梳爾隨隊出發迎戰愛華頓
早前比摩連奴狠批連白蘭特、楊格都不如嘅梳爾，原來佢提出要同摩連奴見面嘅要求。佢兩個見完面之後，就見到梳爾同大軍一齊入住The Lowry Hotel 備戰今晚場波。暫時未知佢兩個嘅對話內容，不過希望今場唔會係梳爾嘅最後機會啦...另外早前缺陣嘅 伊巴、普巴同埋靴里拉都有隨隊，相信今晚就可以復出！
小將韋洛克上一隊，隨時候命！
由於普巴同馬達受傷、靴里拉停賽、小豬離隊，曼聯中場人手極度緊絀！所以摩連奴決定向小將埋手，今次機會佢就交左比20 歲嘅韋洛克。呢名中場小將本來係阿仙奴青訓，不過係15 歲時就比阿仙奴放棄左，係曼聯試腳之後正式加盟。今季係曼聯預備組大放異彩，今季已經為預備組上陣22 場賽事。之前對利物浦預備組嘅賽事，就係靠佢射入致勝入球！其實韋洛克嘅好表現一早已經吸引到摩佬，亦都有好幾次機會同一隊操練，不過一直都無入選一隊大軍名單，今日機會終於來喇，希望佢好好把握，可以好似師兄拉舒福特咁一戰成名！
惡夢！馬達可能缺陣一個月！
曼聯官方證實馬達因為腹股溝受傷，已經係星期四進行手術，暫時未有復出日期。馬達個人希望能夠盡快復出，但係一般估計佢分分鐘要抖幾個星期...係4 月咁緊迫嘅賽程，繼鍾斯同史摩寧長期養傷，普巴同費蘭尼又有傷在身，依家再少一個中場主力，曼聯都真係幾大鑊...
米希達恩專訪：父親就係我嘅動力
米希達恩專訪：父親就係我嘅動力
最近以二千三百萬鎊轉投曼聯嘅米希達恩承認父親早逝塑造左佢嘅性格，亦都令佢決心要自己成為最頂級嘅足球員。
米希達恩父親係佢7 歲時就因為腦瘤與世長辭，享年33 歲。佢父親亦都係阿美利亞國腳，司職前鋒。米希達恩：「佢咁早就死左，真係好可惜。但係生活就係咁。我嘅生活仲係要繼續落去，希望佢係天上見到我依家嘅成 就會感到驕傲，我會盡我所能做到最好。」「我好遺憾佢睇唔到我加盟曼聯嘅呢一日，本來佢可以比到好多支持同幫助我，不過世事就係咁無常。我阿爸係我嘅動 力，細細個個陣我就成日睇佢睇波，我仲諗過同佢一齊訓練，我嘅夢想就係繼續走佢未走完嘅路。」
「要係一個單親家庭成長一D 都唔易，因為作為父親通常都會教小朋友咩係紀律，同埋當你感到迷失時，佢會幫你搵到方向。所以我都好多謝我媽媽，佢除左要做母親嘅工作，仲擔當左父親嘅角 色。我仲要多謝所有係最艱難時刻支持我嘅人。」「以前我睇左阿爸踢波嘅片好多次。不過依家嘅足球已經改變左好多，睇阿爸D 片已經學唔到D 咩，但係就會令我記得佢踢波嘅風格。」
至於啱啱起步嘅曼聯生涯，米希達恩都認同自己唔會咁易就成為正選。「曼聯用幾多錢收購我都好，無人承諾過我會有正選。我要係訓練時出盡全力去爭正選位。我 都知道自己唔會場場都落場，始終都要視乎戰術需要，但係我一定會盡力去幫助曼聯。」「老實講，我鐘意踢翼或者係進攻中場，不過踢咩位都係要等領隊安排。」
開心番？
早前有傳媒報導馬素爾被褫奪9 號波衫，覺得好慶，一怒之下unfollow 晒所有曼聯官方社交平台，令人猜測佢會唔會因為咁而離隊。不過事情最新進展係佢已經再次follow 番曼聯嘅社交平台。而另一方面，有個聲稱係馬素爾朋友嘅朋友嘅人，出左一張相，caption 係：「我個朋友係希臘嘅聖托里尼撞到馬素爾，佢話有得著11 號好開心，仲叫我個朋友唔好聽D 傳媒亂講。」希望呢件事真係大團圓結局啦！
摩連奴：今季要贏英超
摩連奴聲稱格拉沙兄弟同木仔都無要求佢承諾幾時贏番英超，但係佢自己就定左個目標：就係今季！「我一直由格拉沙兄弟同木仔個邊接收嘅訊息係：『係呢 三年內，做好你嘅工作，改善球隊嘅表現，係三年內將曼聯帶番去應有嘅位置。』」「我想做冠軍，不過就算無冠軍，如果球隊表現有大幅改善，咁都唔係一個令人 失望嘅結果。」「前四係我今季嘅目標？唔係。我地今季就要拎冠軍。」
域陀華迪斯轉投米杜士堡
係曼聯完成左18 個月外借合同後，VV正式轉投升班馬米杜士堡。VV 同新球會簽左兩年後同，以佢嘅資歷應該好大機會有得踢正選，祝福佢係新球會一齊順利！
摩連奴：米希達恩嘅風格好啱踢英超
摩連奴：「米希達恩係個好有才華嘅足球員，不論係踢球會賽事定係代表國家隊，佢都好多產。」「佢既有團隊精神，又有好好嘅個人技術同埋視野。我好開心佢揀左加盟曼聯。我相信佢好快就會係曼聯會發揮到影響力，因為佢嘅風格好啱踢英超。我地都好期待可以快D 同佢合作。」
米希達恩加盟曼聯！
米希達恩終於官宣！佢簽左四年合同另加延長合同一年權！亦都係第一個踢曼聯嘅亞美利亞人！佢對於能夠成魔覺得好自豪，亦係夢想成真。「我一直都好想 踢一間有悠久歷史嘅球會，我都希望自己會長時間成為紅魔一份子。多謝曼聯同摩連奴對我嘅信任。」「我亦都相信踢到呢間大球會就等如向我父親致意，當我仲係 好細個時，佢比左好多激勵我。」
摩連奴：我都唔知拜利踢唔踢得掂曼聯
雖然摩連奴花左接近三千萬鎊係拜利身上，但係佢都好坦白咁話唔知拜利準備好未。「佢有一個好後衛要有嘅特質：體格強壯，同埋非常之快。」「要搵一個生得 高、大隻、仲要快嘅球員係唔容易。」「拜利從來無踢過大會，佢準備好孭住咁多嘅責任同期望而有所表現未？我都唔知。」「呢個係一個問號，但係我嘅職責就係 刪除呢個問號，幫助佢成為一個有頭腦，有個性同埋有高度嘅曼聯球員。」
傑斯離隊！
正當陸續有新兵加盟曼聯，係球會渡過左二十九個年頭嘅傑斯決定離隊。離別之際，佢係官網留左一番說話比所有關心曼聯同埋佢嘅人。全文如下：
「作為球員同埋助教，我係曼聯過左29 年。我知道曼聯能夠得到成功全靠比年青球員機會、踢會令人緊張刺激嘅進攻足球。有高期望係一件健康嘅事，預期曼聯贏波亦都好正確。
由14 歲開始我就係曼聯，要作出離開嘅決定一D 都唔易。同我一齊離開嘅有無數珍貴嘅回憶同埋經驗，希望呢D 野係將來會幫到我。
依家就係離開嘅正確時間，雖然我想進入管理層，但係我仲未有好具體嘅計劃。
我好幸運係曼聯跟到兩個偉大嘅導師---足球界最偉大嘅領隊費SIR 同埋CV 說明左一切嘅雲高爾。我係佢地身上學到嘅野可以話係無價寶。
另外我都要再三多謝支援層面嘅職員，球場上嘅成績完全反映左佢地嘅努力。如果無佢地為球隊創作最好嘅環境，我唔會得到成功。
我亦都要恭喜摩連奴，佢成為左世上最大規模球隊嘅主帥。只有好少數嘅人可以係最高級別嘅比賽到證明自己，毫無疑問，摩連奴就係其中一個。我知道曼迷都會好歡迎佢到來。
最後我要多謝曼迷，我唔知點去表達我有幾掛住係奧脫福出場嘅時刻。係經歷左29 年之後，要講再見真係好困難。我好享受作為球員同助教嘅每分每秒。你地對我嘅支持實在令人驚嘆，多謝你地。
我要開始我人生新嘅一頁，仲有面對新挑戰，對於未來我感到好期待，因為我已經係曼聯接受左最好嘅領隊先修班。」
摩連奴：伊巴謙莫域唔使任何嘅指示都識踢波。
摩連奴：「伊巴謙莫域唔使任何嘅指示都識踢波。數據已經說明一切，佢係世界上其中一個最頂級嘅前鋒，一落到場就會出盡100%嘅力。佢已經贏左好多 重要賽事嘅冠軍，依家佢終於有機會踢世界上最好嘅聯賽，我知道佢會捉實呢個機會幫曼聯贏聯賽冠軍返來。我好肯定佢嘅才華會令所有曼迷都好興奮，而佢無價嘅 經驗會幫到陣中年青球員成長。」
伊巴謙莫域正式入魔
歡迎伊巴謙莫域正式入魔，佢亦都係曼聯今個夏天第二個新兵！呢個瑞典神鋒話自己好開心可以踢到曼聯同埋踢英超，佢亦都急不及待好想同摩連奴再次合 作。「摩連奴係一個好正嘅領隊，我已經準備好面對新挑戰。我嘅職業生涯有好多好好嘅回憶，但係我會係英格蘭創作更多更特別嘅時刻。」
傑斯確定不會出任諾定咸森林主帥
近幾個星期有媒體將傑斯即將成為諾定咸森林新帥嘅風吹到行一行，不過諾定咸森林官網已經公佈左新帥人選，就係曾經執教過華倫西恩斯、皇家蘇斯達同埋雷恩嘅 蒙坦拿。講執教經驗可以話係高過傑斯一大截。至於傑斯係咪仲留係曼聯，其實仲未有決定，因為佢仲未同摩連奴有正式會面。不過傑斯都不愁寂寞，佢黎緊會做住 Part Time 講波佬，佢會加入ITV 嘅講波佬團隊，去講埋今屆歐國盃剩低嘅賽事。唔知佢有無機會以講波佬身份見證祖家威爾斯奪冠呢？
迪基亞成魔5 年！
2011年今日，迪基亞以1千7百萬鎊正式入魔。雖然呢幾年只係得到一次聯賽冠軍同埋一次足總盃冠軍，不過佢嘅表現大家有目共睹。作為球迷，希望見到你未來十年都繼續企係奧脫福主隊龍門白界線前面！
迪基亞被西班牙警方調查
迪基亞被西班牙警方調查，懷疑佢有份安排2012年係馬德里5星級酒店中發生既性侵犯案件。迪基亞現時仍然留係西班牙國家隊既酒店入面。係法庭審理之前會假設佢暫時係無辜。迪基亞將召開記者會澄清。
根據eldiario.es 刊登嘅受害人口供，迪基亞以短訊安排受害人同色情電影製作人 Torbe 係酒店會面。Torbe 其後同受害人去到酒店，仲承諾佢嘅收入會好可觀，但係佢就要應班足球員要求做佢地想做嘅野。入到酒店，受害人見到另外一個女人同埋兩個足球員，其中一個疑似係蒙尼恩，另一個就係西班牙U21 成員。得逞獸慾後，兩個足球員威脅該兩名女子唔好爆響口，Torbe 就拎走晒D 錢。而西班牙警方就話呢份證供可信性好高。
官宣！卡域克續約至2017 年6 月！
官宣！卡域克續約至2017 年6 月！(做咩攪到好似新球員加盟咁...哈哈...)
卡神係續約後話：「過去十年，呢間咁偉大嘅球會一直係我生命嘅一部份。我好開心可以繼續我嘅奇妙旅程。有機會同摩連奴合作真係好正，大家都知道佢嘅執教生涯可以話係贏盡所有。我仲要感謝球迷嘅支持，贏足總盃係個美妙時刻，希望黎緊我地會贏更多錦標。」
Royce Sports 較早前報導：http://www.roycesports.com/munews/michaelcarrickcontract
孟菲斯離開曼聯？
早前外界有好多謠言關於孟菲斯離開曼聯，佢本人就以拍片形式去澄清。但係最近又有傳媒發現孟菲斯將佢d 愛車搬左上一架運輸公司嘅貨車到，似乎準備將d 車運番荷蘭。摩連奴上任後唔少球員都有機會被清洗，而孟菲斯呢d 動作係咪暗示緊佢收捨緊行裝，準備離開奧脫福重返荷甲？
孟菲斯嘅愛車被上貨車
其中一架電單車
