴最相似，但經過歲月洗禮明顯識得拿捏平衡，唔知會唔會係掛靴前感染到我地嘅未來隊長呢？
[WKD手記] - 最後一塊拼圖
曼聯繼續上力，新一年主場揭幕戰就輕取史篤城三粒，因為距離榜首仲有成十二分，球迷無話為最近嘅表現感到雀躍，反而已經將注意力放到轉會風波上面。一月份似乎只有一個收購目標，就係得返半年約又有離心嘅山齊士，落筆之時已經幾乎確定加盟。先唔講價錢同其他條款﹐究竟佢係咪紅魔鬼最需要嘅人，如果真係加盟又應該踢邊個位呢？不如就由場波講起先。
杜拜集訓對捱完聖誕快車嘅曼聯百利而無一害，班球員唔單只係體力上得以回復，連心態都放鬆返唔少，睇下馬素爾入完波識笑同享受球迷歡呼就知。史篤城身處護級區，無論攻守都有好大進步空間，不過全場都有唔少埋門，如果把握得好啲場波就有價講。而曼聯前場就好鬼生猛，無論係兩閘後上、中路突破、柱躉造波都有板有眼。當然你可以話對手太弱，但事實證明我地進攻根本有好多瓣數，唔係獨沽一味打高空波。盧卡古呢場多左地波同中腰波接應，進攻即刻立體哂，令人諗返起季初隊波。
經過半季後，可以肯定雙前鋒唔會係摩連奴嘅首選陣式（除非落後緊喇），咁買得山齊士返黎都會係想佢拍住盧卡古踢中鋒掛。基於魔獸係現有戰術下非常重要，相信山齊士都唔會取代到佢踢單箭頭。
咁中場呢？進攻中場似乎已經俾普巴牢牢佔據左，事關佢復出之後證明左”無佢/踢防中/踢攻中”係三個層次嘅曼聯，而佢係亦享有極高自由度，可見未來幾年都會以佢為重心，其他球員無乜可能會挑戰到佢係中路話事權。
所以佢最可能踢嘅位就係兩翼，咁我地班現有翼鋒又踢成點呢？講馬素爾就梗係拉埋拉舒福特黎講喇，因為佢地都有潛力但表現飄忽，好就好在長期都會有其中一個踢得起，所以好多時後備上陣都會幫到球隊。兩個本來都需要上陣時間黎進步同吸收經驗，如果山齊士黎到踢左翼就會令佢地更少出場機會，長遠黎講未必係好事。右路曾經出現過唔同組合，但最合拍嘅始終係馬達同華倫西亞，因為前者知道幾時移入中路讓條邊線俾華西爆，係協防又有良好意識。連加特、拉舒福特只能叫中規中矩，而且兩個係其他位置都有更佳表現，以山神嘅份量同能力踢返巴塞時期嘅右翼位絕對可以強化右路進攻。
米希達恩即使唔成為今次交易嘅條件，都好難再係曼聯立足，主要係因為佢防守效率同意識太差。實力無容置疑，狀態同信心最多只影響一時發揮，但佢同摩連奴貌合神離已經證明左兩人關係唔太好，普巴在陣時佢更加有疊位之嫌。需知道佢都係上腳先交到功課嘅人，如果係曼聯發揮唔到，去到阿仙奴至少可以取代即將完約嘅奧斯爾丫。
原本以為冬季轉會市場會引入一個防中/閘黎做替補，解決上半季經常出現嘅體力問題，但如果做到一筆雙贏嘅交易又何樂而不為呢？
